Ti Dak Lak - krĭng pla mjing kphê phŭn mơ̆ng lăn čar, lu knơ̆ng bruă dôk čŏng mkŏ wĭt boh tŭ dưn, duh bi liê kơ krĭng pla mjing, mkra mjing êlam truh kơ mnia mblei. Lê Đình Tư, khua knơ̆ng bruă duh mkra mnia mblei Aeroco brei thâo, knơ̆ng bruă mrâo ksiêm duah - mđĭ kyar mnơ̆ng dhơ̆ng, iêo jak dŭm tour hiu čhưn ênguê lông dlăng hdră mkra mjing. Mnơ̆ng dhơ̆ng mơ̆ng đang pla mjing dưi ba kơ dŭm mbah mnia mblei online ti hnơ̆ng gưl dlông leh anăn dŭm tač êdeh phiơr prŏng mơ̆ng Việt Nam, mâo hnư hrui wĭt lu. Lê Đình Tư hmăng hmưi:

“Drei mâo lu klei găl čiănjg mđĭ kyar kphê Robusta mơ̆ng čar Dak Lak leh anăn wăt kơ Việt Nam. Hlăm dŭm thŭn mrâo anei, Aeroco mâo dŭm klei pah mni prŏng, ba wĭt lu boh tŭ dưn jăk êdi. Thŭn anei ăt gĭr lu hĭn, brei kơ mah jiăng hlăm lăn čar leh anăn êngao lăn čar thâo lu hĭn leh anăn srăng ngă maketinh jăk hĭn.”

Ăt mâo klei đăo knang kơ thŭn mrâo, lu knơ̆ng bruă mrâo ăt kruăk knăl hlăm hră kak kphê jăk tar rŏng lăn. Aduôn Dương Nữ Thiên An, khua knơ̆ng bruă tuh tia mnia mblei Si Cafe brei thâo, thŭn 2026 dưi dlăng jing klei kčưm mâo klei găl mơ̆ng akŏ thŭn, anôk mnia mblei Japon tŭ ư blei kphê 100% Robusta kphê đeh mơ̆ng knơ̆ng bruă mkra mjing, Container tal êlâo dưi ba čhĭ hlăm mlan 1/2026 leh anăn mprăp ba čhĭ kơ container tal 2.

“Hlăm thŭn anei, hmei kñăm ai dưi kơ anôk mnia mblei China, mơ̆ng ruah mnơ̆ng dhơ̆ng, mđĭ kyar mnơ̆ng dhơ̆ng truh kơ mkra mjing hruh, đŭng hruh, kñăm bi hơĭt leh anăn pŏk mlar anôk mnia mblei hŏng klei hơĭt kjăp”.

Amâo djŏ knŏng kñăm kơ klei mnia mblei, knơ̆ng bruă kphê jăk lŏ čơ̆ng bi mguôp, ktrâo atăt leh anăn mkŏ mjing mnơ̆ng dhơ̆ng. Hoàng Danh Hữu, pô mkŏ mjing anăn knăl Miss Êđê - knơ̆ng bruă ba čhĭ kphê kơ Mi, Dhŭng Korea leh anăn Russia lač, thâo săng kơ anôk mnia mblei gưl dlông leh anăn klei čiăng mơ̆ng phung thơ̆ng kơ bruă jing kliăng yuôm bhăn čiăng kơ kphê jăk Việt Nam kpưn đĭ kbưi hĭn. Hlăm thŭn 2026, knơ̆ng bruă srăng lŏ dơ̆ng bi klă dŭm mta bruă hŏng tač êngao hlăm klei mnia mblei čiăng đru kơ dŭm đang pla mjing kphê jăk truh pral hĭn hŏng anôk čhĭ mnia prŏng mơ̆ng Dhŭng Korea:

“Leh thâo anôk mnia mblei ya ñu čiăng, hmei srăng mâo dŭm klei hưn, klei čuăn anăn truh hŏng phung mkra mjing, êpul bruă leh anăn knơ̆ng bruă hlăm lăn čar, čiăng hrăm mbĭt mkŏ mjing sa wăt bi mguôp, sa wăl mnơ̆ng hdĭp, đru kơ dŭm đang pla mjing amâo mâo nao hjăn păn leh anăn amâo lŏ mâo ôh klei knŏng nao bi lông amâo mâo anôk ba čhĭ”.

Đru mguôp yuôm bhăn hlăm hdră bi klă boh tŭ ênoh kphê Robusta jăk, jing bruă klam ktrâo atăt mơ̆ng dŭm knơ̆ng bruă mnia mblei prŏng. Ti Dak Lak, knơ̆ng bruă mkra mnia mblei hruê 2/9 Dak Lak (Simexco Đắk Lắk) nao êlâo mkŏ mjing klei mkăp brei krĭp, ksiêm dlăng hnơ̆ng jăk, tui duah phŭn agha, bi mguôp leh anăn hrăm mbĭt hŏng bruă kphê jăk. Nguyễn Tiến Dũng, k’iăng khua knơ̆ng bruă Simexco Đắk Lắk brei thâo, knơ̆ng dưi leh anăn dôk đru kơ dŭm êpul hgŭm bruă, gŏ sang ƀĭng ngă lŏ hma leh anăn đru kơ dŭm ênoh čuăn tar rŏng lăn hŏng klei hmăng hmưi đru bi lar hnơ̆ng jăk klei mnia mblei.

“Hmei dôk bi mguôp hŏng 50.000 gŏ sang ngă lŏ hma Lăn Dap Kngư čiăng mkra mjing dŭm ênoh čuăn kphê hơĭt kjăp. Kyua čiăng dưi mkra mjing kphê jăk leh anăn hnơ̆ng jăk srăng mâo anôk bruă mkŏ mkra, sitôhmô anôk bhu krô, masin kdrăp yua mkra mjing kphê jăk ăt msĕ mơh kphê hnơ̆ng jăk, mđĭ ênoh asăr kphê leh anăn bi hơĭt klei hdĭp kơ ƀĭng ngă lŏ hma lu hĭn.”

Hŏng klei đăo knang ktang hlăm hnơ̆ng jăk kphe mơ̆ng Dak Lak leh anăn Việt Nam, thŭn 2026 dưi hmăng hmưi srăng jing sa thŭn kdlưn hĭn mơ̆ng kphê Robusta jăk, amâo djŏ knŏng pŏk mlar anôk mnia mblei ƀiădah lŏ mđĭ kơhưm kphê Việt Nam hlăm hră kak tar rŏng lăn, hlăm klei čŏng pô leh anăn bŏ hŏng klei hmăng hmưi kơ êlan nao mrâo.