Hnêč mmông mdei yang hruê dơ̆ng, ksiêm dlăng đang djam leh anăn lŏ mbŭ phŭn trŏng dlông awan čiăng jao kơ phung hrui blei pĕ hlăm dŭm hruê kơ anăp, đảng viên Ya Dũng, khua ƀuôn Labouye A, să Lạc Tâm, kdriêk Đơn Dương, čar Lâm Đồng brei thâo, ƀuh bruă pla mjing đưm amâo mâo boh tŭ dưn, hnư hrui wĭt amâo mâo hơĭt kyuanăn gŏ sang ñu mlih klei ngă bruă lŏ hma hluê êlan mrâo mrang. Hŏng 4 sào lăn pla djam mtam dŭm mta, grăp wưng dưi đru kơ gŏ sang ñu mâo prăk mnga êbeh 100 êklăk prăk. Hlue si Ya Dũng, mơ̆ng boh tŭ bruă pla mjing anei đru leh kơ bruă hâo hưn, mtrŭt mjhar leh anăn klei blŭ mơ̆ng sa čô đảng viên msĕ hŏng ñu mâo mnuih ƀuôn sang hmư̆:

 “Kâo pô gĭr hriăm mơ̆ng lu anôk, amâo djŏ knŏng tinei ƀiădah wăt kơ lu alŭ wăl mkăn. Hriăm si srăng pla mjing mjeh ana anei, mjeh ana dih. Hŏng bruă klam jing sa čô mda asei ƀiădah mâo mnuih ƀuôn sang đăo knang msĕ si pô mâo kơhưm, jing pô bi ala srăng gĭr hriăm, duah hdră ngă bruă mrâo, msĕ ară anei kâo dôk pla mjing hŏng hdră mrâo. Kyua mnuih ƀuôn sang čiăng hrăm mbĭt mkŏ mjing alŭ wăl pô đĭ kyar hĭn”.

          Ăt msĕ sơnăn, đảng viên K’Hiệu, ti alŭ 2, să Đinh Trang Thượng, kdriêk Di Linh, čar Lâm Đồng ăt ktrâo atăt mnuih ƀuôn sang hlăm ƀuôn jhŏng mkŏ wĭt ana pla mjing mơ̆ng dŭm mta bruă klă klơ̆ng. K’Hiệu brei thâo, ti thŭn 2014, leh nao hlăm adŭ mtô kơ bruă mkŏ wĭt ana kphê mơ̆ng dhar bruă lŏ hma alŭ wăl mkŏ mjing, ñu rŭ hĕ đang kphê leh khua mơ̆ng gŏ sang pô leh anăn pla kphê mjeh mrâo. Leh 3 thŭn êgao, kphê mơ̆ng sang ñu mâo boh, mâo hnư hrui wĭt hơĭt. Ƀuh klă boh tŭ dưn, mmông anăn mnuih ƀuôn sang bi hluê ngă. Đảng viên K’Hiệu lač, čiăng kơ mnuih ƀuôn sang tŭ leh anăn hluê ngă, pô srăng bi hmô ngă êlâo, pô lač nao mbĭt hŏng pô srăng ngă.

“Hŏng bruă klam jing sa čô đảng viên, jing knuă druh hlăm ƀuôn, kâo gĭr bi lar bruă klam pô ti alŭ wăl. Kâo mtrŭt mjhar mnuih ƀuôn sang đăo knang kơ klei gĭt gai mơ̆ng Đảng, hdră bhiăn lăn čar, brei anak čô nao sang hră mơar kơh mâo klei thâo čiăng mđĭ kyar bruă duh mkra, msĕ si kriê dlăng ana kphê, thâo dưn yua hdră mnêč mrâo mrang, mđĭ hnơ̆ng boh mnga leh anăn mtrŭt mjhar mnuih ƀuôn sang hlăm ƀuôn hluê ngă dŭm hdră mtrŭt mđĭ klei ngă bruă mơ̆ng alŭ mtrŭt mjhar”.

Bi hluê si đảng viên K’Lèn, khua dlăng bruă Đảng ƀuôn K’Long, să Hiệp An, kdriêk Đức Trọng, čar Lâm Đồng, êlâo dih klei hdĭp mnuih ƀuôn sang dleh dlan, hnư hrui wĭt mơ̆ng klei ngă lŏ mmông djăp, mmông kƀah, ƀun ƀin nao dơ̆ng. Kyua mâo Đảng leh anăn knŭk kna uêñ mĭn đru hlăm djăp mta, ngă lu hdră êlan duh bi liê, đru brei mjeh ana pla mjing leh anăn mtô brei hdră mnêč, mbĭt hŏng klei hâo hưn mơ̆ng dŭm êpul êya, mặt trận, bruă sang čư êa, bi lar bruă klam đảng viên nao êlâo, mnuih ƀuôn sang hluê êdei, ƀrư̆ ƀrư̆ mnuih ƀuôn sang bi mlih klei mĭn, hriăm ƀrư̆ ƀrư̆, dưn yua hdră mnêč mrâo mrang mđĭ ênoh mnơ̆ng dhơ̆ng. K’Lèn, lač:

 “Êlâo hĭn pô srăng hriăm kơ pô êlâo, srăng thâo klă dŭm hdră êlan mơ̆ng Đảng, klei bhiăn lăn car kơh ênưih hâo hưn kơ mnuih ƀuôn sang. Êngao kơnăn, sĭt ngă djăp mta bruă pô srăng nao êlâo, sitôhmô pô mkra sang ală kĭng, sang ñuăl yua kdrăp mrâo mrang čiăng kơ mnuih ƀuôn sang hluê hriăm. Tơdah blŭ mă hŏng ƀăn êgei diñu amâo mâo thâo săng, pô srăng ngă êlâo leh anăn anak čô pô msĕ mơh, buh boh tŭ dưn mnuih ƀuôn sang srăng hluê ngă”.

          Hŏng dŭm bruă ngă klă klơ̆ng mơ̆ng grăp čô đảng viên hlăm bruă nao êlâo, bi hmô ngă bruă hâo hưn, mtrŭt mjhar, ktrâo atăt mnuih ƀuôn sang čiăng mđĭ kyar klei hdĭp mda, lu klei bi hmô ngă bruă tŭ dưn dưi pŏk mlar hlăm djăp anôk ti krĭng mnuih djuê biă čar Lâm Đồng. mơ̆ng anăn đru bi hrŏ ênôh gŏ sang ƀun ƀin mơ̆ng čar adôk ti gŭ 2%, hlăm anăn gŏ sang ƀun mnuih djuê ƀiă adôk 5,6%.