Gŏ sang Y-Thêm ti să Ea Kpam, kdriêk Čư̆ M’gar, čar Daklak dôk rông truh 16 drei êmô. Tui si klei bhiăn hđăp, rông êmô kreh hiu kiă răng hlăm kdrăn hiu ƀơ̆ng rơ̆k. Ƀiădah hlăm wưng giăm anei, kyuadah kdrăn kiă kriê amâo lŏ mâo anôk ôh, snăn mnuih ƀuôn sang grăp aguah msĕ hŏng Y-Thêm srăng puh ba êmô pô hlăm anôk mâo kdrăn rơ̆k prŏng phưi ƀơ̆ng, truh tlam puh êmô wĭt krư̆ hlăm war êning. tơdah truh ti wưng kƀah rơ̆k hlăm kdrăn, gŏ sang ñu lŏ pla rơ̆k, amâodah lŏ nao blei mơ̆ng êngao ba wĭt mčiêm êmô. Y Thêm brei thâo, mơ̆ng leh ngă war êning kjăp, êmô dưi rông hlăm klei dlăng kriê wiê ênăk jăk, bi mdoh war êning khuăt, anôk mkăm eh bi mdoh êa djah, amâo mâo ba klei čhŏ ôh.

 “Ba krư̆ êmô kbao hlăm war anei jing doh amâo mâo klei ƀâo ôh. Êlâo dih mâo tue hiu čhưn nao huă ƀơ̆ng bi kuôl ung mô̆, ƀuh kdrah eh êmô eh kbâo jing kăn jăk lei. Ƀiădah ară anei jăk leh, amâo lŏ mâo mnâo ƀâo ôh, doh bhung sơăi”.

Phạm Doãn Thắng, knuă druh bruă mdrao mgŭn mnơ̆ng rông să Ea Kpam, kdriêk Čư̆ M'gar, čar Daklak brei thâo, êlâo dih, hlăm alŭ wăl anei lu mnuih ƀuôn sang mưng leh rông êmô kbao jing nao kiă phưi hlăm kdrăn hiu ƀơ̆ng, mlam wiêng ba wĭt ka hlăm gŭ krum sang. Klei ngă msĕ snăn jing čhŏ, ƀâo eh êmô lehanăn êa m’iêk êmô, ngă hmăi amâo mâo jăk kơ klei suaih pral anak mnuih. Mbĭt hŏng anăn,tơdah êmô kbao pô rông tăm mâo hĕ klei ruă tưp, jing ăt dleh mơh hlăm klei răng kriê. Kyuanăn yơh bruă sang čư̆ êa, dŭm dhar bruă mâo leh klei hâo hưn. Mtrŭt mjhar čiăng kơ mnuih ƀuôn sang bi mkra war êning krư̆ êmô kbao bi jăk.

 “Djăp gưl êpul êya bi hâo hưn, mtô mblang, lehanăn mâo bruă sang čư̆ êa đru kčĕ hlăm bruă mkra war êning. Dŭm thŭn hŏng anei lŏ mâo êpul phung hlăk ai nao bi đru mkra brei war êning kơ mnuih ƀuôn sang. Ară anei rông êmô amâo lŏ jăk mâo klei phưi tha kơ êngao ôh, knŏng sui sui sa blư̆ brei êmô kbâo kbiă hiu kơ êngao bhiâo, lehanăn jih jang mnơ̆ng pioh mčiêm êmô mâo mprăp leh wăt hlăm wưng hjan hlĭm”.

Tui si Nguyễn Quang Đức, Khua anôk bruă rông mnơ̆ng lehanăn mdrao mgŭn mnơ̆ng rông kdriêk Čư̆ M’gar, čar Daklak, kluôm kdriêk ară anei mâo êbeh  14.000 drei êmô. Hlăm anăn, mâo sa anôk rông êmô prŏng hŏng ênoh êbeh 100 drei dŭm adôk jing mơ̆ng dŭm gŏ sang mnuih ƀuôn sang bi rông. Leh lu thŭn, mtô mblang mtrŭt mjhar, ară anei mnuih ƀuôn sang thâo leh hlăm bruă rông kreh knhâo hĭn, ba wĭt leh klei tŭ dưn hlăm lu mta:

 “Rông êmô hlăm bruă mkra hĕ war êning bi jăk, thâo bi mdoh, mkhư̆ mdjiê kman, lehanăn klei ruă tưp, mnuih ƀuôn sang mâo dlăng kriê leh jăk êmô pô rông. Mbĭt hŏng anăn mâo phung knuă druh mdrao mgŭn mnơ̆ng rông kiă kriê jăk bruă tlŏ mgang, lehanăn mâo knŭk kna kiă kriê kjăp hlăm bruă rông êmô”.

Daklak ară anei mâo ênoh êmô kbao hlăm brô 280.000 drei. Leh lu thŭn hâo hưn mtô mblang, mnuih ƀuôn sang bi mlih leh klei mĭn, bi hriăm êmuh hdơ̆ng găp dơ̆ng bi mlih yơh hdră rông hiu kiă răng hlăm kdrăn, ară anei krư̆ hlăm war êning, mâo rơ̆k mčiêm djăp ênŭm, dưi răng kriê răng mgang klei ruă, êmô rông đĭ hriê kơ jăk, ba wĭt klei tŭ dưn hĭn kơ mnuih rông êmô./.