Hlăm sa bruă kriê dlăng mrâo mrang, mđing hmư̆ klei mnuih ƀuôn sang amâo djŏ knŏng jing klei đua klam ôh, ƀiădah lŏ jing klei găl ba anăp čiăng kơ hdră tă hdră êlan djŏ leh anăn mkŏ hlue ngă tŭ dưn. Kyua grăp klei blŭ phung bi ala kơ mnuih ƀuôn sang amâo djŏ knŏng lač kơ sa klei klă klơ̆ng ôh, ƀiădah lŏ lač kơ klei đăo knăl kơ klei dleh dlan bruă duh mkra- ala ƀuôn, klei kƀah hlăm hdră hlue ngă hdră êlan, boh nik klei anăn srăng mâo tơdah amâo hmao ƀuh leh anăn hmao msir mgaih.

 Hlăm boh klei ala čar drei dôk mđĭ ktang bruă mkŏ mjing Knŭk kna yang ƀuôn ngă phŭn leh anăn mlih mrô ala čar, bruă klam mơ̆ng Bruă mđing hmư̆ klei  mnuih ƀuôn sang čiăng amâo djŏ knŏng hlăm klei mă hră mơar, ba klei akâo amâodah čih klei mnuih ƀuôn sang, phung bi ala kơ mnuih ƀuôn sang lač ôh.  Khua Bruă kƀĭn ala lu blư̆ mñă klă brei bi mlih klei mĭn thâo kơ boh klei, bi mklă hnưm klei mâo mơ̆ng boh sĭt leh anăn kčĕ hdră msir êlâo kơ klei amâo jăk jing klei truh prŏng hlăm ala ƀuôn.

Čiăng dưi ngă klei anei, Khua Bruă kƀĭn ala Trần Thanh Mẫn mtă: Bruă mđing hmư̆ klei mnuih ƀuôn sang čiăng brei dưi mlih mrâo kluôm kơ klei mĭn leh anăn hdră ngă bruă, păn kjăp hnưm klei mĭn, klei mnuih ƀuôn sang čiăng; mbĭt anăn jing kdrăp hưn brei răng kơ hdră êlan leh anăn hnơ̆ng mkă hnơ̆ng jăk kriê dlăng ala čar.

Bruă mđing hmư̆ klei mnuih ƀuôn sang čiăng êlam hĭn, amâo djŏ knŏng dôk hlăm klei drông mnuih ƀuôn sang ôh, msir mgaih hră mơar, mơĭt klei akâo. Kâo mtă kơ bruă mđing hmư̆ klei mnuih ƀuôn sang čiăng jing hdră ƀuh hnưm ai tiê mnuih ƀuôn sang, jing klei hưn brei răng kơ hdră êlan, jing hnơ̆ng mkă bruă kriê dlăng ala čar. Kâo mtă, amâo dưi brei klei mnuih ƀuôn sang čiăng jing êdei kơ klei mnuih ƀuôn sang ngêñ. Brei pô mđing hmư̆, păn kjăp boh klei leh anăn mâo klei blŭ êlâo. Tal dua jing wĭt lač klei phung bi ala kơ mnuih ƀuôn sang brei klă sĭt hĭn. Ênoh wĭt lač lu jing năng čih yap, ƀiădah hnơ̆ng mkă knhal tuč amâo djŏ jing hdră mơar wĭt lač ôh, ƀiădah bruă mâo dưi msir mgaih mơ̆, mnuih ƀuôn sang ƀuh djŏ mơ̆, kpă mơ̆?

 Boh sĭt hlăm wưng êgao brei ƀuh, lu hdră êlan prŏng tơdah ba yua hlăm klei hdĭp mâo leh lu klei hmăi êngao kơ hdră mĭn tĭng. Mâo lu klei kƀah knŏng thâo ƀuh leh mâo leh klei kčŭt hưn amâodah jing bruă lu mnuih ƀuôn sang amâo sa ai. Hlăk êjai anăn, tơdah klei kčŭt hưn mơ̆ng nah gŭ dưi mă hnưm, mblang djăp ênŭm, dưi mkra mlih mơ̆ng hnưm, lu bruă đăm brei jing klei amâo jăk ôh, bi hrŏ klei jhat kơ ala ƀuôn leh anăn luč liê klei găl.

Čiăng đăo knăl djŏ, brei mđing hmư̆ djăp ênŭm. Čiăng kơ hdră êlan dưi truh hlăm klei hdĭp, brei blŭ hrăm hŏng mnuih ƀuôn sang mơ̆ng hdră mkŏ mjing leh anăn kriê dlăng bruă hlue ngă.

Anei ăt jing klei yuôm bhăn čiăng rơ̆ng klei bi kna klei tŭ dưn plah wah Knŭk kna, mnuih ƀuôn sang leh anăn anôk bruă duh mkra, mbĭt anăn mđĭ klei sa ai ala ƀuôn.

Tơdah êlâo dih, klei tŭ dưn Bruă mđing hmư̆ klei mnuih ƀuôn sang čiăng khăng dui mkă hŏng ênoh hră mơar tŭ mă, ênoh hră mơar wĭt lač amâodah bruă dưi msir mgaih, snăn ară anei hnơ̆ng mkă dưi mđĭ truh sa hnơ̆ng kdlưn hĭn: Hnơ̆ng msir mgai klă sĭt klei mâo leh anăn klei sa mnuih ƀuôn sang. Klei mĭn anei ăt mâo Hoàng Anh Công, K’iăng Khua Anôk bruă mđing hmư̆ klei mnuih ƀuôn sang čiăng leh anăn ksiêm dlăng mơ̆ng Bruă kƀĭn ala mñă klă:

“Hnơ̆ng čuăn yuôm bhăn hĭn mơ̆ng Bruă mđing hmư̆ klei  mnuih ƀuôn sang čiăng jing klei mnuih ƀuôn sang sa ai. Ya bruă ngă, brei drei ba klei tŭ dưn kơ mnuih ƀuôn sang, ba klei tŭ dưn kơ ala čar. Leh anăn tơdah mnuih ƀuôn sang sa ai snăn klei anăn jing klei čuăn yuôm bhăn hĭn hmei mđing truh.”

 Tơdah klei blŭ mnuih ƀuôn sang mâo mđing hmư̆ leh anăn klei akâo djŏ klă dưi hmao msir mgaih, klei mnuih ƀuôn sang đăo knang kơ Đảng, Knŭk kna leh anăn dŭm anôk bruă mnuih ƀuôn sang ruah srăng dưi mkra mđĭ. Klei Khua Bruă kƀĭn ala čiăng brei ƀuh: mlih mrâo Bruă mđing hmư̆ klei  mnuih ƀuôn sang čiăng jing mlih mrâo hdră kriê dlăng ala čar hlue si hdră mă mnuih ƀuôn sang, anôk bruă duh mkra jing phŭn./.