Grăp aguah mnuih ƀuôn sang mơ̆ng ƀuôn Vơng Chép, Keo, Tung Ke hlăm să  Ayun, kdriêk Čư̆ Sê lŏ bi puh êmô hlăm kdrăn. Truh tlam, digơ̆ lŏ wiêng êmô wĭt kơ war krư̆ hĕ. Tui si Đinh Suyn – Khua êpul rông êmô ti ƀuôn Keo, să Ayun, mnuih ƀuôn sang êlâo dih ăt mâo leh mơh klei đru hlăm bruă rông êmô, ƀiădah kyua klei bi rông hjăn hliê mdê bi gŏ sang. 2 thŭn kơ anei kơh mnuih ƀuôn sang thâo bi hgŭm đru nao bi răng kriê êmô hlăm kdrăn. Đinh Suyn brei thâo, hdră bi đru lehanăn mâo bruă mkŏ mjing jăk hlăm klei răng kriê čiăng kơ mnuih ƀuôn sang mă klei hriăm, mâo klei mơak bi đru mbĭt;

 “Mơ̆ng leh mâo knŭk kna đru mbha êmô ana mđai snăn kâo gĭr dlăng kriê, wiă rơ̆k kơ êmô ƀơ̆ng. Kyua êmô ana hlăk dôk kđông, anăp dơ̆ng mđai leh snăn kâo mơak snăk. Êmô mđai pô lŏ mjut rông, mgi dih dah lŏ mđai lu hĭn snăn kơh truh kơ čhĭ, pioh blei hbâo pruê, êa drao kơ mnơ̆ng pla”.

 Bi Kpui Đe – Khua êpul rông êmô ana mđai ti ƀuôn H’Vawk, să Ayun ăt msĕ mơh. Ñu brei thâo, mơ̆ng hlăk mrâo rông, ară anei ñu ƀuh mơak êdi:

 “Kâo mâo ai tiê mơak snăk, êlâo dih amĭ ama amâo mâo sa tŭ mta mnơ̆ng ôh. Truh kơ ară anei, knŭk kna mbha brei êmô lehanăn êmô mđai leh mơh, pô gĭr rông dlăng kriê bi jăk. Leh wiă mdiê mă adrăng pioh mčiêm êmô hlăm yan bhang, lehanăn mbha adrăng pô kơ mnuih ƀuôn sang, pô mă jih ba wĭt amâo mâo čuh adrăng ôh”.

Să Ayun mâo êbeh 95% ênoh mnuih jing djuê ƀiă, lehanăn klei hdĭp mda dôk hlăm klei dleh dlan kyua lăn ala leh sah mba, lehanăn adiê amâo mâo jăk, bruă rông êmô ana mđai ba leh klei čang hmăng mrâo. Hlăm dua thŭn êgao, buă rông êmô ana mđai mâo đru leh 65 gŏ sang ƀun, lehanăn giăm ƀun hlăm ênoh 327 gŏ sang dleh dlan ti să Ayun. Truh ară anei, dŭm drei êmô mâo mbha mơ̆ng thŭn 2023 dơ̆ng mđai leh, ba wĭt ênoh tŭ dưn mrâo, lŏ mđĭ hĭn klei bi jưh knang kơ mnuih ƀuôn sang.

Phạm Ngọc Tuấn – K’iăng khua knơ̆ng bruă sang čư̆ êa să Ayun, kdriêk Chư Sê, Gia Lai lač: Đru kơ klei rông êmô jing amâo mâo djŏ knŏng đru kơ mnuih ƀuôn sang lŏ mâo thiăm bruă ngă, ƀiădah mjuăt bi hriăm mnuih ƀuôn sang mâo klei thâo uêñ. Dŭm drei êmô suaih pral, dŭm klei mơak leh mâo êđai êmô bi êdah leh klei jăk, djŏ hdră êlan.

 “Leh 2 thŭn mâo ngă 3 mta bruă rông êmô ana mđai, ƀrư̆ ƀrư̆ leh mâo boh tŭ dưn. Leh mâo mŭt hlăm êpul đru bi dlăng kriê, snăn mnuih ƀuôn sang mâo klei thâo săng, bi đru hlăm klei rông êmô, mơ̆ng anăn mâo ba wĭt klei tŭ dưn jăk hĭn mkă hŏng dŭm thŭn êlâo, hŏng klei bi rông hjăn mdê bi gŏ sang. Leh dua thŭn êgao ngă klei bi đru hlăm bruă rông êmô, snăn mnuih ƀuôn sang thâo săng, rông êmô jăk mđai kñăm bi hơĭt klei hdĭp mda”.

Mbha êmô ana mđai kơ mnuih djuê ƀiă pioh rông kñăm čiăng mđĭ hĭn ênoh mâo ba wĭt, jing leh bruă mâo ngă mơ̆ng sui thŭn leh ti čar Gia Lai lehanăn ƀuh mâo klei tŭ jing jăk. Êngao kơ êmô mơ̆ng knŭk kna mbha, lu anôk bruă êpul êya bruă ăt mđup brei êmô ana mđai kơ mnuih ƀuôn sang đru bi hrŏ klei dleh dlan kơ mnuih ƀuôn sang. Dŭm klei mlih mrâo hlăm klei mĭn lehanăn bruă ngă, ƀuh leh klei tŭ jing ti să Ayun, kdriêk Čư̆  Sê brei ƀuh, klei bi hmô anei mơ̆ng Gia Lai hlăk dôk bi kjăp hĭn. Jih jang êmô rông jing suaih jăk, truh thŭn mđai nanao, amâo mâo djŏ knŏng ba wĭt ênoh prăk kăk kơ grăp gŏ sang. Ƀiădah anei jing klei yuôm bhăn kơ bruă sang čư̆ êa čar Gia Lai lŏ dơ̆ng bi lar hdră rông anei, mguôp sa kdrêč bi hrŏ klei dleh dlan kơ mnuih ƀuôn sang hlăm čar./.