- Akâo kơ ih mblang brei, si bruă sang čư̆ êa mâo klei đru kơ mnuih pla mjing lehanăn phung duh mkra mnia mblei, hlăm klei čhĭ mnia boh durian kơ ala tač êngao?

 Trần Hồng Tiến: Êpul khua kiă kriê bruă Đảng kdriêk gĭt gai leh bruă hrui pĕ boh durian thŭn anei. Ară anei, Knơ̆ng bruă sang čư̆ êa mâo mkŏ mjing leh dŭm êpul mđĭ hĭn bruă kiă kriê, mâo mbĭt dŭm êpul bruă kahan ksiêm, anôk bruă lŏ hma... đru bi răng mgang klei êđăp ênang kơ yan hrui pĕ boh durian thŭn anei, kyua mâo lu mnuih bi keh nač nao bi rai koh druôm, pleh boh mda ana boh durian, ngă luič liê ngăn dŏ mnuih ƀuôn sang.

- Čhuang hlăm yan hrui êmiêt boh durian, Krông Pač srăng mâo sa ênoh lu mnuih mơ̆ng dŭm anôk mkă hriê mă bruă mưn, snăn si alŭ wăl mâo leh kơ hdră kiă kriê ênoh mnuih, lehanăn klei êđăp ênang hlăm alŭ wăl?

Trần Hồng Tiến: Hmei gĭt gai leh sa êpul ngă bruă, hlăm dŭm krĭng mâo đang boh durian prŏng hlăm alŭ wăl, hyuă kjăp hĭn klei kiă kriê mnuih mă bruă boh nik jing phung hriê mơ̆ng alŭ wăl mkăn, rơ̆ng čiăng mâo klei êđăp ênang, hơĭt hlăm klei mă bruă knuă hlăm alŭ wăl. Gĭt gai êpul hgŭm lu anôk bruă nao hlăm klei kăp ksiêm, ktrâo atăt dŭm phung duh mkra mnia mblei ngă klei ƀuăn rơ̆ng kơ bruă hrui pĕ boh durian, ngă klei kuôl kă hŏng dŭm gŏ sang mnuih pla mjing, hŏng êpul hgŭm bruă, bi hlue ngă djŏ hŏng klei bhiăn knŭk kna, đăm ôh dŭm tĭng ngă bruă amâo mâo bi sĭt klei ƀŭn.     

- Êlan dơ̆ng prŏng mrô 26 găn kdriêk Krông Pač jing điêt kniă, đăo knăl jing dleh hŏng klei hlăk hlê dôk đĭ mơ̆ng êdeh êdâo nao dŭ mdiăng boh durian. Čiăng đăm lĕ hlăm klei gun kpăk hlăm êlan klông, ya mta bruă alŭ wăl mâo bruă ngă?

Trần Hồng Tiến: Hmei jao leh kơ kahan ksiêm, adŭ bruă duh mkra – bruă êlan klông mbha êlan nao, hrŏng ruah ti dŭm anôk êdeh container jưh dôk, đăm bi jưh ktuê êlan klông ôh. Ară anei, drei ksiêm leh duah dŭm anôk jing tač čưng boh, anôk jưh dôk mơ̆ng dŭm knơ̆ng bruă pioh đru kơ dŭm boh êdeh êdâo nao mŭt jưh pioh hrui blei boh durian mơ̆ng mnuih ƀuôn sang.

- Čiăng mâo klei đĭ kyar kjăp mơ̆ng bruă pla mjing boh durian, bruă rơng hơĭt kjăp hlăm klei hrui pĕ mơ̆ng mta boh mâo ênoh anei. Si mâo ngă klei anei?

 Trần Hồng Tiến: Čiăng kơ bruă pla mjing boh durian mâo klei êđăp ênang kjăp, mâo boh mnga tŭ, hmei gĭt gai leh jih jang bruă kđi čar hlăm klei hâo hưn, mtrŭt mjhar mnuih ƀuôn sang, leh hrui pĕ, čhĭ boh durian, brei bi djăp hnơ̆ng ksă, djă pioh kơhưm kơ anăn knăl boh durian Krông Pač, lehanăn si srăng ngă čiăng bi djă pioh nanao kơhưm pô hŏng phung duh mkra.

- Lač jăk kơ ih lu!