Êpul hgŭm bruă să Ea Tân, kdriêk Krông Hnang, čar Daklak mâo truh 220 gŏ sang ngă klei bi hgŭm bruă pla mjing kphê, hŏng ênhă êbeh 330 hec-ta. Nguyễn Trí Thắng, Khua êpul hgŭm bruă brei thâo. Čiăng mđĭ klei tŭ dưn bruă knuă snăn brei mâo klei thâo bi hgŭm, pioh bi hrŏ ênoh bi liê tal êlâo, lehanăn mjing klei tŭ dưn jăk kơ boh mnga msĕ sơăi, bi djăp ênoh čuăn mơ̆ng ala tač êngao:

Ênoh hrui blei boh mnga mơ̆ng êpul hgŭm bruă jing kdlưn hĭn hŏng ênoh čhĭ kơ êngao, lehanăn êpul hgŭm bruă lŏ đru kơ ƀĭng hgŭm hdră mkra mjing, lehanăn êpul hgŭm bruă hrui blei jih boh mnga leh djăp ênoh čuăn anăn. Leh 4-5 thŭn mă bruă snăn mâo lu ƀĭng hgŭm dưi mđĭ kyar klei hdĭp leh, lehanăn bruă knuă hơĭt nanao mơ̆ng anăn”.

Mđĭ hĭn klei bi hgŭm hlăm bruă duh mkra, klei hrui blei boh mnga dôk hlăm hdră êlan mă bruă doh, anăn yơh jing hdră êlan mơ̆ng knơ̆ng bruă mnia mblei hŏng ala tač êngao 2-9 Daklak (Simexco DakLak) dôk mđĭ kyar bruă knuă hlăm klei bi mnia mblei hŏng ala tač êngao. Nao hlăm jih jang klei bi hgŭm, phung ngă lŏ hma mâo phung duh mkra đru kơ mjeh mjiêng, mnơ̆ng yua hlăm bruă dlăng kriê, lehanăn kăp hrui blei jih boh mnga mâo, hŏgn ênoh hơĭt. Lê Đức Huy, khua kiă kriê knơ̆ng bruă Simexco Dak Lak  brei thâo, kyua nao hlăm klei bi hgŭm bruă, dưi mâo ba wĭt ênoh boh mnga jăk:

“bruă klam lehanăn klei thâo săng mơ̆ng phung pla mjing, lehanăn diñu jing leh mnuih ngă bruă bi hgŭm. Diñu hlŏng jing phung duh mkra hlăm bruă lŏ hma. Mâo klei thâo săng msĕ snăn, hdră srăng mă bruă nao hlăm klei jăk. Jing leh atur kjăp pioh kơ knơ̆ng bruă dưi mâo boh mnga čhĭ jăk kơ ala tač êngao"”

Kluôm čar Daklak ară anei mâo leh êbeh 470 êpul hgŭm bruă hlăm bruă lŏ hma, hlăm anăn, mâo hlăm brô 150 êpul hgŭm bruă nao bi hgŭm hlăm klei duh mkra bi mâo boh mnga čhĭ mnia jăk. Huỳnh Bài, Khua êpul kiă kriê jih jang bruă bi hgŭm čar Daklak brei thâo: Lu hlăm jih jang bruă bi hgŭm hlăk dôk mđing ktuh êyuh duh mkra pla mjing bi jăk msĕ si kphê, tiu, mdiê lehanăn dŭm mta ana boh kroh… Mơ̆ng klei bi hgŭm anei amâo lŏ mâo ôh klei duh mkra pla mjing hjăn hliê hluôt, ƀiădah nao mklin sa anôk, mkăp djăp boh mnga pioh ba čhĭ kơ ala tač êngao.

“ƀrư̆ ƀrư̆ nao kjăp hlăm hdră êlan bi hgŭm, lehanăn jih jang dŭm gŏ sang mnuih ngă lŏ hma dơ̆ng thâo bi hgŭm hŏng phung duh mkra hlăm klei kjăp, čiăng rơ̆ng dưi mâo boh mnga jăk lehanăn doh”.

Tui si Nguyễn Hoài Dương, Khua knơ̆ng bruă lŏ hma čar Daklak, êjai hlăm boh klei ênoh ênil boh mnga mâo ară anei mâo nanao klei bi mlih, snăn bruă bi hgŭm knư̆ hĭn mơh năng mkŏ mjing hŏng klei kjăp. Bruă lŏ hma pla mjing hlăk dôk mâo klei iêo jak bi hgŭm hlăm klei mnia mblei, boh nik hŏng dŭm mta mnơ̆ng pla phŭn hlăm čar.

“Mđĭ bi lar krĭng pla mjing mklin sa anôk, dưn yua jih klei găl mơ̆ng grăp krĭng, nao hlăm klei bi hgŭm, iêo jak lu phung duh mkra nao hlăm bruă lŏ hma, kñăm mâo klei bi hgŭm hrui blei boh mnga, lehanăn boh nik jing mtrŭt mđĭ  bruă mkra mjing boh mnga kñăm mđĭ klei tŭ dưn mâo ba wĭt, đru bi hơĭt klei hdĭp mnuih pla mjing”.

 Hŏng klei sa ai mơ̆ng jih jang mnuih pla mjing, êpul hgŭm bruă, phung duh mkra, lehanăn bruă sang čư̆ êa, mâo leh lu klei bi hmô hlăm bruă bi hgŭm duh mkra pla mjing mâo ba wĭt boh tŭ dưn jăk ti Daklak. Anei amâo mâo djŏ knŏng jing klei wĭt lač kơ jih bruă dôk bi tĭng hlăm klei duh mkra mnia mblei, ƀiădah lŏ jing kliăng mđĭ klei tŭ mơ̆ng boh mnga mâo. Klei thâo bi hgŭm kjăp plah wah mnuih ngă lŏ hma hŏng phung duh mkra, êpul hgŭm bruă amâo mâo djŏ knŏng mjing klei mă bruă nao hlăm klei đĭ kyar ƀiădah lŏ jing bruă pla mjing đuĕ nao kơ klei hơĭt kjăp dưi găn jih klei dleh dlan klei lông dlăng hlăm klei bi mnia mblei boh mnga, anăp truh kơ bruă mđĭ kyar lŏ hma hŏng klei kjăp./.