Hruê 5/2, Anôk bruă mguôp hnư Banana Brothers Farm, kdriêk Mdrak, čar Dak Lak ngă knăm ba čhĭ kơ ala tač êngao 5 container (100 ton) mtei truh kơ wăl anôk mnia mblei China lehanăn Dhŭng Korea. Lê Thị Mỹ Hạnh, Khua anôk bruă brei thâo, thŭn êlâo, anôk bruă ba čhĭ leh êbeh 10.000 ton mtei truh kơ dŭm ala čar Dhŭng Korea, China, Japon, Mongol… Thŭn anei, anôk bruă srăng pŏk mlar thiăm 500 ha čiăng mđĭ hnơ̆ng mâo mtei lehanăn ba čhĭ hlăm dŭm wăl anôk mnia mblei mrâo.

“Hlăm thŭn 2025, hmei čang hmăng srăng pŏk mlar farm mrâo lehanăn mđĭ hnơ̆ng ba čhĭ kơ ala tač êngao truh kơ kiê kngan mnuih blei yua lu hĭn dơ̆ng, kyua klei čiăng ƀrư̆ hruê ƀrư̆ đĭ hĭn”.

Hŏng Anôk bruă mguôp hnư Ban Mê Green Farm, ƀuôn prŏng Ƀuôn Ama Thuôt, čar Dak Lak, mơ̆ng akŏ thŭn 2025, bi mklă leh Hră mơar bi hdơr lehanăn klei kuôl kă ƀĭng hgŭm hluê ngă êbeh 100 container boh durian, bi knar êbeh 2.700 ton boh durian bi êăt ba čhĭ kơ ala tač êngao. Nguyễn Văn Công, Khua Anôk bruă brei thâo:

“Thŭn 2025 dưi mâo leh dŭm klei bi êdah jăk, păt dah čiăng jih ƀĭng hgŭm kuôl kă leh hdră mnia mblei bi mklă leh hdră ngă bruă ti anôk bruă mrô 1 lehanăn anôk bruă dôk pŏk ngă hdră bi hgŭm pŏk mlar thiăm anôk bruă lehanăn dŭm hjiê mkăn”.

 Sa klei bi êdah jăk hlăm hdră ba čhĭ mnơ̆ng lŏ hma kơ ala tač êngao ti Dak Lak jing kphê mâo hnơ̆ng tŭ jăk dưi mâo dŭm wăl anôk mnia mblei tar rŏng lăn mđing dlăng. Mbĭt hŏng kphê ka mkra mjing, dŭm mta kphê leh mkra mjing mơ̆ng čar ƀrư̆ ƀrư̆ dưi bi mklă leh kơhưm hlăk dưi ba čhĭ ti lu ala čar, krĭng lăn. Hlăm anăn mâo dŭm wăl anôk dleh dưi ksiêm dlăng lehanăn mâo lu klei găl msĕ si ti Mi, Japon, Dhŭng Korea, Ơrôp…  Lê Đình Tư, Khua Anôk bruă mguôp hnư Minodo Farm Care, ƀuôn prŏng Ƀuôn Ama Thuôt, čar Dak Lak brei thâo, thŭn 2025 ƀuăn srăng jing sa thŭn kpưn đĭ mơ̆ng anôk bruă lŏ hma Dak Lak tơdah dưi duh bi liê, mđing dlăng djŏ hnơ̆ng.

“Dŭm anôk bruă duh mkra mnia mblei mkra mjing êlam lehanăn pla kphê mâo hnơ̆ng tŭ jăk, tal êlâo hĭn brei mâo klei mđing đru kơ hdră mtrŭn. Tal dua jing kơ bruă ngăn prăk čiăng bi mlih kdrăp mrâo, maketing nao hgŭm hlăm dŭm knăm mơak mnia mblei lu ala čar, ênoh duh bi liê lu kyua anăn brei mâo klei đru mơ̆ng Gưl dlông truh kơ alŭ wăl.

Nguyễn Hoài Dương, Khua Anôk bruă Lŏ hma lehanăn mđĭ kyar krĭng ƀuôn sang čar Dak Lak brei thâo, thŭn 2025, čar lŏ mđing mđĭ kyar hnơ̆ng tŭ jăk mnơ̆ng lŏ hma, mkăp djŏ hŏng klei čiăng hlăm wăl anôk mnia mblei kơ ala tač êngao.

“Hmei mđing dlăng lehanăn mjing klei găl čiăng kơ anôk bruă duh mkra mkŏ mkra hdră pla mjing mƀĭn sa anôk, mâo hră bi mklă, mâo anăn knăl lehanăn ai bi ktưn hŏng dŭm wăl anôk mnia mblei. Boh nik jing dŭm wăl anôk mâo hnơ̆ng tŭ jăk,ƀrư̆ hruê ƀrư̆ dleh dưi ba čhĭ. Anăn jing tuê knơ̆ng čiăng mđĭ boh tŭ yuôm mnơ̆ng lŏ hma ti Dak Lak lehanăn kluôm krĭng Lăn dap kngư.

Hŏng dŭm klei jăk găl lehanăn klei gĭr ktưn amâo mâo mdei mơ̆ng dŭm anôk bruă duh mkra, klei čang hmăng hlăm thŭn 2025, mnơ̆ng lŏ hma Dak Lak srăng lŏ dơ̆ng mđĭ anăn knăl, pŏk mlar wăl anôk mnia mblei čiăng ba wĭt dŭm boh tŭ dưn mrâo. Klei anei đru mguôp mđĭ hnư hrui wĭt kơ mnuih ƀuôn sang, anôk bruă duh mkra lehanăn mtrŭt mđĭ kyar bruă duh mkra – ala ƀuôn mơ̆ng čar, mđing truh kơ hnơ̆ng đĭ kyar dua ênoh mrô hlăm wưng ti anăp./.