Truh ti knhal jih thŭn 2023, čar Dak lak mâo giăm 32.800 ha ana durian, hlăm anăn mâo 15.852 ha dôk hlăm wưng hrui pĕ, hnơ̆ng boh mnga mâo êbeh 281 êbâo tôn, đĭ êbeh 90 êbâo tôn mkă hŏng thŭn 2022, knar hŏng hnơ̆ng đĭ 50%. Yap hlăm lăn čar, Dak Lak dôk ba anăp kơ ênhă pla mjing leh anăn hnơ̆ng đĭ kyar, dôk tal 2 kơ hnơ̆ng boh durian. Mbĭt hŏng boh tŭ bruă duh mkra, bruă pla mjing drian lŏ ba wĭt kơ čar Dak Lak dŭm boh tŭ dưn hlăm ai tiê, êjai mkŏ mjing tŭ jing knăm mơak durian gưl tal 1 ti kdriêk Krông Pač leh anăn dôk mprăp mkŏ mjing knăm mơak durian gưl tal 2.

Bi ala Knơ̆ng bruă lŏ hma leh anăn mđĭ kyar krĭng ƀuôn sang Dak Lak hâo hưn kơ bruă pla mjing durian mơ̆ng čar, Nguyễn Hắc Hiển, k’iăng khua kiă kriê anok bruă pla mjing leh anăn răng mgang ana pla mjiing čar Dak Lak brei thâo, êngao kơ klei bi mguôp ƀrư̆ hruê ƀrư̆ klă sĭt hĭn plah wah ƀĭng ngă lŏ hma, knơ̆ng bruă,  dŭm anôk bruă ksiêm duah leh anăn dŭm anôk bruă kriê dlăng mơ̆ng knŭk kna, čiăng mđĭ kyar kjăp bruă pla mjing durian, Dak Lak mkŏ mjing leh dŭm êpul nao hriăm mơ̆ng lăn čar tač êngao, hlăm anăn mâo Thailand, ala čar mnia mblei durian lu hĭn dlông rŏng lăn. Hluê si Nguyễn Hắc Hiển, hlăm lu klei hriăm dưi dưn yua hlăm alŭ wăl, Dak Lak srăng dlăng yuôm bhăn dŭm klei hriăm mơ̆ng bruă kriê dlăng hnơ̆ng tŭ jăk mnơ̆ng dhơ̆ng:

Ară anei Thailand mđĭ leh hnơ̆ng čuăn mta krô mơ̆ng durian mơ̆ng 32% jing 35%. Mŭt hlăm wưng hrui pĕ, djăp anôk ti dŭm krĭng pla mjing, dŭm đang pla mjing srăng ngă bruă ksiêm dlăng hnơ̆ng tŭ jăk mơ̆ng mnơ̆ng dhơ̆ng. Êngao kơnăn, dŭm anôk bruă kriê dlăng mơ̆ng knŭk kna ăt ngă bruă mă mta ksiêm mkă durian ti dŭm krĭng pla mjing leh anăn anôk đung hruh, čiăng dlăng kơ hnơ̆ng tŭ jăk durian mâo ênŭm leh mơh. Anei jing bruă yuôm bhăn êdi, mâo China tŭ yap êdi.

Khădah durian jing leh sa hlăm dŭm ana pla mjing phŭn tŭ jing êdi, iêo jak klei duh bi liê prŏng mơ̆ng ƀĭng ngă lŏ hma leh anăn klei uêñ mĭn mơ̆ng bruă sang čư êa dŭm gưl, ƀiădah anei ăt jing bruă dôk mâo lu klei awăt, msĕ si hdră mnêč pla mjing, kriê dlăng, hrui pĕ ăt dôk mâo klei kƀah, bruă kriê dlăng mrô krĭng pla mjing, mrô đŭng hruh dôk tuôm hŏng lu klei dleh kpăk, klei bi mmiă mnia mblei, bi rai klei kuôl kă ăt mâo nanao ti dŭm krĭng pla mjing durian mơ̆ng čar hlăm grăp wưng hrui êmiêt. Thŭn 2023, durian Dak Lak mâo ênoh mnia mblei hlăm brô 16 êbâo êklai prăk, knar hŏng hlăm brô 660 êklăk dolar Mi, ƀiădah knơ̆ng bruă tuh tia čar Dak lak knŏng čih yap hnơ̆ng klei mnia mblei êbah 100 êklăk dolar Mi. Klei anei brei ƀuh dŭm klei găl mnia mblei klă anăp durian mơ̆ng Dak Lak jing ka găl ôh.

Ti anăp dŭm boh klei dôk jing klei kpăk kơ bruă pla mjing durian boh hŏng klei hmăng hmưi, Nguyễn Thiên Văn, k’iăng khua bruă sang čư êa čar Dak Lak brei thâo, čar srăng ruh mgaih ƀrư̆ ƀrư̆, kčưm mơ̆ng klei čŏng pô leh anăn thơ̆ng kơ bruă mơ̆ng ƀĭng ngă lŏ hma pla mjing durian:

Ti anăp jing hâo hưn kơ mnuih ƀuôn sang, boh nik hlăm krĭng kñăm pla mjing durian, kơ klei răng mgang ana pla mjing leh anăn klei doh êbăt mnơ̆ng ƀơ̆ng hŏng boh durian. Tal 2 jing mkŏ mjing mrô krĭng pla mjing leh anăn ktuê dlăng bruă pla mjing ti dŭm krĭng pla. Bi hŏng dŭm anôk đung hruh, srăng kñăm hưn mdah mkŏ mjing dŭm klei bi mguôp bruă mkra mjing, hrui pĕ, kriê pioh leh anăn ba čhĭ mnơ̆ng dhơ̆ng. Hŏng klei gĭr anei mơ̆ng čar Dak lak leh anăn klei đru mơ̆ng Phŭn bruă lŏ hma leh anăn mđĭ kyar krĭng ƀuôn sang, dŭm mta phŭn anei srăng ƀrư̆ ƀrư̆ dưi mgaih msir hlăm wưng kơ anăp./.