Dŭm hrue hŏng anei, Võ Đình Việt, ti alŭ Lạc Nghiệp, să Tu Tra, kdriêk Đơn Dương, čar Lâm Đồng msĕ si dôk ti dlông pui hlơr, kyuadah amâo mâo thâo lŏ bĭt duah prăk čiăng tla prăk mnga knơ̆ng prăk. Leh hĕ klei tlŏ vaccine kơ klei ruă bi bŏk gŭ klĭt kơ êmô pia Navet – LpVac mơ̆ng knơ̆ng bruă Navetco, 80 drei êmô mă êa ksâo gŏ sang ñu lĕ hlăm klei ruă tian eh sơăi. Hlăm anăn, mâo 11 drei djiê leh, 12 ana kđông hlŏng proh êđai, 5 drei dôk hngŭt hngui giăm, dŭm drei êmô dôk suaih, anăp ênưih lŏ tuôm hŏng klei ruă, ƀuh dlăng jing amâo mâo klei dưi lŏ mâo êa ksâo msĕ si gưl êlâo ôh. Êngao anăn, čiăng đru mdrao mgŭn kơ êmô ruă, gŏ sang ñu bi liê leh êbeh 1 êklai prăk pioh blei êa drao gŭn. Tui si Võ Đình Việt, klei luič liê mơ̆ng bruă rông êmô mă êa ksâo jing prŏng êdi, ƀiădah knơ̆ng bruă Navetco knŏng tăp ênua ba kđi mă ƀiă dhiă:

“Tui si kâo klei lŏ čiuh jing ti ênoh 50 êklăk prăk/drei hŏng êmô djiê, bi êmô ana mđai dôk kđông proh hĕ êđai snăn ba kđi 30 êklăk prăk. Kyuadah dŭm drei êmô ana mđai proh êđai, snăn amâo lŏ mâo ai dưi mkăp êa ksâo ôh, snăn ba kđĭ truh 30 êklăk prăk snăn kơh năng, lehanăn hmei srăng čhĭ hĕ êmô anăn hŏng ênoh mơ̆ng 10-15 êklăk prăk, mbĭt hŏng ênoh ba kđĭ 30 êklăk prăk snăn kơh djăp prăk hmei lŏ blei êmô mrâo lŏ mjut rông. Bi tơdah ba kđi amâo mâo truh ôh 30 msĕ hŏng ênoh leh bi êdah, snăn knŏng hmei hlŏng ruh hĕ jih yơh bruă rông êmô anei, si thâo lŏ ma bruă, ti nao paih mă prăk lŏ mjut rông”.

Hŏng ênoh čiu hnô ba kđi mâo knơ̆ng bruă Navetco bi êdah anăn, hŏng ênô mă êa ksâo djiê ba kđi jing 60.000đ/kg êmô hgăl, 70.000đ/kg êmô ana leh mđai, 80.000đ/kg êmô ana amâo mâo kđông ôh, lehanăn 85.000đ/kg êmô ana dôk kđông…  Tui si Trần Quang Huy, pô rông êmô mă êa ksâo ti alŭ Lạc Nghiệp, să Tu Tra, kdriêk Đơn Dương, hŏng ênoh čiu hnô mơ̆ng knơ̆ng bruă Navetco knŏng knar 1/3 ênoh sĭt mnuih rông êmô luič liê:

“Tuôm hŏng klei truh anei jing amâo mâo djŏ klei čiăng mơ̆ng mnuih rông êmô lehanăn knơ̆ng bruă ôh, ƀiădah tĭng kơ knơ̆ng bruă bi ksiêm dlăng, đru kơ mnuih ƀuôn sang mâo djăp prăk lŏ mjut rông êmô  ƀiă êdi mơ̆ng 70-80%, grăp tĭng tŭ klei luič liê mâo ƀiă. Bi ară anei knŏng lư hjăn kơ mnuih ƀuôn sang jing prŏng hĭn, knơ̆ng bruă ba kđi ƀiă đei, prăk tĭng tla êmô ruă, lŏ čhĭ hĕ jih êmô dôk hdĭp, kƀĭn mbĭt hŏng prăk čih hnô ăt kăn djăp rei prăk tla kơ knơ̆ng prăk, snăn ti anôk lŏ nao paih mă prăk čiăng lŏ mjut êmô rông”.

