Hlăm dŭm klei rang mdah mbnơ̆ng dhơ̆ng čhĭ mnia mâo mkŏ mjing ti Ƀuôn Ama Thuôt, dŭm knưng mnơ̆ng OCOP lehanăn mnơ̆ng jăk hĭn mơ̆ng alŭ wăl mâo nanao lu phung tuê mđing duah. Amai Huỳnh Thị Thủy, sa čô mnuih blei mnơ̆ng ti Daklak, lač: Klei ñu tui mđing hĭn êdi jing hnơ̆ng jăk, lehanăn phŭn agha mnơ̆ng anăn. Ñu ruah dŭm mta mnơ̆ng jing jăk, klă mngač phŭn agha, lehanăn jing dŏ mnuih Việt Nam pô mkra mjing, kyuadah anăn jing hdră sa ai hŏng mnơ̆ng mơ̆ng Việt Nam:

“Kâo čang hmăng kơ mnơ̆ng dhơ̆ng pô knư̆ hrue knư̆ jing jăk hĭn, mâo hưn mdah lar ƀar hŏng jih jang mnuih ƀuôn sang thâo, ênưih hriê bi blei yua. Êngao kơ hnơ̆ng jăk, mrô knăl ăt jing yuôm bhăn mơh, kyuadah hŏng mnuih blei yua, ƀuh ti ală mta diñu tal êlâo jing hruh đŭng jăk ală dlăng. Tơdah hlăm sa mta mnơ̆ng, ƀiădah mâo mkra mjing hŏng lu hdră, lehanăn lu hruh đŭng mdê mdê, anăn knăl jăk, sĭt nik hŏng lu mta mnơ̆ng anăn srăng mâo lu mnuih khăp blei hĭn”.

Klei bi mlih kơ klei kreh yua, mjing leh klei ktrŏ kơ phung duh mkra lŏ dơ̆ng duh mĭn bi mlih hdră mkra mjing. Msĕ si hlăm bruă tă kčoh, Nguyễn Thị Đượm – Pô anôk mkra mjing kdrăp čŭt hơô mơ̆ng bruă pơ̆k mñam hlue knhuah gru dhar kreh lăn dap kngư ti ƀuôn hgŭm Ƀuôn Ama Thuôt, čar Daklak mâo păn kjăp leh hdră êlan kơ klei mđĭ kyar, lehanăn gĭr ktir tui tiŏ bruă anăn kñăm krơ̆ng phung blei yua truh hŏng pô, ñu yăl dliê:

 Tui si klei khăp čiăng ară anei, tue truh hŏng Ƀuôn Ama Thuôt, pătdah lu phung tue khăp kơ kdrăp čŭt hơô đưm mơ̆ng anei, lehanăn mâo lu phung tue khăp kdrăp anăn lŏ mâo klei bi mlih hĭn. Ƀiădah lŭ hĭn jing ăt khăp kơ knhuah đưm hĭn. Snăn klei ktang mơ̆ng pô jing mkăp djăp kơ tuê čiăng blei anăn yơh.

 Bi hŏng mnơ̆ng ƀơ̆ng huă, lu anôk mkra mjing điêtăt tui duah hdră êlan mrâo mơh. Dương Thị Trúc Linh, ti ƀuôn hgŭm Tuy Hoà, čar Daklak - jing khua anôk bruă mnơ̆ng bi ƀăt Út Vũng Tàu mâo mnơ̆ng djăp ênoh čuăn OCOP 3 mtŭ, lač: ai tiê klei mĭn mnuih blei yua amâo mâo djŏ knŏng mđing kơ klei jăk, kơ ênoh ênil, ƀiădah mđing mơh kơ klei klă mngač hlăm bruă mkra mjing, klei êđăo ênang, lehanăn klei jăk siam mơ̆ng mnơ̆ng anăn.

“Jih jang mnơ̆ng dưi mkra mjing mơ̆ng dŏ čŏng mâo hlăm alŭ wăl leh, djăp ênoh čuăn doh jing klei mnuih blei yua duah hĭn êdi. Klei mnuih blei yua mnơ̆ng dôk tui tiŏ ară anei anăn jing mnơ̆ng doh, boh nik jing mnơ̆ng kơ phung hđeh. Anei mơh jing hdră êlan kơ klei mđĭ kyar bi kjăp drei hlăk dôk mđing êdi”.

Phung duh mkra prŏng ăt dôk mâo klei bi mlih prŏng hlăm klei mkăp mnơ̆ng tui si mnuih blei yua čiăng. Tui si Châu Yến Duyên, knơ̆ng bruă Yến sào Thành Dung, ƀuôn hgŭm Krông Pač, čar Daklak: Êlâo dih, knơ̆ng bruă lu mkra mjing dŭm mta mnơ̆ng mơ̆ng čĭm iăt jing kñăm pioh ba čhĭ kơ ala tač êngao. Ƀiădah ară anei, knơ̆ng bruă knư̆ hrue knư̆ mđing kơ bruă čhĭ mnia hlăm ala čar pô, lehanăn mkra mjing lu mta mnơ̆ng pioh mâo lu mnuih blei bi tui duah.

 “Knơ̆ng bruă mâo ksiêm duah, lehanăn mkra mjing leh mnơ̆ng djŏ guôp hŏng phung blei yua ti hnơ̆ng man dưn, msĕ si atŏ mơ̆ng čiăm iăt mâo mkra leh lu hdră mdê mdê, lehanăn hŏng mnâo mnañ djăp mta mơh, mjing leh dŭm mta mnơ̆ng mơ̆ng čĭm iăt mâo ngă hlăm djăp mta, hŏng ênoh čhĭ djŏ guôp, lehanăn tŭ dưn, kyuadah hlŏng dưi ba yua mtam”.

Jih jang klei mnuih blei yua mnơ̆ng čiăng lehanăn tui duah, lehanăn phung duh mkra dơ̆ng mđing, mâo leh klei bi mguôp dua nah hŏng klei kjăp. Mnuih blei yua dơ̆ng khăp hĭn kơ mnơ̆ng mkra mjing mơ̆ng lăn čar pô, kyua ñu jăk, lehanăn êđăp ênang, êjai anăn, phung duh mkra hlăk dôk gĭr čiăng dưi krơ̆ng nanao klei đăo knang khăp čiăng anăn, lehanăn dưi pŏk mlar nanao anôk mnia mblei. Klei bi đru anăn amâo djŏ knŏng đru kơ dŭm mta mnơ̆ng mkra mjing ti čar Daklak dưi ba čhĭ hlăm lu anôk mnia mblei prŏng, nao hlăm klei bi mnia mblei hŏng elektronik, ƀiădah lŏ đru mkŏ mjing anăn knăl Việt Nam kjăp ktang hĭn nanao./.