Dŭm hruê anei, ti krĭng hma prŏng 3 ha ti alŭ 10, să Hòa Phú, ƀuôn prŏng Ƀuôn Ama Thuôt, ung mô̆ Hoàng Văn Hồng mbĭt hŏng phung mă bruă dôk mkra kdrăp bec krih lehanăn dôk dră bi kjăp ana mtei mboh. Ayŏng brei thâo, gŏ sang ayŏng bi mlih ênhă pla djam mtam lehanăn ktơr mjeh mrâo ba pla mtei mơ̆ng akŏ thŭn 2021. Ana mtei amâo djŏ knŏng ba hnư hrui wĭt hơĭt ƀiădah hruê ai dlăng kriê ăt hrŏ lu mơh.

“Thŭn anei phung blei hriê dlăng lehanăn kuôl kă blei jih leh mtei. Kâo tĭng hnư hrui wĭt mơ̆ng 3 ha mtei hlăm brô 1 êklai prăk, grăp ha hrui prăk mnga hlăm brô 200 êklăk prăk. Pla mtei lŏ đru bi hrŏ hruê ai mă bruă mkă hŏng ktơr lehanăn djam mtam. Leh kơnăn, mtei čiăng sa thŭn hrui êmiêt, amâo mâo msĕ hŏng tiêu amâo dah boh ƀơr sui hĭn.

Ayŏng Đậu Văn Tuấn, ti alŭ 5, să Hoà Phú, ƀuôn prŏng Ƀuôn Ama Thuôt, mphŭn pla mtei mơ̆ng thŭn 2020. Hŏng 5 ha mâo hnư hrui wĭt hơĭt kjăp, ayŏng mprăp lŏ pŏk mlar ênhă truh 2 blư̆ hlăk bi sinê mưn yua thiăm lăn pla mjing mơ̆ng mnuih ƀuôn sang hlăm krĭng. Ayŏng Tuấn brei thâo:

“Ti krĭng Hoà Phú anei, hmei ba yua lu jing mjeh mtei Thái Lan, mâo ba mơ̆ng krĭng Ba Vì, čar Hà Tây hđăp. Čiăng kơ ana mtei đĭ jing pral lehanăn mâo boh lu, hmei ruah mjeh jăk, ênưih ba pla. Ana mtei Thái Lan djŏ guôp hŏng krĭng lăn, yan adiê mơ̆ng Dak Lak, kyua anăn mtei tinei đĭ jing jăk snăk”.

Nguyễn Văn Kha, khua anôk bruă duh mkra hrui blei mtei Dak Lak hriê mơ̆ng Hưng Yên, brei thâo: grăp thŭn, ñu hrui mâo dŭm êbâo ton mtei čiăng ba čhĭ kơ dŭm čar nah Dưr lehanăn mkăp kơ hdră ba čhĭ kơ ala tač êngao. Thŭn anei, anôk bruă duh mkra kuôl kă blei hlăm brô 700 ha mtei čiăng mkăp kơ wăl anôk mnia mblei wưng Têt Ất Tỵ 2025:

“Sa thŭn kâo ba čhĭ hlăm brô dŭm pluh êbâo ton mtei truh kơ wăl anôk mnia mblei China, ka tĭng ôh ênoh ba čhĭ hlăm ala čar ăt lu mơh. Hnơ̆ng tŭ jăk mtei ti Dak Lak jăk êdi. Thŭn anei, hmei mâo kuôl kă blei dŭm êtuh ha mtei, hŏng ênoh mơ̆ng 200 – 350 êbâo prăk/amung.

Kluôm čar Dak Lak ară anei mâo êbeh 2.400 ha mtei, hnơ̆ng mâo giăm 66 êbâo ton. Dŭm mjeh mtei dưi ba pla lu jing mtei Dhŭng Amrĭk, mjeh mtei Thái Lan, lu ti kdriêk Ƀuôn Đon, Êa Kar, Krông Pač, Mdrak lehanăn ƀuôn prŏng Ƀuôn Ama Thuôt. Mbĭt hŏng dŭm mta mnơ̆ng lŏ hma mkăn, ana mtei hlăk mâo lu klei găl ba pla ti dŭm krĭng lăn čuah, krĭng lăn bazan hŏng lăn tlit ti Dak Lak, srăng đru bi lu jơr mnơ̆ng pla lehanăn mđĭ hnư hrui wĭt kơ ƀĭng ngă lŏ hma./.