Klei čiăng mnăm kphê jăk hlăk hlê đĭ, mjing leh klei găl lu hlăm bruă mnia mblei. Ƀuh klei găl anăn, lu phung duh mkra ti Gia Lai jhŏng duh bi liê hlăm bruă duh mkra, dơ̆ng mơ̆ng ruah mjeh pla mjing, hlŏng truh kơ klei mkra kjing kphê.  Nguyễn Tiến Định – Khua knơ̆ng bruă kphê Việt Nam United, kdriêk Čư̆ Prông, čar Gia Lai brei thâo:

 “Hmei ƀuh kphê jăk, jing klei lu mnuih hlăm tar rŏng lăn dôk tui duah, snăn hmei amâo lŏ dôk mang ôh. Hlăm klei mă bruă, hŏng phung pla mjing hmei mâo leh hdră êlan đru bi ktrâo atăt, čiăng digơ̆ thâo hlăm klei bi mnia mblei mâo čhĭ kphê hŏng ênoh yuôm hĭn, snăn mđrĭng hŏng anăn jing mđĭ hnơ̆ng jăk boh kphê, lehanăn dưi mâo boh mnga hơĭt”.

Amâo mâo djŏ knŏng jing bruă mơ̆ng phung duh mkra, kphê jăk mjing leh klei bi mlih hlăm hdră êlan dlăng kriê wiê ênăk mơ̆ng mnuih pla mjing lehanăn êpul hgŭm bruă. Mơ̆ng klei mđing kơ bruă pla mjing kjăp, mnuih pla mjing ba yua hdră êlan pla mjing doh, yua lu hbâo brŭ, hrŏng pĕ boh ksă, rao boh, ƀhŭ dlông pra.

 Ti kdriêk Đăk Đoa, Êpul hgŭm bruă Lam Anh mâo leh klei tŭ jing hŏng hdră pla mjing doh, găl djŏ hŏng lăn ala yan adiê. Boh kphê mơ̆ng êpul hgŭm bruă mâo, amâo mâo djŏ knŏng djăp ênoh čuăn OCOP 4 mtŭ gưl čar, ƀiădah djŏ ai leh hŏng lu ala čar jing dleh hlăm klei mnia mblei. Lê Hữu Anh – Khua êpul hgŭm bruă lač:

 “Hŏng mnuih pla mjing mâo leh klei jưh knang jăk kơ asăr kphê pô, hmei bi mlih leh hdră êlan dlăng kriê wiê ênăk, kñăm mđĭ klei tŭ dưn boh kphê mâo. Klei anei đru leh mnuih pla mjing mâo klei tŭ dưn mơ̆ng bruă pla mjing kphê, bi hrŏ klei dleh dlan, lehanăn mđĭ kyar mơ̆ng bruă pla kphê”.

Ară anei, Gia Lai mâo leh 34 anôk bi hgŭm bruă duh mkra pla mjing kphê, mđrĭng hŏng bruă kăp hrui blei jih boh kphê, hŏng ênhă jih jang êbeh 43.500 ha; bi klin tianăn truh 26 phung duh mkra lehanăn 8 êpul hgŭm bruă. Lu phung duh mkra pla mjing tui tiŏ leh hdră êlan pla mjing doh, duh bi liê kơ bruă mkra mjing boh mnga hŏng klei kjăp, lehanăn mđĭ klei tŭ dưn kphê mâo. Čiăng kơ kphê dưi jing jăk, dưi jing kdlưn hĭn hŏng hnơ̆ng kiă kriê mơ̆ng bruă sang čư̆ êa alŭ wăl, lŏ mđĭ hĭn klei duh bi liê mă bruă hŏng ala tač êngao. Đoàn Ngọc Có – k’iăng khua knơ̆ng bruă lŏ hma čar Gia Lai lač:

 “Truh kơ thŭn 2030, êngao kơ bruă mđĭ kyar kphê mjign kphê jăk mâo leh truh 2.340ha Gia Lai srăng ba 80% ênhă kphê hlăm kluôm čar djăp ênoh čuăn mâo hră tŭ yap. Êngao kơ bruă hmei mđĭ kyar kphê jăk, lehanăn mkra djăp hŏng ênoh čuăn hlăm klei bi mnia mblei, Gia Lai hlăk lŏ iêo jak klei duh bi liê, pioh rŭ mjing bruă nah gŭ, dŭm boh sang mkra mjing boh kphê bi djăp hŏng ênoh čuăn, kñăm mđĭ klei tŭ dưn mơ̆ng bruă kphê.”

 Hŏng lu klei dôk gĭr mơ̆ng phung duh mkra lehanăn phung pla mjing, mbĭt hŏng bruă sang čư̆ êa, kphê Gia Lai hlăk ƀrư̆ ƀrư̆ bi klă bruă kphê mâo hnơ̆ng jăk hŏng tar rŏng lăn. Dơ̆ng mơ̆ng bruă bi mlih hdră êlan pla mjing, tui tiŏ klei pla mjing kjăp, ba wĭt klei tŭ dưn prŏng kơ mnuih pla mjing, lehanăn đru mđĭ hnơ̆ng tŭ anăn knăl kphê./.