Sa hruê kăm hŏng anei, ung mô̆ Võ Văn Cao, ti êpul 10, alŭ Bồng Lai, să Hiệp Thạnh, kdriêk Đức Trọng, čar Lâm Đồng pĭt amâo mâo hơĭt, huă amâo mâo nao, êran nao djăp anôk čiăng duah hdră dŏng mdrao kơ êmô. Ênao kơ 4 drei êmô dôk kđông êđai ăt dôk suaih, jih jang 96 drei êmô mă êa ksâo adôk mơ̆ng gŏ sang mâo klei ruă, eh kbiă êrah, hlăm anăn mâo 2 drei djiê. Võ văn Cao brei thâo, ênoh êmô mâo klei ruă jih jang mrâo tlŏ vaccine gang mkhư̆ klei ruă bŏk kđuč gŭ klĭt êlâo anăn:

“Kâo tlŏ jih 96 drei, knŏng adôk mă 4 drei êmô dơ̆ng mđai amâo mâo tlŏ ôh. Ară anei mâo 10 drei eh êrah, 2 drei djiê. Đa đa ƀơ̆ng mnơ̆ng ƀiă, đa đa ƀuh awăt leh…kâo dôk rŭng răng êdi msĕ si dôk dlông êlah pui. Ară anei grăp hruê kâo ăt brei êmô mnăm êa drao, điêt prŏng brei ƀơ̆ng jih. Êa drao pô knŏng duah blei mơ̆ng tač, bi êa drao mbha knŏng mrâo mâo mơ̆ng mbruê, ƀiădah knŏng mâo mă êa drao C-gluco đuč”.

Gŏ sang aduôn Huỳnh Thị Kim Phượng, ti alŭ Lạc Nghiệp, să Tu Tra, kdriêk Đơn Dương ăt mâo 76 drei êmô mâo klei ruă, 2 drei djiê. Klei anei mâo leh knŏng ƀiă hruê leh tlŏ vaccine klei ruă bŏk kđuč gŭ klĭt. Leh ƀuh dŭm klei amâo mâo jăk hlăm êmô, gŏ sang ñu iêo phung mdrao mgŭn kơ mnơ̆ng rông nao dlăng, mbŏ êa, brei ƀơ̆ng êa drao ƀiădah kăn tŭ dưn lei.

“Leh tlŏ vaccine êmô amâo mâo ƀơ̆ng mnơ̆ng, jih sa phung grăp drei êngoh sơăi. Mâo drei eh kbiă êrah, mâo drei ruă tian eh jŭ tŭt msĕ hŏng lu, 2 drei djiê leh. Hlăm alŭ anei mâo dŭm pluh gŏ sang mâo klei anei, ƀiădah mâo 8 gŏ sang amâo mâo tlŏ vaccine êmô ăt dôk suaih mơh, bi dŭm gŏ sang tlŏ vaccine mâo klei ruă sơăi”.

Vaccine klei ruă bŏk kđuč gŭ klĭt hlăm êmô mă êa ksâo ti 2 kdriêk Đơn Dương leh anăn Đức Trọng mơ̆ng knơ̆ng bruă êa drao kơ mnơ̆ng rông gưl dlông NAVETCO (mâo anôk bruă ti čar Bình Dương) jing pô mkăp brei. Bruă tlŏ mgang mkŏ mjing mơ̆ng hruê 22 – 31/7/2024, hŏng êbeh 10.000 hnơ̆ng vaccine. Leh mâo klei êmô ruă leh anăn djiê, čar Lâm Đồng mdei leh bruă tlŏ vaccine.

Hluê si Nguyễn Văn Long, khua kiă kriê anôk bruă mdrao mgŭn mnơ̆ng rông, mâo klei hưn êmô mă êa ksâo ti Lâm Đồng ruă leh anăn djiê, tlam hruê 7/8, khua gĭt gai Phŭn bruă lŏ hma leh anăn mđĭ kyar krĭng ƀuôn sang gĭt gai leh anôk bruă mkŏ mjing êpul kíêm dlăng, hluê ngă dŭm hdră êlan gang mkhư̆ klei ruă tưp.

“Hmei tiŏ nao leh dŭm adŭ bruă jăk hĭn mơ̆ng dhar bruă mdrao mgŭn kơ mnơ̆ng rông Việt Nam, phung thơ̆ng kơ bruă čiăng mă mta ksiêm mkă, čiăng thâo kơ phŭn agha êmô mâo klei ruă leh anăn djiê ti čar Lâm Đồng. Phŭn bruă ăt mâo klei gĭt gai, ktrâo lač klă hŏng dŭm hdră êlan mkŏ mjing bruă gang mkhư̆ klei ruă tưp, hdră êlan kriê dlăng čiăng bi hrŏ ênoh êmô mâo klei ruă leh anăn djiê”.

Mbĭt hŏng klei đru mơ̆ng Phŭn bruă lŏ hma leh anăn mđĭ kyar krĭng ƀuôn sang, čar Lâm Đồng kñăm dưi dŏng mdrao êmô mâo klei ruă čiăng đru kơ phung rông êmô bi hrŏ klei hmăi. Ƀiădah ênoh êmô mâo klei ruă leh anăn djiê ăt đĭ lu. Truh kơ jih hruê 10/8, čar Lâm Đồng čih yap mâo 4.495 drei êmô mâo klei ruă leh anăn 193 drei êmô djiê, đĭ giăm 600 drei êmô mâo klei ruă leh anăn 21 drei êmô djiê mkă hŏng sa hruê êlâo. Mbĭt anăn hŏng bruă bi gang mkhư̆ klei ruă tưp, dŭm anôk bruă djŏ tuôm dôk bi klă phŭn agha klei ruă hlăm êmô mă êa ksâo ti čar Lâm Đồng.