Bruă bi hmô mâo ngă ti ƀuôn hgŭm Krông Buk. Hlăm ênhă hlăm brô 150 héc-ta đang boh durian, knơ̆ng bruă pla mjing hŏng kdrăp mrâo Hồng Thuận lông bi hmô leh pla mjing boh mklăk yan hlăm êbeh 15 héc-ta lehanăn hlăk dơ̆ng mâo boh mnga tal êlâo, tĭng srăng mâo pĕ hlăm mlan 3 anei.

Tui si klei tui ksiêm mơ̆ng đang boh, ana boh durian thŭn tal 7 mboh mơ̆ng 25-35 boh, dưi mâop hlăm brô mơ̆ng 90-110 kg/ana, jing knar hŏng 12 tôn/ha.

Nao mbĭt hŏng êpul mă bruă, k’iăng nai prŏng, nai prĭn Nguyễn Văn Minh, Khua anôk bruă lŏ hma, Sang hră gưl prŏng Tây Nguyên brei thâo, boh durian mklăk yan ba čhĭ kơ ala tač êngao ară anei hlăm brô 160 êbâo prăk/kg, jing yuôm hĭn truh dua blư̆ hŏng yan phŭn, khădah boh mâo jing amâo mâo jăk lu ôh, ƀiădah mâo hnơ̆ng jăk, lehanăn čhĭ yuôm, snăn klei tŭ dưn mâo ba wĭt ăt jing prŏng hĭn.

Bi hŏng phung duh mkra hlue ngă hdră anei, Vũ Văn Cần, Khua anôk bruă pla mjing hŏng kdrăp mrâo Hồng Thuận brei thâo, anăp truh kơ klei mlih mrâo hdră mă bruă, anôk duh mkra anei srăng duh bi liê prŏng hĭn. Siămdah, ăt msĕ hŏng lu ana boh durian ơpla hlăm čar Daklak, kyuadah pla lu jing pluă mbĭt hŏng đang kphê, ksu kyuanăn amâo mâo mkăp ôh mrô knăl krĭng pla mjing, tuôm hŏng klei dleh prŏng hlăm bruă čhĭ kơ ala tač êngao. Klei anei čang hmăng kơ dŭm gưl mâo klei dưi, ksiêm dlăng mghaih msir.

Tui si Nguyễn Hắc Hiển, Khua anôk bruă pla mjing lehanăn răng mgang mnơ̆ng pla mjing Daklak, anei yơh jing klei gun kpăk prŏng hŏng bruă pla mjing boh durian hlăm čar:

 Tui si hdră mtrŭn mrô 38/2026 (mâo mtrŭn leh, ƀiădah ka mâo klei tŭ dưn ôh) kơ klei kiă kriê mrô knăl krĭng pla mjing, kyuadah bruă pla pluă jing amâo mâo dưi ôh. Ƀiădah ară anei, êpul êya ngă bruă kăp ksiêm jing kahan ksiêm, arăng nao mă bruă jing dleh. Dah pô soh jing amâo mâo dưi ôh.

Leh hmư̆ klei blŭ mơ̆ng phung duh mkra, lehanăn mơ̆ng dŭm anôk bruă truăn kơ bruă, Đỗ Hữu Huy lač kơ hdră bi hmô pla mjing anei jing bruă năng mđĭ ai. Hnơ̆ng boh durian mâo hlăm čar Daklak hlăk đĭ hĭn, lehanăn anăp srăng truh   1 êklăk tôn, ksŭn hlăm 3 mlan yan phŭn, klei anăn jing ba klei ktrŏ prŏng kơ bruă hrui blei lehanăn logistics. Kyuanăn, bruă pla mjing boh durian mboh mklăk yan, amâo mâo djŏ knŏng mđĭ klei tŭ dưn bruă knuă, ƀiădah lŏ raih yan hrui êmiêt boh mnga, bi hrŏ klei ktrŏ kơ klei čhĭ mnia boh mnga mâo. Ñu mâo klei akâo kơ phung kreh knhâo lŏ dơ̆ng mđrăm mbĭt hŏng phung duh mkra ksiêm wĭt jih jang hdră êlan mă bruă, čiăng ksiêm bi mklă kơ boh mnga, kơ hnơ̆ng jăk, lehanăn bi leh hdră êlan dlăng kriê wiê ênăk, mbĭt anăn ksiêm dlăng kơ hdră srăng pŏk mlar bruă anei hlăm wưng tinăp.

Phung khua kiă kriê čar ăt mtă, brei mđing hĭn kơ bruă klă mngač ênoh mâo mơ̆ng bruă anei êjai hlăm klei mă bruă hŏng kdrăp mrô. Daklak ară anei mâo êbeh 30% hnơ̆ng boh kphê lehanăn boh durian hlăm kluôm ala, siămdah klei bi mni amblei hŏng ala tač êngao mơ̆ng dua mta mnơ̆ng anei knŏng čih yap mă hlăm alŭ wăl, knŏng hlăm brô 23%. Kyuanăn, Êpul hgŭm bruă boh durian, Êpul hgŭm bruă kphê mbĭt hŏng phung duh mkra lehanăn dŭm anôk bruă djŏ tuôm bi tĭng mkă ksiêm dlăng, mkăp ênoh bi djŏ, klă hĭn kơ jih jang klei tŭ dưn mơ̆ng boh mnga mâo, mjing knơ̆ng kơ bruă kiă kriê, lehanăn čuăn mkă hdră êlan mă bruă.

Hŏng dŭm klei dôk gun kpăk djŏ tuôm kơ mrô knăl krĭng pla mjing, snăn Đỗ Hữu Huy čang hmăng kơ dŭm anôk bruă djŏ tuôm lŏ dơ̆ng bi klin, bi leh jih jang hră mơar, lehanăn mâo klei akâo kơ dŭm phŭn dhar bruă gưl dlông ksiêm dlăng ruh mgaih.

Hŏng bruă sang čư̆ êa snăn lŏ dơ̆ng akâo, lŏ dơ̆ng kwưh kơ phŭn bruă ngăn dŏ wăl hdĭp mda nao bi ksiêm dlăng. lehanăn tal 2 mprăp djăp ênŭm kơ ênoh, kơ hdră mă bruă, boh nik gưl anei jing găn klei ruah khua bruă kƀĭn ala mơh, snăn bi blŭ hrăm hŏng phung bi ala bruă kƀĭn ala mơ̆ng gưl dlông hriê, čiăng diñu păn kjăp boh klei. lehanăn truh ti anôk bi kƀĭn bruă kƀĭn ala, dưi ba mdah klei anei hlăm klei bi kƀĭn.