Mơ̆ng dŭm bruă ngă mtrŭt mjhar mnia blei dưi mkŏ mjing hlăm jar Klei bi kƀĭn mtrŭt mjhar bi liê čar Dak Lak thŭn 2026 mrâo êgao, êbeh 150  knưng mnơ̆ng mơ̆ng 80 anôk bruă duh mkra, êpul hgŭm bruă leh anăn anôk bruă mkra mjing hlăm čar, êngao čar hưn mthâo leh lu mnơ̆ng dhơ̆ng bi êdah klei găl msĕ si kphê, ca cao, măk ka, tiu, êa hnuê, êa drao, mnơ̆ng mkra mjing, mnơ̆ng mkra mjing hŏng kngan hŏng lu mnơ̆ng dhơ̆ng OCOP leh anăn mnơ̆ng dhơ̆ng tuh tia mkra mjing krĭng ƀuôn sang êdah êdi. Anei jing klei găl kơ dŭm phung mkra mjing hưn mdah anăn knăl, tui duah ƀĭng hgŭm, pŏk mlar anôk ba čhĭ kơ mnơ̆ng dhơ̆ng lŏ hma. Bi ala kơ sa êpul hgŭm bruă, Nguyễn Duy Hùng brei thâo, mâo čar mjing klei găl hgŭm hlăm bruă mtrŭt mjhar mnia blei đru leh kơ phung mkra mjing mnơ̆ng OCOP bi tuôm hŏng lu phung blei yua leh anăn phung kăp čhĭ mnơ̆ng dhơ̆ng hĭn.

“Knăm rang mdah mnơ̆ng anei mkŏ mjing jăk. Phung mkra mjing mnơ̆ng dhơ̆ng OCOP bi mni mơ̆ng hdră mkŏ mjing leh anăn klei hưn mđah. Leh anăn boh nik anăn jing ƀri sa gưl čar Dak Lak hưn mdah hdră kčah leh anăn bi liê mơ̆ng čar hlăm wưng anei snăn iêô jak lu phung blei yua hriê tinei čiăng kah mbha klei thâo leh anăn hmei ăt hưn mdah leh lu mnơ̆ng dhơ̆ng.”

Êngao kơ klei mkŏ mnia blei hlue si hdră mưng leh, čar Dak Lak lŏ đru kơ anôk bruă duh mkra, êpul hgŭm bruă yua klei mlih mrô hlăm bruă hưn mdah leh anăn ba čhĭ mnơ̆ng dhơ̆ng. Dŭm gưl čhĭ mnơ̆ng dhơ̆ng online, mkŏ hlăm tur knơ̆ng mrô đru kơ mnơ̆ng dhơ̆ng alŭ wăl truh hŏng lu phung blei yua  pral hĭn, lu hĭn, đru mđĭ boh tŭ ba čhĭ. Hgŭm čhĭ mnơ̆ng hlăm tur knơ̆ng mrô, Lê Thị Hồng Thơm, bi  ala kơ anôk bruă duh mkra mkra mjing mnơ̆ng bi msiam mơ̆ng ana êa drao să Čư̆ Prao, čar Dak Lak brei thâo:

"Tal anei jing klei rang mdang mlih mrô tal êlâo ti čar Dak Lak leh bi mŭt. Mbĭt hŏng bruă ba mnơ̆ng dhơ̆ng truh anôk rang mdah hŏng hdră ngă mưng leh čiăng čhĭ tinăn mtam snăn knơ̆ng bruă hmei lŏ hgŭm hlăm klei rang mdah live bi mlih mrô kyua Anôk bruă mtrŭt mjhar leh anăn Anôk bruă mđĭ kyar mnia blei mơ̆ng čar đru. Čang hmăng dưi hưn mđah mnơ̆ng dhơ̆ng pô hlue si lu hdră mdê mdê leh anăn dưi  truh hŏng phung blei yua hlăm lu tur knơ̆ng mdê mdê, dŭm hdră mdê mdê.”

Hlue si Nguyễn Hải Triều,  K’iăng Khua Knơ̆ng bruă tuh tia mnia blei čar Dak Lak, klei kñăm mơ̆ng čar amâo djŏ knŏng dôk hlăm bruă mđĭ hnơ̆ng jăk mnơ̆ng dhơ̆ng ôh ƀiădah lŏ hrăm mbĭt hŏng anôk bruă duh mkra, êpul hgŭm bruă leh anăn phung ngă lŏ hma hlăm  bruă mkŏ mjing anăn knăl, mkŏ klei mkăp, mtrŭt mjhar mnia blei leh anăn mđĭ kyar anôk ba čhĭ. Anei jing dŭm hdră msir yuôm bhăn čiăng mđĭ ênoh yuôm mnơ̆ng dhơ̆ng, mđĭ klei bi ktưn leh anăn iêô jak bi liê hlăm bruă mkra mjing, ba čhĭ mnơ̆ng dhơ̆ng lŏ hma alŭ wăl.

“Klei kčah mơ̆ng čar hŏng dŭm anôk bruă duh mkra amâo djŏ knŏng jing bruă mkra mjing mnơ̆ng dhơ̆ng djăp hnơ̆ng čuăn  jăk ôh, ƀiădah brei mkŏ mjing jăk dŭm bruă ngă mkŏ ba čhĭm, mtrŭt mjhar mnia blei leh anăn mkŏ mjing anăn knăl mđĭ kyar anôk ba čhĭ. Kyua anăn mơ̆ng knăm rang mdah, čar Dak Lak ăt čang hmăng hưn mthâo hŏng klei jăk, klă mngač boh tŭ đĭ kyar hlăm bruă tuh tia mkra mjing krĭng ƀuôn sang ti čar. Mbĭt anăn srăng mjing klei găl mkŏ leh anăn hưn mdah anăn knăl, duah ƀĭng hgŭm leh anăn mđing kơ klei bi hgŭm bi liê.”

Mơ̆ng klei đru mđĭ hnơ̆ng jăk mnơ̆ng dhơ̆ng truh kơ klei mkŏ anôk ba čhĭ, bi mlih mrô leh anăn mkŏ mjing anăn knăl, klei hrăm mbĭt mơ̆ng bruă sang čư̆ êa alŭ wăl hŏng dŭm bruă djŏ tuôm dôk thiăm boh kdrŭt kơ phung ngă lŏ hma, êpul hgŭm bruă leh anăn anôk bruă duh mkra mđĭ ênoh yuôm mnơ̆ng dhơ̆ng lŏ hma alŭ wăl. Anei ăt jing tur knơ̆ng yuôm bhăn čiăng kơ bruă lŏ hma  Dak Lak mđĭ kyar hlue si hdră mrâo mrang, kjăp leh anăn mđĭ kyar hlue si hdră mrâo mrang, hơĭt kjăp leh anăn mđĭ ai bi ktưn hlăm anôk ba čhĭ hlăm ala čar ăt msĕ mơh ala tač êngao.