Lu thŭn giăm anei siă suôr hŏng bruă pla alê mă êbŭng ti Tây Ninh, Lê Minh Trung, Khua êpul hgŭm bruă Minh Trung, brei thâo bruă bi kruh klei leh kuôl kă hgŭm bruă duh mkra pla mjing, ƀiădah klei dleh kpăk ăt dôk nanao. Êjai anăn ênoh ênil hlăm klei bi mnia mblei đĭ, lu mnuih pla mjing čhĭ mnơ̆ng pô mâo kơ phung ghan mnia, êjai anăn ênoh čhĭ amâo mâo yuôm ôh, ngă kơ êpul bruă hgŭm dôk ksŭn lu mnơ̆ng. Klei anei ba klei amâo mâo jăk kơ êpul bruă kăp hrui blei. Tinăp klei anei, Êpul hgŭm bruă Minh Trung bi hrui blei hlue djŏ hŏng ênoh bi čhĭ mnia kơ êngao, amâo lŏ djŏ hlue hŏgn ênoh tal êlâo ôh. Êpul hgŭm bruă hrui blei jih boh mnga mâo, êjai anăn bi liê dưi tĭng hlue hŏng ênoh hrui wĭt jih jang.

Msĕ snăn mơh, Nguyễn Viết Vị, Khua êpul hgŭm bruă Phước Thiện lač, pioh mkŏ mjing krĭng pla mjing hơĭt ti alŭ wăl knông lăn Bình Phước êlâo dih, Êpul hgŭm bruă duh bi liê leh sa ênoh prŏng dơ̆ng mơ̆ng mjeh, hdră dlăng kriê, hlŏng truh kơ bruă mkŏ mjing anăn knăl, lehanăn tui duah anôk čhĭ mnia. Êjai klei bi ktưn bŏ hŏng klei ktang, bruă krơ̆ng pô kăp blei, lehanăn djă pioh nanao k’hưm kơ boh mnga mơ̆ng alŭ wăl mâo, klă sĭt jing sa klei tĭng dleh.

Khă snăn, Êpul hgŭm bruă ăt dôk tuôm nanao hŏng phung ghan mnia mơ̆ng êngao hriê bi kơruh ênoh čhĭ mnia, diñu blei hŏng ênoh yuôm, ngă kơ lu mnuih pla mjing lăm lui jih klei kuôl kă hŏng Êpul hgŭm bruă. Leh êdei kơ anăn ênoh čhĭ toh hroh amâo lŏ yuôm ôh, mnuih ƀuôn sang lŏ wĭt hŏng êpul hgŭm bruă čiăng bi čhĭ tui si ênoh leh kuôl kă.

Êpul hgŭm bruă duah anôk čhĭ mnia êjai, lehanăn klam brei jih ênoh luič liê hlăm klei bi hgŭm, ƀiădah leh ƀuh klei bi mnia mblei kơ êngao jing yuôm hĭn, mnuih ƀuôn sang bi kluh đuĕ bi rai jih hdră leh kuôl kă, snăn pătdah hlăm wưng giăm anei ka mâo ôh ya klei bhiăn djăp ktang đru mgang brei kơ klei tŭ dưn bruă knuă. Nguyễn Viết Vị, lač:

Dôk mâo dŭm anôk dleh kpăk prŏng, ênưih đuĕ nao kơ klei bi kơruh jih klei bi hgŭm ară anei. Anăn jing dŭm Êpul hgŭm bruă, phung duh mkra ka dưi mâo ôh klei bhiăn pioh răng mgang kơ pô, boh nik klei đru mgang brei mơ̆ng bruă sang čư̆ êa, lehanăn alŭ wăl êjai hluê ngă klei bi hgŭm hŏng mnuih ƀuôn sang. Êjai anăn klei phung ghan mnia hriê bi rai hdră êlan bi mnia mblei, mơ̆ng anăn mnuih ƀuôn sang bi kruh jih klei leh kuôl kă, klei anăn kreh mâo nanao lu blư̆.”

Hlăm hdră êlan čiăng ba čhĭ boh mnga pô kơ ala tač êngao, snăn Ngô Tường Vi, CEO knơ̆ng bruă mni amblei hŏng ala tač êngao Chánh Thu, brei thâo: Lu thŭn leh êgao, anôk ñu duh mkra čŏng mă leh bruă hŏng dŭm anôk čhĭ mnia prŏng, lehanăn phung bi mnia mblei hŏng ala tač êngao, boh nik kơ klei čhĭ mnia hŏng ala čar China, pioh duah anôk čhĭ hơĭt. Leh lu blư̆ ksiêm dlăng, lehanăn mâo klei bi trông, anôk duh mkra ƀuh: Boh kruĕ dŭng klĭt mtah, boh durian, mbĭt hŏng lu boh kroh mkăn mơ̆ng Việt Nam mâo leh klei găl prŏng čhĭ mnia hŏng ala čar China, khă knŏng jih jang boh mnga anăn jing doh, djăp ênoh čuăn.

Siămdah, klei bi mnia mblei hŏng ala tač êngao, djŏ tui si klei bhiăn bŏ hŏng klei ktang dơ̆ng mơ̆ng duh duh mkra hlŏng truh hŏng phung pla mjing. Mơ̆ng bruă ksiêm bi kjăp hnơ̆ng ba yua êa drao hluăt, hlue ngă djŏ mrô knăl krĭng pla mjing hlŏng truh kơ klei ƀuăn jao mnơ̆ng bi ênŭm, bi djăp djŏ hŏng klei leh kuôl kă. Tơdah soh mă sa hlăm jih jang klei kuôl kă, snăn jih jang hdră êlan mă bruă anăn srăng hmăi amâo mâo jăk.

