Mŭt hlăm thŭn 70 ƀiădah A Thiếu, djuê ana Jrai ti ƀuôn Lung, să Ya Xiêr, kdriêk Sa Thầy, čar Kon Tum ăt ba anăp hlăm bruă duh mkra. Ñu brei thâo thŭn 2022 tơdah bruă Đảng să mâo Hdră mtrŭn kơ bruă mkra mđĭ đang pla mjing lu mta, gŏ sang ñu ba anăp čih anăn ngă hdră đru 20 ana kneh leh anăn 50 ana durian. Čiăng găl kriê dlăng, ñu blei thiăm 50 ana durian leh anăn bi liê krih êa mkriêt mkriêm. Hlue si A Thiếu, đảng viên êbeh 30 thŭn, ñu bi hmô ngă êlâo leh anăn  ngă jăk čiăng kơ mnuih ƀuôn sang hlue ngă:

“Kâo jing sa čô Đảng viên, ară anei 30 thŭn đảnh viên leh, kâo 70 thŭn, mơ̆ng Bruă Đảng să mâo hdră mtrŭn bi mlih ana pla mjing ktrâo lač kơ gŏ sang kâo ăt msĕ mơh mnuih ƀuôn sang pla durian, măk ka čiăng kơ mnuih ƀuôn sang mkra mđĭ klei hdĭp, kpưn đĭ kơ mdrŏng, pô jing sa Đảng viên ăt bi hmô čiăng kơ mnuih ƀuôn sang hriăm leh anăn tui hriăm, hlue ngă hdră êlan mơ̆ng đảng leh anăn knŭk kna, gŏ sang adôk dleh dlan snăn alŭ wăl srăng đru kơ mnuih ƀuôn sang pla durian leh anăn thâo hdră mnêč kriê dlăng si ngă čiăng mâo hnơ̆ng mkra mjing jăk, hơĭt kjăp klei hdĭp kơ mnuih ƀuôn sang”.

Să Ya Xiêr, kdriêk Sa Thầy mâo êbeh 1600 gŏ êsei jing mnuih djuê ƀiă. Čiăng kơ bruă mkra mđĭ đang pla mjing mâo boh tŭ hĭn, bruă Đảng să gĭt gai dŭm êpul bruă Đảng bi hgŭm hŏng knuă druh să ktuê dlăng grăp gŏ êsei, hlăm anăn mđing kơ gŏ êsei ƀun, gŏ sang knŭk kna dlăng ba, gŏ sang mnuih djuê ƀiă, ƀiădah brei rơ̆ng djăp klei găl kơ lăn ala leh anăn êa krih kơ ana pla mjing. Hŏng hdră ngă naei hlăm 3 thŭn êgao să Ya Xiêr mtrŭt mjhar leh mnuih ƀuôn sang mkra mđĭ êbeh 54 ha đang pla mjing lu mta jing pla ana boh kroh, lu jing ana durian. Nguyễn Văn Hậu, K’iăng Khua Knơ̆ng bruă sang čư̆ êa să Ya Xiêr, brei thâo:

“Mâo lu đang pla mjing tŭ jing leh anăn dŭm gru hmô mâo să mkŏ mjing kơ mnuih ƀuôn sang nao tui hriăm. Leh anăn dŭm gŏ êsei ngă jăk lŏ mtô lač kơ dŭm gŏ êsei mkăn čiăng kriê dlăng jăk hĭn. Êngao kơ bruă mtrŭt mjhar klei thâo săng mnuih ƀuôn sang dưi mđĭ. Ana mâo ênoh yuôm bruă duh mkra, Knŭk kna đru snăn, ktrâo lač hdră mnêč snăn mnuih ƀuôn sang mđing kriê dlăng.”