Tui si Trần Văn Hiếu, Khua êpul hgŭm phung ngă lŏ hma alŭ Bồng Lai, să Hiệp Thạnh, kdriêk Đức Trọng, Knơ̆ng bruă Navetco čoh mă hjăn ênoh čiu hnô, amâo mâo bi tĭng mkă djŏ hŏng ênoh sĭt ôh. Knŏng tĭng mă êmô mă êa ksâo mjeh dôk čhĭ ară anei jing êbeh 70 êklăk prăk/drei, êjai anăn ênoh čiu hnô hlŏng ka mâo mkrah ôh, snăn ti anôk mnuih rông êmô thâo bĭt lŏ duah prăk čiăng lŏ mjut rông êmô. Mbĭt hŏng anăn, knơ̆ng bruă knơ̆ng tĭng mơ̆ng hrue mphŭn mâo klei ruă tal êlâo hlăm êmô hlŏng truh kơ hrue      26/9/2024 jing ênoh amâo mâo năng djŏ ôh, kyuanăn truh ti wưng anei êmô ăt dôk ruă lehanăn ăt lŏ djiê nanao. Trần Văn Hiếu, lač:

“Hdră knơ̆ng bruă čiu hnô amâo mâo mkă tĭng hŏng klei djŏ ôh. Knơ̆ng bruă lač mđing hmư̆ leh klei dŭm anôk bruă mkăp mjeh êmô, snăn mnuih ƀuôn sang akâo jing bi mngač hlei êpul êya lač snăn brei bi tuôm bi klă, kyuadah ênoh blei êmô ară anei  jing yuôm snăk.  Msĕ si ti Dalat milk hŏng ênoh kah knả jing mơ̆ng 70-85 êklăk/drei; Bi knơ̆ng bruă êmô mă êa ksâo Châu Á Thái Bình Dương snăn kah knar mơ̆ng 85-86 êklăk prăk/drei. Wăt hŏng jih jang dŭm bruă mơ̆ng knŭk kna duh kơ klei mjut rông êmô mrâo anei ti kdriêk Cát Tiên (Lâm Đồng) snăn grăp drei êmô mâo ênoh mơ̆ng 75-85 êklăk prăk leh, snăn brei ƀuh amâo mâo klei êlưih ôh msĕ hŏng klei knơ̆ng bruă tĭng yap”.

 Yap truh ti mmông anei, anôk bruă djŏ tuôm čar Lâm Đồng yap leh mâo êbeh   6.800 drei êmô mă êa ksâo lĕ hlăm klei ruă leh tlŏ vaccine gang mkhư̆ klei ruă bŏk gŭ klĭt Navet – LpVac mơ̆ng knơ̆ng bruă Navetco mkăp, hlăm anăn mâo giăm 500 drei êmô djiê. Čiăng dưi đru mnuih rông êmô, hrue 20/8 leh êgao, knơ̆ng bruă sang čư̆ êa čar Lâm Đồng mâo leh asăp mtrŭn mkŏ mjing êpul đru kơ bruă čiu hnô kơ mnuih ƀuôn sang tuôm hŏng klei êmô ruă kyua tlŏ vaccine gang mkhư̆ klei ruă bŏk gŭ klĭt kơ êmô. Siămdah, mơ̆ng anăn hlŏng kơ ară anei, êpul mkŏ mjing bruă anei ăt ka mâo mơh bruă ngă hlăm klei đru čiu hnô kơ mnuih ƀuôn sang luič liê./.