Tui si klei hưn mơ̆ng anôk bi kƀĭn, truh kơ ară anei Daklak mâo pla leh êbeh 15 êbâo 200 ha đang boh durian, đĭ 13 êbâo ha mkă hŏng thŭn 2015. Hnơ̆ng boh mâo hlăm thŭn 2022 jing êbeh 150 êbâo tôn, lehanăn srăng truh 300 êbâo tôn hlăm thŭn 2025. Kơ bruă čhĭ kơ ala tač êngao, thŭn 2022 jing thŭn tal êlâo boh durian Daklak ăt msĕ hŏng kluôm ala, mâo čhĭ êlan phŭn kơ ala čar China, anôk blei truh 90% ênoh boh durian mâo čhĭ kơ ala tač êngao, Daklak mâo leh 23 krĭng pla mjing hŏng ênoh truh 1 êbâo 450 ha.

Wưng êgao phung duh mkra mnia mblei hŏng ala tač êngao dôk ngă leh jăk kơ bruă mprăp anôk pla mjing, mjing pô bi ala mkăp mrô knăl krĭng pla mjing boh durian. Siămdah, kyua ka klă mngač ôh hlăm bruă kiă kriê lehanăn bruă klam snăn dôk mâo lu klei amâo thâo bi djŏ hŏng mnuih pla mjing, kčŭt kơ phung duh mkra mnia mblei mplư mplêč. Lê Văn Thành, Khua kiă kriê bruă pla mjing čar Daklak lač, phung duh mkra năng ngă bruă hŏng klei djŏ hĭn, kơ klei dưi bi ala mrô knăl krĭng pla mjing boh durian, lehanăn bi sĭt klei ƀuăn hlăm klei hrui blei boh mnga mâo, čiăng đăm lŏ lĕ ôh msĕ si klei amâo mâo jăk leh êgao:

Phung pla mjing bi mâo klei tŭ ư hŏng phung duh mkra mnia mblei, jao klei dưi jing pô bi ala, mâo hră mơar kuôl kă bi sĭt êmĭt. Bi hră mơar ƀuăn rơ̆ng kơ klei hrui blei boh mnga mâo hŏng phung ƀuôn sang, jing amâo mâo djŏ ƀuăn rơ̆ng hŏng Anôk bruă răng mgang mnơ̆ng pla mjing ôh, ƀiădah klei ƀuăn anăn ăt bi mơĭt kơ anôk bruă răng mgang mnơ̆ng pla mjing thâo mơh”.

Êngao kơ 23 mrô knăl krĭng pla mjing đang boh durian, lehanăn 4 anôk đŭng hruh boh durian mâo mkăp leh, lehanăn dưi ba čhĭ hŏng êlan phŭn, Daklak mâo 15 mrô krĭng dôk guôn bi mklă, 35 mrô krĭng hlăk dôk mkŏ mjing, hŏng ênoh ênhă jih jang êbeh 2 êbâo ha. Bi blŭ hrăm hŏng phung ngă bruă klei mrâo VOV nah êngao klei bi kƀĭn, Trần Quốc Toàn, k’iăng khua anôk bruă kiă kriê hnơ̆ng jăk boh mnga, kan hdang čar Daklak brei thâo, ai tiê mnuih pla boh durian hlăm čar ară anei adôk lu klei amâo mâo hơĭt ôh, ka mâo klei čiăng kuôl kă ôh hŏng phung duh mkra mnia mblei hŏng ala tač êngao. Kyuanăn yơh, bruă ngă klei bi hgŭm, mkăp mrô knăl, hrui blei boh pioh ba čhĭ kơ ala tač êngao, năng lŏ ngă bruă hŏng klei kjăp hĭn, đăm lŏ lĕ ôh klei amâo mâo jăk mgi dih:

Diñu bi lač, diñu amâo mâo ngă klei kuôl kă hŏng pô anei pô adih ôh. Kâo êmuh diñu ya ngă amâo mâo klei đăo knang ôh hlăm klei anei, snăn diñu bi lač, dah ară anei ngă klei kuôl kă, mgi dih lŏ mâo klei ngă bruă hlŏng amâo mâo djŏ, mgô̆ hmei snăn si hmei srăng ngă. Ti anôk anăn yơh, brei bi mâo mta êlan klă mngač hlăm klei kuôl kă, lehanăn mâo bruă čuăn phŭ klă mơh hlei srăng jing pô dôk krah wah kăp mghah boh klei amâo mâo thâo bi djŏ. Klei bhiăn kơ bruă duh mkra, hdră bhiăn yang ƀuôn mâo leh sơăi, ƀiădah mghah boh klei kơ phung ƀuôn sang ăt adôk amâo mâo thâo bĭt êlan”.

Čiăng dưi mghaih msir jăk hĭn jih jang klei dleh kpăk hlăm klei bi hgŭm mđĭ kyar bruă pla mjing boh durian, mđĭ klei bi ktưn hlăm bruă čhĭ mnia hŏng ala tač êngao, phung khua kiă kriê knơ̆ng bruă sang čư̆ êa čar Daklak mtă kơ jih jang dŭm anôk bruă djŏ tuôm, kiă kriê bruă knuă hŏng klei kjăp, bi mguôp jăk lehanăn mghaih msir bi djŏ jih jang ya mta bruă adôk ka djŏ lŏ mâo, anăp truh kơ bruă mkŏ mjing êpul hgŭm phung pla mjing boh durian ciăng dưi truh kơ klei ngă bruă hŏng klei mbruă hĭn. Knơ̆ng bruă sang čư̆ êa čar Daklak mtrŭn leh mơh hdră ksiêm dlăng, lŏ bi lar mrô knăl kơ dŭm krĭng pla mjing, lehanăn dŭm anôk đŭng hruh boh durian. Tui si hdră mrâo mrâo mtrŭn, 6 knơ̆ng dhar bruă hlăm čar, dŭm êpul hgŭm bruă, knơ̆ng bruă sang čư̆ êa kdriêk, pô bi ala dŭm krĭng pla mjing, lehanăn anôk đruh hruh, mâo jao leh truh 16 mta bruă čuăn klă mngač, djŏ guôp hŏng bruă pô klam, čiăng dưi mkŏ mjing dŭm krĭng truăn kơ bruă pla mjing boh durian hŏng klei kjăp, mkăp mrô knăl kơ krĭng pla mjing, lehanăn ksiêm dlăng jih djăp mta bruă dơ̆ng mơ̆ng bruă dlăng kriê wiê ênăk hlŏng truh kơ hrui pĕ boh durian hlăm dŭm yan kơ anăp./.