Yua kdrăp mrâo hlăm đang durian, Lê Văn Thành ti să Ea Yông, kdriêk Krông Pač, čar Dak Lak amâo mâo lŏ rŭng ôh kơ klei krih êa, pruê hbâo, amâodah dŭm hruê nao dlăng đang pla mjing. Ară anei ñu mâo klei hơĭt kyua thâo hnơ̆ng ap msah, klei čiăng êa krih, mmông mă bruă…dưi čih yap leh anăn hưn hlăm đĭng blŭ.

Lê Văn Thành brei thâo, dưi ksiêm dlăng hnơ̆ng ap msah, leh anăn krih êa mơ̆ng kbưi, đang durian êbeh 3 ha mơ̆ng ñu ăt adôk mtah siam, wăt kơ yan adiê amâo mâo găl:

 “Mâo kdrăp anei krih êa ênưih hĭn, yua kdrăp anei pô thâo hlăm lăn kƀah ya mta, ya hƀâo pô pruê, êa djăp mơh amâodah mâo hdră mă bruă djŏ hĭn”.

Bi H’ Roda Ayun ti să Ea Kêñ, kdriêk Krông Pač brei thâo, êjai thâo klei čuăn kơ hnơ̆ng tŭ jăk ƀrư̆ hruê ƀrư̆ lu, ƀĭng ngă lŏ hma srăng bi mlih čiăng găl guôp. Gŏ sang ñu ƀrư̆ ƀrư̆ bi mlih mơ̆ng klei pla mjing hđăm jing pla hŏng hdră thâo mĭn. Dŭm kdrăp čŏng bi ngă bruă msĕ si: krih aruăt êa, čŏng pruê hbâo, mtrang mngač hŏng pil yang hruê… đru kơ ñu mdul ƀiă ai kriê dlăng, bi hrŏ êa krih, hbâo pruê, mnơ̆ng yua.

Hluê si H’ Roda Ayun, ênoh bi liê êlâo ăt yuôm ƀiădah dưi ba wĭt boh tŭ dưn, boh nik hlăm hdră čiăng kơ klei mkra mjing mtah – ba yua mtah ară anei.

 “Pla mjing kphê thâo mĭn amâo djŏ knŏng đru bi hrŏ êwa čhŏ ƀiădah lŏ răng mgang lăn, akŏ êa leh anăn wăl hdĭp mda. Mnuih ƀuôn sang ăt mâo boh mnga leh anăn dưi răng mgang klei suaih pral pô leh anăn yang ƀuôn.”

Hŏng hnơ̆ng prŏng hĭn, Êpul hgŭm bruă lŏ hma doh kdriêk Krông Pač, čar Dak Lak dưn yua klei mrâo mrang mrô kơ êbeh 200 ha durian Vietgap. Mai Đình Thọ, khua êpul gơ̆ng kiă kriê êpul hgŭm bruă brei thâo, klei bi mguôp mkra mjing dưn yua kdrăp mrô amâodah djŏ knŏng mđĭ ênoh mnơ̆ng dhơ̆ng ƀiădah lŏ mkŏ mjing ênoh mrâo kơ durian mơ̆ng bruă bi klă mơ̆ng bruă mkra mjing. Anăp anei, Êpul hgŭm bruă srăng mdưm mrô QR kơ grăp đang pla mjing čiăng kriê dlăng hlăm tur knơ̆ng mrô, đru tui duah phŭn agha, bi klă anôk leh anăn bi ktlah mdê bi phŭn durian. Hluê anăn, mđĭ klei đăo knang hŏng phung blei ba yua, mđĭ ênoh mnơ̆ng dhơ̆ng.

Mai Đình Thọ, brei thâo

 “Kdrăp mrô đru kơ klei hưn klă mngač hĭn. Grăp đang pla mjing, grăp phŭn mâo anăn mdê mdê, dưi tui duah bruă kriê dlăng, mmông pla…Pô blei ba yua ênưih thâo kral mnơ̆ng jăk amâodah hơăi. Dŭm anôk bruă kriê dlăng ăt ênưih ktuê dlăng hĭn”.

Čiăng bi lar hĭn boh tŭ dưn klei mlih mrô hlăm bruă lŏ hma, Nguyễn Thiên Văn, k’iăng khua bruă sang čư̆ êa čar Dak Lak brei thâo:

Bruă lŏ hma ăt jing bruă phŭn, mâo hlăm brô 1/3 bruă duh mkra Dak Lak. Kyuanăn, dhar bruă lŏ hma čŏng pô hâo hưn, đru kơ ƀĭng ngă lŏ hma leh anăn knơ̆ng bruă hlăm klei mlih mrô hlăm bruă mkra mjing, mnia mblei, ba čhĭ mnơ̆ng dhơ̆ng. Truh kơ ară anei, lu ƀĭng ngă lŏ hma yua hdră pla mjing mrâo mrang, mđĭ hĭn bruă kriê dlăng leh anăn ktuê dlăng bruă mkra mjing. Bi hŏng klei mnia mblei, lu mnơ̆ng dhơ̆ng OCOP leh anăn boh mnga êdah êdu dưi ba hlăm anôk mnia mblei điện tử amâodah hla pŏk yang ƀuôn čiăng hưn mdah, čhĭ online.

 “Čar dôk ngă dŭm hdră êlan đru, hlăm anăn mâo dưn yua kdrăp mrâo, mlih mrô hlăm bruă mkŏ mjing anăn knăl, mkŏ mjing mrô krĭng pla mjing, dưn yua kdrăp mrâo mrang mrô. Mơ̆ng anăn đru kơ anăn knăl boh mnga ti čar Dak Lak ƀrư̆ hruê ƀrư̆ mđĭ hnơ̆ng, ăt msĕ mơh dưi mâo ênoh, ba wĭt boh tŭ dưn kơ ƀĭng ngă lŏ hma leh anăn knơ̆ng bruă”.

Mlih mrô dôk ƀrư̆ ƀrư̆ bi klă bruă klam kmeh gơ̆ng hlăm bruă mđĭ ênoh boh mnga, pŏk mlar anôk ba čhĭ leh anăn mtrŭt mđĭ klei đĭ kyar bruă duh mkra krĭng ƀuôn sang ti Dak Lak. Klei bi mguôp kjăp plah wah bruă sang čư̆ êa, knơ̆ng bruă leh anăn mnuih ƀuôn sang srăng jing mta bi klă čiăng mkŏ mjing bruă lŏ hma mrâo mrang, hơĭt kjăp leh anăn ñŭ kma./.