Ti dŭm krĭng pla mjing phŭn čar Daklak, bruă bi ktưn mkŏ mjing klei kkuh mơak kơ klei bi kƀĭn prŏng Đảng gưl XIV mâo êdah leh klă hlăm grăp yan, mơ̆ng dŭm klei bi hmô bruă mă tŭ jing. Y - Lyby Niê Siêng, mnuih pla mjing ti ƀuôn hgŭm Krông Ƀŭk brei thâo mnuih ƀuôn sang mơak hŏng dŭm boh tŭ dưn leh mâo lehanăn wir kơ klei bi kƀĭn prŏng hlăm bruă klam prŏng.

“Jih ai tiê kkuh mơak, mâo nanao klei bi ktưn, hŏng dŭm mta kñăm si srăng ngă čiăng kơ mnuih ƀuôn sang ngă lŏ hma Daklak mâo nanao klei mđĭ kyar jăk pioh đru bi rŭ mdơ̆ng lăn čar mdrŏng sah jăk siam.”

Ai tiê klei bi ktưn kkuh mơak klei bi kƀĭn prŏng 14 mơ̆ng Đảng đĭ lar leh truh hlăm phung duh mkra, boh nik hlăm bruă čhĭ mnia boh mnga bruă lŏ hma hŏng ala tač êngao – jing kmeh gơ̆ng phŭn hlăm klei duh mkra čar. Ti knơ̆ng bruă mnia mblei hŏng ala tač êngao 2-9 Daklak, bruă duh mkra pla mjing lehanăn mnia mblei mâo nao mđrĭng hŏng klei bi ktưn klă mngač. Nguyễn Tiến Dũng, K’iăng khua kiă kriê knơ̆ng bruă brei thâo:

“Kkuh mơak klei bi kƀĭn prŏng Đảng, mlan anei jing hmei mâo klei čoh čuăn hdră blei mnia bi mâo 25.000 tôn lehanăn mâo čhĭ kơ ala tač êngao êbeh 20.000 tôn ktuh êyuh jih jang mnuih mơ̆ng đảng viên hlŏng truh kơ mnuih mă bruă pioh ngă bruă hŏng klei klă mngač čiăng bi mâo mnga jăk hlăm klei duh mkra mnia mblei jăk hĭn.”

Mbĭt hŏng phung duh mkra knŭk kna, alŭ wăl phung duh mkra êngao knŭk kna, bi êdah klei sa ai, lehanăn klei čang hmăng kơ hdră êlan prŏng mơ̆ng Đảng.  Dương Nữ Thiên An, Khua duh mkra mnia mblei hŏng ala tač êngao Si Cafe lač:

“Hlăm klei bi kƀĭn prŏng Đảng gưl XIV, mđing lu bruă mtrŭt mđĭ bruă lŏ hma. Kyuanăn phung duh mkra ngă bruă hlăm lŏ hma hmei bŏ hŏng klei sa ai. Hlăm klei duh mkra mnia mblei, wăt hŏng klei hưn mdah truh hŏng ala tač êngao hmei ƀuh klei bi đru hlăm dŭm hdră êlan. Anăp anei kâo čang hmăng srăng đru lu hĭn mơ̆ng dŭm hdră êlan mâo mơ̆ng knŭk kna.”

Mơ̆ng klei jing hlăm alŭ wăl, dŭm klei bi mlih jăk hlăm bruă duh mkra ala ƀuôn, mâo bi mklă leh klei tŭ jing mơ̆ng hdră êlan Đảng tă čua wưng leh êgao. Msĕ si ti ƀuôn hgŭm Ea Knuêč, čar Daklak. Thŭn 2025, ƀuôn hgŭm dưi bi leh, lehanăn kdlưn hĭn hŏng hdră kčah bruă duh mkra ala ƀuôn, mâo klei đĭ kyar hlăm brô 10%, hrui wĭt kah knar grăp čô mnuih amâo mâo mdei dưi đĭ kyar. Jing alŭ wăl dưi yap anôk phŭn kơ boh durian hlăm čar Daklak. Ea Knuêč jing leh đang hma prŏng, mguôp hŏng bruă hiu čhưn ênguê bruă lŏ hma, lehanăn hrui blei boh mnga mâo hŏng hdră êlan klei bi mnia mblei điện tử, pŏk phai anôk čhĭ mnia kơ ala tač êngao.  Nguyễn Thị Cẩm Loan, K’iăng khua bruă mặt trận ƀuôn hgŭm Ea Knuêč, čang hmăng: 

mâo klei čiăng bi mni lač jăk kơ Đảng, Knŭk kna mâo leh dŭm hdră êlan jăk kơ phung pla mjing dưi mâo leh klei hdĭp đĭ kyar… boh nik ai tiê klei hdĭp mơak mñai, klei hdĭp dôk nanao hlăm klei êđăp ênang, bruă yang ƀuôn, bruă mdrao mgŭn, bruă sang hră mơar mâo klei hyuă kjăp leh sơăi.”

Hŏng ai êwa klei bi ktưn prŏng, klei sa ai mơ̆ng phung nga lŏ hma, phung duh mkra lehanăn jih jang bruă kđi čar, Daklak hlăk wĭr kơ klei bi kƀĭn prŏng 14 mơ̆ng  Đảng hŏng dŭm bruă ngă klă klơ̆ng, mâo klei đăo knang hŏng hdră êlan mrâo srăng lŏ dơ̆ng mtrŭt bruă lŏ hma pla mjing, phung ngă lŏ hma, lehanăn krĭng ƀuôn sang mâo klei đĭ kyar kjăp./.