Ară anei hlăm kluôm ala mâo leh truh 741 anôk mâo klei ruă tưp ŭn ô̆ eh, ti 31 boh car, ƀuôn prŏng. Hjăn čar Daklak mâo leh 14 gŏ sang dôk hlăm 9 boh alŭ, mgô brei ba bi rai 130 drei ŭn. 7 boh ƀuôn hgŭm hlăm čar ăt adôk mâo klei ruă tưp, hlăm anăn mâo 3 boh ƀuôn hgŭm Dliê Ya, Krông Năng lehanăn Tam Giang mâo klei ruă tưp ka jih ôh 21 hrue. Dôk hyưt kơ klei ruă tưp dôk đĭ hĭn, boh nik hlăm dŭm alŭ wăl mâo anôk rông prŏng, ba klei amâo mâo jăk kơ bruă rông ŭn, kơ anôk mkăp kđeh čĭm lehanăn klei čhŏ djhan kơ wăl hdĭp mda.

Ti anăp klei ruă tưp hlăk dleh dưi ksiêm dlăng lehanăn anăp tưp lar prŏng, hrue    25/7, Knơ̆ng bruă sang čư̆ êa čar Daklak mâo leh asăp mtrŭn truh kơ dŭm knơ̆ng dhar bruă, lehanăn bruă sang čư̆ êa alŭ wăl ngă mtam hŏng klei kjăp jih jang bruă mdrơ̆ng hŏng klei ruă tưp hlăm kluôm čar.

Kluôm čar Daklak mâo leh êbeh 1,2 êklăk drei ŭn. Mơ̆ng akŏ thŭn truh kơ ară anei, Daklak mkŏ mjing leh bruă tlŏ mgang kơ mnơ̆ng rông. Ƀiădah, mâo đa đa alŭ ênoh klei tlŏ mgang adôk ƀiă, boh nik kơ ŭn lehanăn mnŭ.

Đặng Thị Thủy, K’iăng khua knơ̆ng bruă lŏ hma lehanăn wăl hdĭp mda Daklak brei thâo; Mbĭt hŏng bruă tlŏ mgang, bi mdjiê kman, dŭm anôk bruă djŏ tuôm čar, ăt lŏ hyuă kjăp hĭn ksiêm dlăng dŭm anôk čuh tă, dŭ mdiăng mnơ̆ng rông, lehanăn ktrâo atăt dŭm gŏ sang rông mnơ̆ng ngă bruă rông doh, bi mdoh nanao war êning, pral hmao ƀuh, gang mkhư̆ bi jih anôk mâo klei ruă tưp.

“Hŏng čar ară anei, hmei hyuă kjăp hĭn bruă kiă kriê, boh nik hlăm ayŏng adei knuă druh mă bruă mâo nanao klei hâo mdah bi pral kơ anôk bruă kăp lŏ kčĕ kơ phung khua kiă kriê knơ̆ng bruă gĭt gai bi pral. Bruă anei hmei kčĕ tal êlâo. Knuă druh brei bi tuôm kjăp hŏng dŭm boh ƀuôn hgŭm, mđrăm mbĭt hŏng knuă druh hlăm ƀuôn hgŭm bi leh jăk kčah čuăn kčah”.

 Bi ti čar Gia Lai, mơ̆ng knhal jih mlan 6 truh kơ ară anei, mâo leh 5 anôk mâo klei ruă tưp ô̆ eh kơ ŭn truh êbeh 300 drei ŭn ba bi rai. Klei duah hwiê pliă plia ŭn djiê kmăp hlăm hnoh krông êa jua, ba klei čhŏ djhan kơ wăl hdĭp mda msĕ si Bình Hiệp, Bình An, Hòa Hội, Tuy Phước Bắc, Hoài Ân, Ân Tường lehanăn Bồng Sơn… klei anei hlăk dôk hyưt jing klei ruă tưp prŏng. Hrue kăm êgao, dŭm alŭ wăl ƀuôn hgŭm Hội Phú (Gia Lai) tơl jih mlam kdjŏng mă ŭn djiê hwiê hlăm êa, lehanăn ba dơr djŏ hŏng klei bhiăn. Vũ Mạnh Định – Khua knơ̆ng bruă sang čư̆ êa ƀuôn hgŭm Hội Phú brei thâo.

“Knơ̆ng bruă sang čư̆ êa ƀuôn hgŭm gĭt gai leh êpul kahan ksiêm nao ksiêm klei dŭ mdiăng bruă dŭ mdiăng hlăm alŭ wăl, pŏk dlăng camera tui duah phung hwiê ŭn kmăp hlăm hnoh êa Hội Phú. Tơdah hmao ƀuh mghaih msir ktang. Tal dua gĭt gai anôk bruă kahan, tiŏ nao lĭng kahan đru kdjŏng mă ŭn djiê hlăm hnoh êa, mdjiê bi mdoh kman, ba bi rai luič truh 1h mlam snăn kơh ruĕ, hâo hưn mtă mtăn kơ dŭm gŏ sang mnuih ƀuôn sang mđrăm mbĭt bi đru gang mkhư̆ klei ruă tư̆p kơ mnơ̆ng rông”.

Ti anăp klei ruă tưp hlăk dôk đĭ lar, mơ̆ng hrue 16/7, čar Gia Lai mâo mkŏ mjing leh dŭm anôk kăp ksiêm dlăng klei ruă tưp hlăm êlan dơ̆ng prŏng mâo: Bình Đê, Song An, Ia Khươl lehanăn Ia Le. Dŭm anôk kăp ksiêm anăn mă bruă amâo mâo mdei ksiêm kjăp klei dŭ mdiăng ŭn mnŭ mŭt kbiă hŏng čar.

Mbĭt hŏng anăn, dŭm dhar bruă djŏ tuôm hlăm čar hlăk mâo lu hdră gang mkhư̆ msĕ si ksiêm dlăng anôk rông, ksiêm dlăng anôk čuh tă, mđĭ hĭn bruă mđjiê kman, đru mghaih msir bi jih anôk mâo klei ruă tưp, mđĭ hĭn bruă hâo hưn mtô mblang hlăm yang ƀuôn./.