Mnuih ngă lŏ hma ti kdriêk Phú Thiện, čar Gia Lai hlăk tuôm hŏng klei luič liê prŏng kyua ênoh čhĭ hbei tao amâo lŏ yuôm ôh. Yan anei, aduôn Lê Thị Xuân, să Chư A Thai, kdriêk Phú Thiện, čar Gia Lai pla truh 2 héc ta hbei tao hŏng ênoh prăk duh bi liê giăm 200 êklăk prăk. Mrâo anei, gŏ sang kuai leh hbei mâo giăm truh 40 tôn, ƀiădah knŏng čhĭ mă hŏng ênoh mil 3000đ/1kg, snăn luič liê truh êtuh êklăk prăk. Ñu lač, klei anei, kbiă hriê mơ̆ng lu mnuih bi kluh pla hbei tao:

 “Đang pla hbei tao jing lu, hnŏng hrui blei amâo lŏ lu msĕ si yăng đar thŭn ôh, klei hrui blei bŏ hŏng klei êmưt, ênoh čhĭ thŭn anei kăn yuôm msĕ hŏng thŭn dih rei. Phung hrui blei ruah knŏng hbei siam kơh blei, hbei amâo mâo siam hlŏng lui jih”.

Mơ̆ng akŏ yan pla mjing truh kơ ară anei, ênoh čhĭ hbei tao amâo lŏ yuôm ôh. Dơ̆ng mơ̆ng ênoh 10.000 prăk/kg, ênoh trŭn nanao truh adôk mă mil 3.500 prăk/kg ară anei. Amâo mâo yuôm ôh phung mnia mblei hrui blei hŏng klei mkrah dưh mơh. Nguyễn Đình Thái, dôk ti să Chư A Thai, kdriêk Phú Thiện, brei thâo, hŏng ênoh čhĭ msĕ si ară anei, đang hbei tao gŏ sang ñu luič mnga dŭm êtuh êklăk prăk mtam.

“Mkă hŏng dŭm thŭn êlâo snăn thŭn anei hbei tao 1 ha luič mnga mơ̆ng 20 -  30 êklăk prăk. Ară anei hlăm 5ha snăn mâo kuai leh 1ha, ară anei dôk guôn čhĭn dah ênoh lŏ yuôm mnuih ƀuôn sang bi kuai, tơdah hơăi hlŏng lui yơh bruă pla hbei tao lŏ wĭt pla mdiê đuič yơh”.

Ăt hlăm klei msĕ snăn mơh aduôn Lê Thị Xuân lehanăn Nguyễn Đình Thái, mbĭt hŏng dŭm êtuh gŏ sang mkăn ti kdriêk Phú Thiện, čar Gia Lai dôk amâo mâo hơĭt pĭt amâo mâo mđao kyua hbei tâo čhĭ amâo mâo yuôm. Mâo gŏ sang hlŏng luič hĕ jih mơh đang hbei tao kyua tuôm hŏng klei hluăt ƀơ̆ng mnơ̆ng ngă. Aduôn Nguyễn Thị Thủy, să Chư A Thai, kdriêk Phú Thiện, čar Gia Lai, lač:

“Snăn mkă hŏng thŭn dih, thŭn anei pla mjing prŏng hĭn, lehanăn mnuih ƀuôn sang krih êa drao amâo mâo kjăp ôh, ngă truh klei hluăt ƀơ̆ng hbei lu hĭn, mâo sang hlŏng kai jih lui mang, luič hơăi mung mang”.

Kdriêk Phú Thiện jing krĭng pla hbei tao prŏng hĭn hlăm čar Gia Lai. Yan anei kluôm kdriêk pla mâo 3.500 ha, đĭ êbeh kơ 3 blŭ mkă hŏng yan thŭn 2022 – 2023, mâo hlăm brô kah knar jing 68.800 tôn. Truh ti wưng anei, hbei tao mâo kuai leh hlăm brô 60% ênhă mâo, dŭm adôk năng ai ti hrue 30/4 srăng kuai jih. Êlâo anăn, dhar bruă djŏ tuôm mtă leh kơ mnuih pla mjing amâo lŏ pŏk phai ôh anôk pla hbei tao, brei mâo klei bi mguôp hŏng anôk duh mkra, kăp duh bi liê lehânn hrui blei hbei. Kyua ênhă pla mjing đĭ, ƀiădah amâo mâo anôk čhĭ mnia, snăn yơh mnuih pla hbei luič hơăi mung mang. Bùi Trọng Thành, Khua adŭ bruă lŏ ham kdriêk Phú Thiện, čar Gia Lai brei thâo, ti năp klei dleh dlan hlăm klei čhĭ mnia, kdriêk mâo leh dŭm hdră duah anôk čhĭ mnia đru kơ mnuih ƀuôn sang.

“Mơ̆ng klei msĕ si lač anăn, hmei iêo mthưr leh phung duh mkra, mâo klei bi mguôp mbĭt đru hrui blei hbei mnuih ƀuôn sang, lehânn kiă kriê dŭm boh să mkŏ mjing dŭm êpul kăp hrui blei čiăng kơ phung duh mkra nao hẻi blei hŏng klei ênưih, rơ̆ng bi hmao hŏng yan kuai hbei”.

Mrâo leh êgao, Êpul grŭp Central Retail Việt Nam brei thâo jih jang sang mnia prŏng mŏng êpul grŭp hlăk pŏk bruă čhĭ mnia hbei tao amâo mâo mđing uêñ ôh kơ prăk mnga, kñăm mđrăm mbĭt hŏng phung pla mjing ti Gia Lai. Tui si êpul grŭp anei, bruă ngă anei hlŏng tui tiŏ mtam êjai dôk hlăm yan kuai hbei, lehanăn klei čhĭ hbei hlăk toh hroh mơ̆ng 10.000 prăk/kg trŭn adôk 3.500 prăk/kg, mnuih pla hbei luič liê prŏng êdi. Dưi thâo, hdră pla mjing mơ̆ng mnuih ƀuôn sang ti Gia Lai Central Retail Việt Nam srăng đru ba čhĭ hbei mnuih ƀuôn sang hlăm dŭm boh sang mnia prŏng msĕ si GO!, Big C lehanăn Tops Market. Hbei tao srăng dưi hrui blei lehanăn dŭm boh sang mnia prŏng ba čhĭ hŏng ênoh amâo mâo tĭng mnga lu ôh, jing mil 9.900 prăk/kg ti dŭm boh sang mnia ti kwar Krah, kwar dhŭng lehanăn     10.900 prăk/kg ti dŭm anôk čhĭ mnia kwar dưr. Hlăm dŭm hrue kăm tal êlâo ba yua hdră anăn, dŭm boh sang mnia prŏng srăng dru bi čhĭ brei mơ̆ng 80-100 tôn hbei tao mnuih pla mjing ti Gia Lai.