-Ơ Vũ Đức Côn, k’iăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang, Khua kiă kriê Êpul hgŭm pla mjing Durian čar Dak Lak, truh kơ ară anei ruê̆ leh wưng hrui pĕ durian thŭn 2023, akâo kơ ih brei thâo klei kñăm tŭ jing hlăm wưng hrui pĕ anei?

-Vũ Đức Côn: Mta kñăm tal êlâo jing ênhă dưi hrui pĕ đĭ 3.000ha. Ênoh ăt đĭ lu leh anăn hnơ̆ng boh mnga ăt êgao 200 êbâo tôn. Tal 2 jing ƀĭng ngă lŏ hma pla durian mâo hrui pĕ tŭ jing prŏng, klei tŭ dưn amâo mâo dưi mĭn êlâo ôh.

-Msĕ si ih lač, thŭn anei ƀĭng ngă lŏ hma mâo klei tŭ dưn amâo mâo dưi mĭn êlâo ôh, ƀiădah mklăk hŏng anăn, dŭm knơ̆ng bruă lŏ tuôm hŏng lu klei dleh dlan. Hluê si ih, ya ngă mâo klei anei?

- Vũ Đức Côn: Klă sĭt jing kyua ênoh đĭ, tla êlâo hĭn ngă lu klei bi lông bi ktưn amâo mâo jăk, mmiă mblei, mmiă čhĭ…Leh anăn gĭr krơ̆ng kơ krĭng pla mjing lu knơ̆ng bruă mđĭ ênoh yyuôm. Tal 2 jing lu mnuih bi kluh nao ngă bruă mnia mblei êjai ka thâo klă klei hưn, ăt msĕ hŏng ka mâo ênŭm klei hriăm.

-Sơnăn, hlăm bruă pluă mbĭt boh tŭ leh anăn dleh dlan msĕ sơnăn, hlăm thŭn tal êlâo ngă bruă, Êpul hgŭm phung pla mjing durian mâo mơ̆ bruă ngă kơ klei anei?

- Vũ Đức Côn: Êpul hgŭm mkŏ mjing mơ̆ng mlan 3 thŭn 2023 truh kơ ară anei, leh kơnăn mtam kčưm mâo đa đa dŭm mta bruă mâo klei hmăi kơ bruă anei. Hmei ăt msĕ hŏng êpul êya mâo klei kƀĭn trông mjĕ mjuk bi tuôm plah wah dŭm knơ̆ng bruă hrui blei hŏng phung pla mjing, mbĭt hŏng anăn jing dŭm anôk bruă kriê dlăng mơ̆ng knŭk kna, dŭm anôk bruă thơ̆ng kơ bruă. Hmei ăt mkăp brei lu klei hưn kluôm hŏng bruă durian, mâo dŭm klei bi klă kơ hdră tă, prăk mnga, dŭm klei dleh dlan hŏng bruă pla mjing durian ti Dak Lak.

-Dưi mơ̆ ih đăo knăl kơ wưng pla mjing durian Dak Lak thŭn 2024? Đa đa knơ̆ng bruă lač, bhiâo riâo rit hnơ̆ng boh durian mơ̆ng čar Dak Lak srăng mâo 500 êbâo tôn, leh anăn knŏng sui mă hlăm 2 mlan, Si ngă čar Dak Lak srăng ngă?

- Vũ Đức Côn: Čar Dak Lak djŏ sĭt jing alŭ wăl mâo klei đĭ kyar pral hĭn hlăm dŭm čar nao hgŭm hlăm bruă anei. Ƀiădah hnơ̆ng đĭ kyar ti čar Dak Lak ka hmăi lu kơ klei đĭ kyar hlăm lăn čar leh anăn dŭm ala čar pla mjing durian mkăn. Leh anăn klă sĭt ñu ăt mâo klei hmăi ƀiădah ka lu ôh kyuadah klei čiăng mơ̆ng China adôk lu êdi. Êngao kơnăn, drei ăt srăng mđing truh mđĭ kyar dŭm anôk mnia mblei mrâo.

-Bi kơ ai dưi mkŏ mjing bruiă anei, boh nik jing bruă mkŏ mkra logistics mơ̆ng čar Dak Lak, dưi mơh bi găl guôp hŏng hnơ̆ng boh mnga dôk đĭ pral amâodah hơăi?

- Vũ Đức Côn: Djŏ sĭt anăn jing klei hŭi hyưt hĭn. Durian mơ̆ng čar Dak Lak mrâo đĭ kyar 5;6 thŭn hŏng anei. Dŭm klei bi mguôp plah wah phung pla mjing ăt ka mâo klei kjăp, leh anăn plah wah phung pla mjing hŏng dŭm knơ̆ng bruă hrui blei, mkra mjing ăt ka kjăp ôh. Bi kơ klei mkăn, dŭm anôk bruă mkra mjing drei ka đĭ kyar. Mâo hŏng anei hlăm brô 2 thŭn, čar ƀuh leh bruă pla mjing durian jing bruă yuôm bhăn hŏng čar, bruă Đảng čar gĭt gai leh knơ̆ng bruă lŏ hma leh anăn mđĭ kyar krĭng ƀuôn sang mđĭ kyar sa hdră kñăm mơ̆ng hdră anei tal 1 jing srăng ksiêm dlăng wăt hdră mkra mjing mâo wăt mjeh truh kơ klei mkŏ, leh anăn tal 3 jing mtrŭt mđĭ klei mnia mblei leh anăn tal 4 jing bi lar jăk bruă klam mơ̆ng êpul hgŭm leh anăn dŭm anôk bruă thơ̆ng kơ bruă kčưm hŏng bruă mtă, mtrŭt mjhar leh anăn hưn mdah hŏng dŭm anôk bruă mkŏ mjing hnơ̆ng čuăn kơ bruă pla mjing durian čiăng kriê dlăng kjăp hĭn.

-Lač jăk kơ ih lu!