Anei jing gưl tal êlâo sa mta boh kroh dưi bi klă hdră êlan ksiêm dlăng klei doh êƀăt hlăm kluôm lăn čar, kluôm mơ̆ng klei mkra mjing mơ̆ng pla mjing, hrui pĕ, dŭ mdiăng, djă pioh, đŭng hruh truh kơ ba čhĭ.

Hluê si Lê Anh Trung – Khua Êpul hgŭm Durian Dak Lak, hdră ksiêm dlăng klei doh êbăt dưi ba mdah tal anei jing găl guôp hŏng bruă ba čhĭ durian mơ̆ng Việt Nam leh anăn klei čuăn mơ̆ng phung blei.

 “Hdră anei kluôm hlăm klei mkra mjing leh anăn ba čhĭ durian, mơ̆ng klei pla mjing, hrui blei, đŭng hruh truh kơ dŭ mdiăng, ba čhĭ. Êjai dưi ngă ênŭm, knơ̆ng bruă leh anăn mnuih ƀuôn sang dưi bi mâo djăp klei čuăn mơ̆ng dŭm anôk blei. Anei jing tur knơ̆ng hdră bhiăn yuôm bhăn, đru kơ dhar bruă ñĕ kơ klei hmăi dŭm klei kpăk mrâo hlăm êdei anăp”.

Bi myuôm klei čuăn mrâo mơ̆ng Phŭn bruă lŏ hma leh anăn wăl hdĭp mda, Vũ Ngọc Huy, k’iăng khua knơ̆ng bruă duh mkra mnai mblei Dũng Thái Sơn  brei thâo, lu knơ̆ng bruă êlâo dih ka thâo bĭt êlan kyua kƀah klei mtô. Ƀiădah ară anei, hdră êlan mrâo dưi mkŏ mjing hdră bhiăn klă mngač, đru bi klă hdră bruă mơ̆ng nah gŭ truh kơ knơ̆ng bruă:

 “Bruă mñă kơ phung hrui blei ti đang srăng bi klă hŏng alŭ wăl amâodah mâo klei dưi klă mngač srăng đru kơ klei kriê dlăng mơ̆ng knŭk kna găl hĭn, ngă djŏ dŭm klei mtô mơ̆ng alŭ wăl… Anăn jing klei bi knăl jăk čiăng kơ dhar bruă nao hŏng hnơ̆ng tŭ jăk hơ̆ĭt kjăp”.

Bi kơ anôk bruă kriê dlăng mơ̆ng alŭ wăl, Nguyễn Minh Huấn, khua knơ̆ng bruă lŏ hma leh anăn wăl hdĭp mda čar Dak Lak brei thâo, dhar bruă lŏ hma bi klă hdră mtrŭn mrô 3015 mơ̆ng Phŭn bruă ngăn dŏ leh anăn wăl hdĭp mda jing tur knơ̆ng hdră bhiăn yuôm bhăn čiăng mđĭ klei ksiêm dlăng hnơ̆ng jăk mnơ̆ng dhơ̆ng mơ̆ng phŭn. Knơ̆ng bruă dôk bi mguôp hŏng dŭm alŭ wăl, knơ̆ng bruă, leh anăn êpul bruă hnưm mkŏ mjing klei hâo hưn, mtô mjuăt kơ ƀĭng ngă lŏ hma, phung hrui blei kơ dŭm klei čuăn mrâo, mbĭt anăn mñă kơ dŭm alŭ wăl ngă hdră ksiêm dlăng klei doh êƀăt, tui duah phŭn agha, rơ̆ng kơ klei klă mngač leh anăn ksiêm dlăng klei truh mơ̆ng hnưm. Nguyễn Minh Huấn, brei thâo:

 “Knơ̆ng bruă bi mguôp hŏng anôk bruă pla mjing, răng mgang ana pla mjing leh anăn bruă sang čư̆ êa dŭm ƀuôn hgŭm mđĭ klei thâo săng kơ bruă kriê dlăng hnơ̆ng jăk leh anăn klei doh êƀăt, mđĭ hĭn bruă mtô kơ hdră pla mjing durian hluê si hnơ̆ng čuăn, găl guôp hŏng klei mlih yan adiê, mđĭ hĭn bruă ksiêm dlăng, ktuê dlăng klei doh êƀăt leh anăn mrô krĭng pla mjing, anôk đŭng hruh durian ba čhĭ”.

Bruă phŭn bruă lŏ hma leh anăn wăl hdĭp mda ba mdah hdră ksiêm dlăng klei doh êƀăt kơ boh durian, amâo djŏ knŏng bi mâo djăp klei čiăng hlăm boh sĭt anôk mnia mblei, ƀiădah lŏ jing klei bi êdah hdră tă mđĭ kơhưm boh mnga hŏng tur knơ̆ng hdră bhiăn. Klei sa ai mơ̆ng êpul hgŭm dhar bruă, êpul êya knơ̆ng bruă leh anăn bruă sang čư̆ êa alŭ wăl brei ƀuh dhar bruă durian Việt Nam dôk mkŏ mjing sa hdră đĭ kyar klă mngač, hơĭt kjăp leh anăn thơ̆ng kơ bruă hĭn.