Amĭ kkiêng lehanăn đĭ hriê kơ prŏng ti krĭng lăn krŭ kdơ̆ng Ia Hrung, kdriêk Ia Grai, čar Gia Lai, Ksor Phiếu mkŏ gŏ êsei mrâo hŏng dua kiê kngan huâng kduâng. Kyua kreh kriăng mă bruă knuă, thâo mkiêt mkriêm, kyua anăn hdră duh mkra ung mô̆ ñu ƀrư̆ hruê ƀrư̆ đĭ kyar. Ară anei, Ksos Phiếu jing sa hlăm dŭm gŏ sang đĭ kyar hŏng giăm 2 ha kphê pla pluă hlăm đang tiêu lehanăn êpul êmô 17 drei. Thŭn êgao, kphê mâo ênoh, gŏ sang ñu mâo hrui wĭt êbeh 400 êklăk prăk.

Lu gŏ sang hlăm ƀuôn tui ksiêm leh klei thâo pla ana sui thŭn lehanăn rông mnơ̆ng mơ̆ng khua ƀuôn Ksor Phiếu snăn hdră duh mkra mơ̆ng diñu ăt đĭ kyar mơh. Ară anei, 200 gŏ sang hlăm ƀuôn, grăp sang mâo tivi, êdeh ph’phŭt. Lu gŏ sang dưi mkra leh sang prŏng siam. Mnuih ƀuôn sang hlăm ƀuôn mâo leh klei hdĭp hơĭt kjăp. Ƀiădah êlan găn êrô ka jăk găl. Thŭn 2023, Ksor Phiếu mâo leh klei mĭn akâo kơ êpul mjĕ mjing hŏng ƀuôn jing Anôk bruă kphê Ia Grai lehanăn dŭm gŏ sang ngă bruă mnia mblei ti alŭ wăl đru prăk duh lehanăn pŏk ngă mkra êlan klông. Mơ̆ng anăn, bruă găn êrô mơ̆ng mnuih ƀuôn sang găl ênưih hĭn. Ksor Tí, mnuih ƀuôn sang ƀuôn Blo Dung brei thâo:

“Mơ̆ng hruê Ksor Phiếu dưi ruah ngă Khua bruă Đảng hlŏng ngă Khua ƀuôn, ñu mkŏ mjing leh lu klei bi kƀĭn čiăng mtô mblang kơ mnuih ƀuôn sang, boh nik jing phung êdam êra amâo dưi mnăm kpiê, ƀiêr leh mgăt êdeh, mtrŭt mjhar mnuih ƀuôn sang lăm lui klei bi dôk ung mô̆ mơ̆ng mda. Bi kơ hdră mđĭ kyar bruă duh mkra, lu jing pla kphê lehanăn mdiê lŏ, ară anei hŏng hdră pla kphê sa yan mâo mơ̆ng 5 -6 tọn asăr. Hŏng hdră guh mngač êlan klông krĭng ƀuôn sang, dŭm hruê êgao, êpul mjĕ mjing ăt đru lehanăn mkŏ dưm 5 pŏk pil êran hŏng klei mngač yang hruê čiăng bi guh mngač êlan klông krĭng ƀuôn sang.

Grăp mlan, khua ƀuôn Ksor Phiếu mkŏ mjing klei kƀĭn bi tuôm hŏng mnuih ƀuôn sang hlăm ƀuôn čiăng bi trông dŭm klei dleh dlan, gun kpăk hlăm klei hdĭp. Ti dŭm anôk bi tuôm giăm anei, Ksor Phiếu ăt lač klă kơ klei mâo lu phung êdam êra ngă soh hŏng Hdră bhiăn Êlan klông. Ñu ĭt hŏng Êpul čŏng răng mgang klei êđăp ênang yang ƀuôn ti ƀuôn Blo Dung nao truh kơ grăp gŏ sang bi mklă klei ƀuăn rơ̆ng amâo ngă soh hŏng hdră bhiăn êlan klông. Thiếu tá Vũ Hùng Cường, Khua kahan ksiêm să Ia Hrung lač:

“Êpul kahan ksiêm mbĭt hŏng dŭm alŭ, ƀuôn boh nik Ksor Phiếu ngă kjăp êdi hdră anei, mtă dŭm gŏ sang ƀuăn rơ̆ng mjuăt bi hriăm hdră bhiăn truh kư phung čô anak, snăn jih jang hluê ngă s’aĭ. Boh nik, phung amĭ ama pral atăt ba anak čô pô nao sang hră bi hrô hŏng klei jao êdeh anak đĭ mă.

Khua ƀuôn Ksor Phiếu lŏ nao hgŭm hlăm dŭm hdră bi mgrăng klei amâo thâo bi djŏ hlăm êpul êya. Mtrŭt mjhar mnuih ƀuôn sang nao hgŭm bi kdơ̆ng hŏng phung ngă soh; lăm lui klei bi dôk ung mô̆ mơ̆ng mda, klei bi dôk giăm sa êrah čiăng mkŏ mkra klei hdĭp dhar kreh ti krĭng ƀuôn sang dôk. Ksor Phiếu lač, jing sa čô đảng viên, jing khua ƀuôn ya bruă pô ngă ba anăp êlâo s’aĭ, snăn kơh mnuih ƀuôn sang hluê ngă.

 “Kâo mtă kơ phung êdam êra đĭ êdeh hluê ngă kjăp Hdră bhiăn êlan klông msĕ si đua đuôn gang kŏ, amâo mnăm kpiê ƀiêr tơdah mgăt êdeh. Djăp thŭn snăn kơh dưi dôk ung, dôk mô̆, lăm lui klei bhiăn amâo djŏ mơ̆ng đưm, mtrŭt mjhar gŏ sang, čô anak gĭr hriăm hră. Sa bruă yuôm bhăn mkăn jing giăm anei kreh mâo klei hđeh mngăt êa ti lu alŭ wăl, kyua anăn kâo ăt mtă kơ mnuih ƀuôn sang mđing hĭn kơ čô anak pô čiăng đăm mâo klei truh snăn.

Thái Hồng Cương, Khua bruă Đảng să Ia Hrung brei thâo: Dŭm boh tŭ hdră mđĭ kyar bruă duh mkra – ala ƀuôn ti ƀuôn Blo Dung mâo klei đru mguôp amâo djŏ điêt ôh mơ̆ng Ksor Phiếu.

 “Hŏng Ksor Phiếu bruă klam jing Khua ƀuôn snăn ñu ăt pŏk ngă dŭm hdră êlan mtrŭn mơ̆ng Đảng, hdră bhiăn mơ̆ng Knŭk kna truh hŏng mnuih ƀuôn sang. Mơ̆ng dŭm hdră bi mjĕ mjuk bi mguôp dŭm boh ƀuôn, ñu mtrŭt mjhar mnuih ƀuôn sang lui dŭm klei bhiăm amâo djŏ mơ̆ng đưm. Truh ară anei, hdră mđĭ kyar bruă duh mkra lehanăn rơ̆ng klei êđăp ênang bruă kđi čar dưi rơ̆ng kjăp.

Ksor Phiếu mâo nanao mnuih ƀuôn sang Blo Dung, să Ia Hrung, kdriêk Ia Grai, čar Gia Lai đăo knang lehanăn mpŭ.