Čiăng mâo klei găl đru mjeh ana pla mjing boh kroh kơ mnuih ƀuôn sang ti 11 să, wăl krah mkra mđĭ đang pla mjing, kdriêk Sa Thầy iêô mkrum leh mơ̆ng lu klei găl. Hjăn mơ̆ng thŭn 2023 truh ară anei mơ̆ng phŭn prăk ala ƀuôn giăm 2 êklai prăk, kdriêk blei êbeh 15 êbâo ana mjeh durian leh anăn măk ka đru kơ mnuih ƀuôn sang. Mbĭt anăn bruă sang čư̆ êa alŭ wăl ăt bi mguôp hŏng dŭm hdră čiăng mâo mjeh boh kroh đru kơ mnuih ƀuôn sang mkra mlih đang pla mjing. Hlăm 4 mlan akŏ thŭn 2024 mâo 177 gŏ êsei mnuih djuê ƀiă hlăm kdriêk mkra mlih 52 ha đang pla mjing čiăng pla ana boh kroh. Nguyễn Thị Luyến, K’iăng Khua adŭ bruă lŏ hma leh anăn mđĭ kyar krĭng ƀuôn sang kdriêk Sa Thầy, brei thâo:

 “Kdriêk pŏk ngă leh lu hdră bruă, bi mguôp lu phŭn prăk, mơ̆ng dŭm hdră kñăm ala čar, prăk duh mkra đru bi mklă dŭm bruă mtrŭt mjhar mnuih ƀuôn sang, ba dŭm gru hmô mjeh mrâo kơ mnuih ƀuôn sang, mđing kơ mnuih djuê ƀiă, Mđĭ ênoh yuôm bruă duh mkra kơ mnuih ƀuôn sang ti alŭ wăl snăn kdriêk pŏk ngă leh ênhă ana durian jing lu, mnuih ƀuôn sang hơ̆k mơak mđing leh anăn kriê dlăng bi jăk”.

 Leh 3 thŭn pŏk ngă Hdră 07 kơ klei mkra mđĭ đang pla mjing, kdriêk Sa Thầy mâo leh klei bi mlih hlăm bruă mđĭ kyar ênhă ana boh kroh. Mguôp điêt truh kơ prŏng, tơdah ênhă ana boh kroh mơ̆ng kdriêk hlăm knhal jih thŭn 2020 mrâo mâo 285 ha snăn truh knhal jih thŭn 2023 Sa Thầy mđĭ kyar giăm 1600 ha, hlăm anăn hjăn durian êbeh 660 ha. Nguyễn Minh Tuấn, Khua dlăng bruă Đảng kdriêk Sa Thầy, bi mklă:

“Hŏng mnuih ƀuôn sang djuê ƀiă hgŭm mkra mđĭ đang pla mjing ti alŭ wăl kdriêk, boh nik hgŭm hlăm gru hmô pla ana boh kroh tal êlâo ƀuh jing tŭ dưn leh anăn mnuih ƀuôn sang ară anei akâo blei lu. Thŭn 2025 lŏ dơ̆ng pŏk ngă đru kơ mjeh mđĭ đang pla mjing, mơ̆ng anăn đru kơ mnuih ƀuôn sang bi mlih klei mĭn, hdră ngă gĭr ktưn kpưn đĭ kơ mdrŏng”.

Hŏng hdră mkra mđĭ đang pla mjing, klei đru, ktrâo lač kơ mnuih ƀuôn sang pla ana boh kroh, mđĭ kyar bruă duh mkra gŏ sang, Bruă Đảng kdriêk Sa Thầy mâo leh klei gĭt gai klă klơ̆ng čiăng mđĭ hnơ̆ng jăk leh anăn ênoh đang pla mjing. Truh ară anei kdriêk mâo leh 2 gŏ êsei dưi mkăp mrô krĭng pla mjing durian hŏng ênhă êbeh 31 ha.  Bruă pla mjing ana boh kroh hlue si hdră doh, kjăp. Kơ sui, bruă sang čư̆ êa kdriêk Sa Thầy dôk iêô jak anôk bruă duh mkra bi liê mkŏ mjing sang mkra mjing ana boh kroh kñăm mjing klei bi hgŭm plah wah bruă mkra mjing leh anăn ba čhĭ mnơ̆ng dhơ̆ng lŏ hma./.