 Phung duh mkra amâo mâo dưi ôh hjăn păn kpưn đuĕ nao hlăm krah êa ksĭ prŏng hlăm klei bi mnia mblei, lehanăn phung pla mjing kăn jăk rei bi mlih hĕ klei tŭ dưn êjai anei, hŏng klei hơĭt kjăp sui hlăm bruă knuă. Bruă tal êlâo jing mkŏ mjing krĭng pla mjing hơĭt, mâo hnơ̆ng jăk djŏ hŏng klei čiăng hlăm bruă bi mnia mblei. Anôk čhĭ dưi hơĭt, ênoh ênih boh kroh Việt Nam snăn kơh klă sĭt srăng dưi čhĭ mnia jăk hŏng ala tač êngao. Ngô Tường Vi mñă, tơdah amâo mâo bi mlih ôh hdră êlan mă bruă, lehanăn amâo mâo ôh klei bhiăn kjăp hlăm klei bi hgŭm, mnuih pla mjing pral srăng toh hroh hlăm klei bi ktưn mnia mblei hŏng ala tač êngao:

: Êngao kơ ênoh ênil hlăm klei bi mnia mblei, snăn mnuih pla mjing brei mđing kơ klei hơĭt hlăm klei hrui blei boh mnga, tui si dŭm êpul êya dôk ngă hŏng mnuih pla mjing, snăn anei jing bruă mnuih ƀuôn sang brei mâo klei mĭn tal êlâo. Drei dưi čhĭ hŏng ênoh yuôm hlăm dŭm tôn, thâodah hlăm sa thŭn, ƀiădah brei mnuih ƀuôn sang tui duah sa êpul êya mđrăm mbĭt hŏng pô kjăp hlăm lu thŭn… kyuanăn yơh brei mđrăm mbĭt bi mĭn kơ hdră êlan mă bruă kbưi hĭn.

Tui si Nguyễn Đình Tùng, Knơ̆ng khua kiă kriê Vina T&T Group, K’iăng khua êpul hgŭm djam mtam boh kroh Việt Nam, k’hưm mơ̆ng phung ngă lŏ hma Việt Nam hlăk dưi bi kjăp hlăm klei bi mnia mblei hŏng ala tač êngao. Klei lu ala čar mnia mblei mâo klei bhiăn kjăp, jing pŏk nanao êlan kơ pô mđĭ mlih hdră êlan mă bruă mđĭ ênoh mâo hrui wĭt kơ mnuih ƀuôn sang. Kyuanăn, mnuih pla mjing brei thâo bi mlih mnơ̆ng pla mjing, čŏng tui hriăm hdră mă bruă mrâo mrang, lehanăn thâo bĭt klă phŭn agha anôk pla mjing, pioh bi hgŭm jăk hlăm klei bi mnia mblei hŏng ala tač êngao.

Mơ̆ng boh sĭt klei mă bruă, Tùng ksiêm wĭt ƀuh boh phŭn ăt jing kơ klei đăo knang plah wah phung duh mkra hŏng mnuih pla mjing. Phung duh mkra đru kơ hdră mă bruă, lehanăn mâo klei ƀuăn kjăp kơ klei hrui blei boh mnga, lehanăn bi jao boh mnga djŏ tui si klei leh kuôl kă. Boh sĭt, dôk ƀuh hlăm klei bi hgŭm mâo hĕ klei bi kơruh, kyua klei tui tiŏ kơ ênoh yuôm mơ̆ng êngao hlăm klei amâo mâo hơĭt ôh. Ƀiădah êjai anăn klei bi mnia mblei hŏng ala tač êngao ară anei, klei mă bruă hliê hluôt, kƀah klei bi hgŭm amâo mâo anôk kơ klei anăn ôh.

Hdră tui si Nguyễn Đình Tùng mă klei hriăm mơ̆ng klei tuôm găn leh, anăn jing mkŏ mjing êpul hgŭm bruă, čiăng mơ̆ng anăn mnuih ƀuôn sang nao hlăm bruă knuă mâo klei kiă kriê, lehanăn đru bi mgang, bi đru hdơ̆ng găp:

Ară anei hmei knŏng mă bruă hŏng êpul hgŭm bruă, lehanăn dŭm bruă hgŭm… bi mnuih ƀuôn sang nao bi hgŭm mbĭt srăng mâo dŭm klei čoh čuăn, thâo bi đru hdơ̆ng găp, kăp bi kčĕ mă bruă. Hlei pô ngă soh knŏng čŏng kdŭn đuĕ hjăn pô, amâo mâo guôn phung duh mkra mâo klei bhiăn bi kmhal ôh. Hmei knŏng čiăng mjing bruă knuă mă, hŏng mnuih mă bruă sĭt, ngă djŏ, mâo mta kñăm mbĭt hlăm klei kjăp pioh mkŏ mjing anăn knăl Việt Nam ară anei.

Tơdah dŭm ala čar bi blei mnia mâo klei čoh čuăn kjăp, snăn klei bi hgŭm bruă duh mkra pla mjing amâo mâo djŏ knŏng jing sa klei hrŏng ruah đuič ôh, ƀiădah anei srăng jing sa hdră êlan mă bruă hŏng klei kjăp amâo mâo dưi dêč ôh. Čiăng kơ boh mnga bruă lŏ hma mơ̆ng Việt Nam kpưn đĭ đuĕ nao kbưi hĭn, snăn bruă mđrăm mbĭt păn kjăp klei leh ƀuăn rơ̆ng, lehanăn lŏ bi ksul mbŭ klei đăo knang mă bruă kjăp plah wah phung duh mkra lehanăn phung ngă lŏ hma jing hdră êlan amâo lŏ dưi tlaih ôh./.