Leh klei tlăng lăn dơ̆ng mkŏ mjing bruă pla mjing mơ̆ng mlan 12/2023 truh ară anei, grăp hrue ti đang sâm Ngọc Linh mâo khua knŭk kna mđup brei mjeh kơ dŭm gŏ sang ƀun ti kdriêk Tu Mơ Rông, čar Kon Tum mâo mnuih ƀuôn sang bi kiă răng dlăng kriê. A Phai, alŭ Tân Ba, să Tê Xăng brei thâo, hlăm alŭ diñu mâo truh 22 gŏ êsei ƀun mâo kdriêk mbha kơ grăp gŏ sang truh 40 phŭn ana sâm Ngọc Linh jing mjeh mơ̆ng khua knŭk kna mđup brei. Čiăng kơ ana sâm yuôm bhăn anei đĭ jing jăk, snăn jih jang gŏ sang ƀun anăn mâo klei ktrâo atăt bruă dlăng kriê wiê ênăk mơ̆ng grăp ana sâm:

 “Mâo 22 gŏ sang ƀun nao păng ñuăl gang mkhư̆ kkuih, lehanăn čĭm čap bi rai. Lehanăn mkăp djah brŭ guôm phŭn ana sâm. Ngă hŏng klei jăk klă, mkŏ mjing mâo 3 gŏ sang jing sa êpul bi krih êa, lehanăn nao bi kiă kriê, čiăng kơ ana sâm mnuih ƀuôn sang đĭ jing jăk”.

A Phát, jing mnuih hlăm jih dŭm hrue Tết Nguyên đán mrâo anei dôk kiă răng nanao đang sâm Ngọc Linh pô, lač snei:

 “Mâo khua knŭk kna mkăp brei mjeh sâm, hmei bŏ hŏng klei mơak, kyuadah hmei dôk hlăm klei kƀah. Mgi dih leh ana sâm đĭ jing jăk, mâo boh tŭ dưn sĭt nik amâo srăng kơ lŏ dleh msĕ si ară anei ôh, čang hmăng srăng dưi mâo klei tŭ jing msĕ hŏng arăng mkăn”.

Mjing djăp klei găl čiăng kơ 300 gŏ êsei ƀun ti 23 boh alŭ ƀuôn hlăm 8 ti kdriêk mâo lăn pla mjing truh 12.000 phŭn ana sâm Ngọc Linh mâo khua knŭk kna mđup brei, snăn bruă sang čư̆ êa kdriêk Tu Mơ Rông mbha leh kơ grăp boh sang ƀiă êdi truh 0,5 héc ta lăn ti dlông čư̆ Ngọc Linh ti čuê mrô 6, wăl dliê mrô 218 hlăm să Măng Ri. Ênhă lăn anei dôk ti hnŏng dlông êbeh 1.500m mkă hŏng êlah êa ksĭ, ti gŭ êui kmrơ̆ng čiăng bi găl anôk pioh pla mjing ana sâm Ngọc Linh. Bruă sang čư̆ êa kdriêk mâo leh klei tĭng mkă hŏng anôk pla mjing truh 12.000 phŭn ana sâm mjeh mâo khua knŭk kna mđup brei, dŭm gŏ êsei ƀun hlăm dŭm thŭn tinăp srăng mâo djăp mjeh lŏ bi lar thiăm anôk pla mjing, lehanăn tinăn lŏ dơ̆ng đru kơ hdră dlăng kriê wiê ênăk đang sâm đĭ jing jăk, mjing klei duah ƀơ̆ng hơĭt kơ mnuih ƀuôn sang. Võ Trung Mạnh, Khua knơ̆ng bruă sang čư̆ êa kdriêk Tu Mơ Rông, čar Kon Tum brei thâo:

 “Khua knŭk kna mđup brei mjeh ana sâm kơ dŭm gŏ êsei ƀun mjing kơ klei duh ƀơ̆ng hơĭt, lehanăn tlaih kơ ƀun hŏng klei kjăp. Leh mâo klei knŭk kna đru anăn, kdriêk jao leh kơ adŭ bruă lŏ hma, anôk đru mkčĕ bruă lŏ hma ktrâo atăt klă kơ mnuih ƀuôn sang čiăng bi mhriăm mnuih ƀuôn sang dlăng kriê wiê ênăk jăk, anăp ba wĭt boh tŭ dưn klă. Mkŏ mjing hdră êlan kiă kriê đang ana sâm bi jăk anăn jao bruă kla mngač hŏng bruă sang čư̆ êa dŭm boh să bi đru kiă kriê đang sâm hŏng klei jăk. Kyua mâo hdră êlan mơ̆ng lăn čar đru, mâo kah leh sa ênoh prăk pioh rŭ mkra mnư̆ răng kriê anôk pla mjing”./.