Hlăm hrue tal êlâo leh bi mŭt mbĭt, phung khua kiă kriê dŭm êpul êya hlăm knơ̆ng bruă lŏ hma lehanăn wăl hdĭp mda čar Daklak mrâo kiă kriê leh klei bi kƀĭn čiăng jao bruă, ruah mdưm bi sa hnơ̆ng hdră êlan bi hgŭm bruă. Dŭm mta bruă phŭn mâo ksiêm kơ dŭm mta bruă adôk ka leh, mghaih msir tal êlâo mtam, lŏ dơ̆ng đru hlăm bruă duh mkra pla mjing, bruă kiă kriê ngăn dŏ wăl hdĭp mda, rơ̆ng dưi kiă kriê jih jang bruă, amâo mâo lĕ hlăm klei dleh kpăk.

   Mai Vũ Quốc Bảo, knuă druh kiă kriê hnơ̆ng jăk mơ̆ng bruă lŏ hma, dliê kyâo, hdang kan – êlâo dih mă bruă ti čar Phú Yên (hđăp), lač:

“Mprăp kơ klei mă bruă knuă, hrue tal êlâo mă bruă ti anôk mrâo, mâo leh klei mprăp mơ̆ng êpul bruă, mjing brei klei găl kơ anôk dôk, klei êrô êbat, lehanăn anôk mă bruă, snăn ară anei kâo kčưm mtam kơ klei mă bruă, bi djŏ hŏng klei phung khua kiă kriê jao, lehanăn ngă bi djŏ hŏng bruă čuăn kơ pô”.

Đỗ Tuấn Hưng, Khua anôk bruă kiă kriê hnơ̆ng jăk bruă lŏ hma, dliê kyâo, kan hdang čar Daklak, brei thâo, leh klei bi mŭt mbĭt lŏ mâo thiăm 8 čô knuă druh mă bruă mơ̆ng Phú Yên hriê kơ Daklak mă bruă. Truh ară anei, digơ̆ hơĭt leh anôk dôk, mprăp leh ai tiê dơ̆ng hlăm klei mă bruă mrâo.

“Hmei bi kƀĭn leh kơ klei mă bruă, jao bruă klă mngač kơ grăp čô truh hŏng dŭm anôk bruă, čiăng păn kjăp bruă knuă mdê mdê, bruă knuă hlăm 6 mlan knhal jih thŭn, amâo mâo lŏ bi krư̆i ôh”.

Đặng Thị Thuỷ, K’iăng khua knơ̆ng bruă lŏ hma lehanăn wăl hdĭp mda čar Daklak lač, kluôm dhar bruă srăng bi hgŭm kjăp, pral mkŏ wĭt jih jang hdră mă bruă, nao hlăm klei mă bruă hơĭt kjăp, lehanăn mđing mghaih msir jih jang bruă, hdră mđĭ kyar duh mkra ala ƀuôn hlăm čar leh klei bi mŭt mbĭt:

“Hmei srăng đru hlăm bruă mkŏ mjing hdră êlan mđĭ kyar bruă lŏ hma, dưn yua jih klei găl hŏng lu mta mnơ̆ng dhơ̆ng hdĭp pioh mđĭ kyar bruă lŏ hma, lehanăn răng mgang wăl hdĭp mda mtah doh, kjăp kơ čar mrâo. Lehanăn anei jing wưng yuôm bhăn lŏ mkŏ wĭt bruă lŏ hma – wăl hdĭp mda hlue hŏng ênuk mrâo lehanăn jĕ giăm hŏng wăl hdĭp mda doh mtah”./.