Ti lăn dap kngư kphê yơh jing ana pla phŭn mâo klei čiăng kơ êa lu hĭn êdi hlăm yan bhang. Wưng anei mnuih pla kphê hlăk dôk krih êa gưl ta 2, lehanăn tal 3. Lu ênhă kphê ka ƀuh mơh klei bi knăl jing kƀah êa, ƀiădah klei kƀah êa, klei amâo mâo djăp êa krih kơ kphê jing dôk ti anăp, anăn yơh jing klei mnuih pla kphê dôk hnĭng. Čiăng bi hrŏ klei luič liê kyua klei không kƀah êa hŏng đang kphê pô mâo truh 4,5 ha, Lê Văn Tâm ti să Ea Kao, ƀuôn prŏng Ƀuôn Ama Thuôt lač, ñu duh bi liê leh hdră krih êa hŏng klei mkiêt mkriêm, krih hŏng klei thâo mĭn kơ đang kphê pô:

“Hlăm đang hma hmei mâo mkra leh truh kơ 3 ha krih êa ti hnơ̆ng bi thư̆. Klei krih êa snei, knŏng sa đĭng, 1 béc krih kơ 1 phŭn kphê, snăn dưi mkriêm êa lu êdi, lehanăn ai duh kơ bruă kăn lu rei”.

        Mbĭt hŏng kphê, ana boh durian ăt čiăng kơ êa lu mơh. Khădah klei čiăng kơ êa mơ̆ng ana boh durian jing ƀiă, ƀiădah ênoh blư̆ krih jing lu, kyuanăn mnuih pla mjing mprăp hdră krih bi djŏ mơh, čiăng kơ ana boh bi mnga lehanăn đuôm adiê, lehanăn rông adiê boh hŏng klei jăk. Nguyễn Minh Tâm, ti să Ea Yông, kdriêk Krông Pač, Dak Lak yăl dliê:

“Ară anei krĭng anei djăp leh êa mâo dŭm knơ̆ng êa lehanăn mnuôr mbông êa kjăp. Gŏ sang hmei yua êa ktir, mâo mnuih yua êa kdơ̆ng. Ară anei hlăk mkhư̆ êa mâo 4-5 hrue lehanăn lŏ dơ̆ng krih, grăp blư̆ krih knŏng hlăm 30’đuič amâo mâo krih lu êa ôh”.

         Tui si Nguyễn Công Hạnh, K’iăng khua anôk bruă kiă kriê knơ̆ng mbông êa Daklak hưn, adiê hlăm yan bhang anei hlơr h’uh hĭn hŏng yăng đar mlan hlăm thŭn. Dôk đăo knăl klei kƀah êa jing prŏng hĭn. Ară anei hnơ̆ng êa dôk kdơ̆ng hlăm dŭm boh knơ̆ng mbông êa hlăm čar jing ƀiă hĭn hŏng ênoh êa yăng đar. Knơ̆ng bruă mâo leh hdră mdrơ̆ng hŏng klei kƀah êa.

“Čhuang hlăm akŏ yan bhang, snăn knơ̆ng bruă kiă kriê mtam, klei bi ksiêm jih jang ênoh êa pioh kơ mnuih ƀuôn sang yua, lehanăn mâo hdră krih êa hŏng klei mkiêt mkriêm hĭn. Mbĭt hŏng anăn mâo mơh hdră mdrơ̆ng hŏng klei kƀah êa ti dŭm anôk kƀah êa hĭn kơ knhal tuič yan, kñăm mâo hdră mprăp”.

          Kluôm čar Daklak ară anei mâo 785 boh knơ̆ng kdơ̆ng êa, hŏng hnơ̆ng dưi mgơ̆ng êbeh 650 êklăk m3 êa. Hŏng klei bi kna êa jua hŏng dŭm hdră mrâo mrang, lehanăn bi mlih mnơ̆ng pla mjing, bi mlih mjeh pla mjing, mâo hdră pla mjing bi djŏ, krih êa hŏng klei mkriêm... sĭt yơh srăng dưi djăp êa krih kơ êbeh 83% ênhă mnơ̆ng pla čiăng kơ êa krih. Mai Trọng Dũng, K’iăng khua knơ̆ng bruă lŏ hma čar Daklak lač:

“Knơ̆ng bruă lŏ hma hgŭm leh hŏng djăp alŭ wăl, êpul êya bruă mâo hdră mkuôm pioh êa ti dŭm boh knơ̆ng kdơ̆ng êa, lehanăn mkăp djăp êa krih kơ mnơ̆ng pla hlăm yan bhang không anei”.

Wưng leh êgao, knơ̆ng bruă lŏ hma, djăp alŭ wăl mâo leh klei đru kčĕ kơ knơ̆ng bruă sang čư̆ êa čar Daklak hlue ngă dŭm hră mtrŭn mơ̆ng gưl dlông, lehanăn alŭ wăl kơ bruă knơ̆ng mbông êa. Lehanăn, bi lar, mtă mtăn brei thâo mlkiêt mkriêm djă yua êa, mâo nanao klei nao ksiêm knơ̆ng êa, mkă hnơ̆ng dŭm hnơ̆ng êa dôk mâo hlăm knơ̆ng, čiăng mâo hdră êlan kđăl lehanăn pŏk êa krih mđoh kơ mnơ̆ng pla bi djŏ guôp. Mơ̆ng anăn, jih jang bruă nah gŭ kơ lŏ hma mâo duh bi liê kjăp, ƀrư̆ ƀrư̆ ba yua hdră mrâo mrang hlăm klei djă yua êa, pioh duh kơ bruă lŏ hma pla mjing, kơ klei hdĭp mda ala ƀuôn krĭng lŏ hma, mdrơ̆ng hŏng klei yan adiê amâo mâo jăk, thâo mgăl bi djŏ hlăm bruă pla mjing guôp hŏng klei bi mlih yan adiê. Thŭn 2024, bruă lŏ hma čar Daklak mâo leh bruă čuăn, jih jang knơ̆ng mbông êa mkăp bi djăp êa kơ êbeh 84,45% ênhă pla mjing čiăng kơ êa krih./.