Hlăm đang pla mjing êbeh 1 ha mơ̆ng Lê Văn Kiệt, ti să Ea Yông, kdriêk Krông Pač, čar Dak Lak, dŭm phŭn durian 6 thŭn dôk hlăm wưng mblang mnga. Ñu brei thâo, yan adiê amâo mâo jăk kyua lu hruê êăt, mbĭt hŏng dŭm gưl hjan mklăk yan ngă kơ mnga awăt, hnơ̆ng boh đuôm ƀiă hĭn mkă hŏng thŭn êlâo. Ƀiădah, ñu ăt đăo knang kơ hnơ̆ng jak đang pla mjing kyua pla hŏng hdră sinh học, đru kơ ana đĭ hruê êđăp ênang:

 “Hŏng sa hdră pla mjing hơĭt kjăp msĕ kâo dôk ngă, amâo mâo yua êa drao, amâo mâo yua hbâo angre hŏng yan adiê anei, boh amâo mâo lu ôh ƀiădah hrô kơnăn boh durian mâo hnơ̆ng jăk hĭn mkă hŏng dŭm hdră pla mjing mkăn leh anăn amâo mâo ôh boh jhat. Anăn jing hdră hơĭt kjăp srăng tŭ ƀiă klei hmăi mơ̆ng yan adiê”.

Pla mjing hŏng hdră hơĭt kjăp amâo mâo yua êa drao mâo lu gŏ sang pla durian ti dŭm kdriêk Krông Pač, Čư̆ Mgar, Krông Hnang… mơ̆ng čar Dak Lak dưn yua hlăm dŭm thŭn giăm anei. Mnuih ƀuôn sang bi mguôp hlăm dŭm êpul hgŭm bruă amâodah mkŏ hŏng dŭm knơ̆ng bruă ba čhĭ kyuanăn mâo klei găl mjĕ êrô, bi hriăm kơ hdră pla mjing durian. Lê Văn Thông, sa čô hlăm êpul hgŭm bruă lŏ hma doh Hoà Thắng, čar Dak Lak brei thâo:

 “Dưi hriăm klei kreh knhâo mơ̆ng phung kỹ sư, diñu mtô kơ klei kreh knhâo mrâo mrang, klei hriăm mơ̆ng ƀĭng ngă lŏ hma mơ̆ng krĭng anei truh kơ krĭng mkăn. Tal dua, brei kơ ƀĭng ngă lŏ hma čih pioh čiăng ktuê dlăng bruă pruê hbâo, ngă bruă grăp hruê”.

Ti anăp klei čuăn ktang phĭt mơ̆ng anôk Bruă ksiêm dlăng kleĭ mŭt kbiă China leh anăn dŭm hnơ̆ng čuăn doh êbăt, čar Dak Lak dôk ksiêm dlăng, đru mkăp brei mrô krĭng pla mjing leh anăn mrô anôk đung hruh kơ dŭm anôk bruă djăp klei găl. Truh kơ ară anei, hlăm čar mâo 68 mrô krĭng pla mjing leh anăn 23 anôk đŭng hruh dưi bi klă ba čhĭ kơ China. Ti dŭm anôk pla mjing durian, bruă kriê dlăng mrô krĭng pla mjing leh anăn duah phŭn agha mâo dŭm alŭ wăl ngă jăk. Trần Quốc Vĩnh, khua bruă sang čư̆ êa kdriêk Krông Pač, kdriêk pla durian prŏng mơ̆ng Dak Lak bei thâo, kdriêk mkăp brei leh 37 mrô krĭng pla mjing leh anăn 13 anôk đŭng hruh leh anăn dôk mđĭ hĭn bruă ksiêm dlăng:

 “Hmei mđĭ klei ksiêm dlăng mrô krĭng pla mjing mbĭt hŏng mrô anôk đung hruh čiăng rơ̆ng kơ dŭm hnơ̆ng čuăn. Tal êlâo hĭn jing dŭm knơ̆ng bruă ti alŭ wăl kdriêk srăng ngă djăp hră mơar, boh nik jing dŭm mta ară anei China dôk kăm msĕ si Cadimu amâodah mta Vàng O”.

Hluê si Nguyễn Văn Hà, k’iăng khua knơ̆ng bruă lŏ hma leh anăn wăl hdĭp mda čar Dak Lak, thŭn anei, čar mdưm mta kñăm hnơ̆ng mnia mblei mâo 1,8 êklai USD, hlăm anăn durian mtah leh anăn bi êăt jing mnơ̆ng dhơ̆ng yuôm bhăn. Ƀiădah hŏng klei dleh ksiêm dlăng mơ̆ng anôk mnia mblei akŏ thŭn bi mâo klei lông dlăng ngă kơ bruă lŏ hma mâo klei mlih, mđĭ hnơ̆ng jăk čiăng krơ̆ng kjăp anôk mnia mblei.

 “Tal 1 jing klei ba čhĭ, bi klă krĭng pla mjing leh anăn krĭng pla mjing dưi ruah, duh bi liê klei kreh knhâo mrâo mrang ăt msĕ mơh kriê dlăng mphŭn mkăn. Boh nik hlăm wưng hrui pĕ, djă pioh, mkra mjing dưi rơ̆ng kơ klei doh êƀăt, srăng mkŏ mjing alŭ wăl dưi čuăl mkă čiăng kơ dŭm knơ̆ng bruă mâo klei găl mkŏ mjing sang hjiê, dŭm wăl anôk bi êăt hluê si hnơ̆ng čuăn dŭm ala čar blei”.

Khădah dhar bruă durian Dak Lak dưi bi klă kơ hnơ̆ng leh anăn hnơ̆ng jăk, ƀiădah čiăng bi mâo djăp hnơ̆ng čuăn tar rŏng lăn ktang phĭt, ăt čiăng mâo lu klei gĭr bi hơĭt. Bruă čŏng pô pla mjing êđăp ênang jing klei gĭr phŭn mơ̆ng čar, jing tur knơ̆ng čiăng kơ durian Dak Lak lŏ dơ̆ng kpưn truh kơ lu anôk mnia mbei mkăn.