Mơ̆ng klei gĭr čiăng kpưn đĭ mlih mrâo, ti krĭng lăn ƀuôn sang pô mtam, leh sui thŭn dôk bi mĭn, mbĭt hŏng klei mđĭ ai mơ̆ng dŭm gưl bruă Đảng, bruă sang čư̆ êa, Y - Hưng Niê, đảng viên hlăm êpul bruă Đảng Buôn Trăp, să Ea HĐĭng, kdriêk Čư̆ M'gar, čar Daklak jhŏng mkŏ mjing êpul hgŭm bruă duh mkra pla mjing să Êa Hđĭng. Nao hlăm êpul bruă anei jing phung đoàn viên, êdam êra hur har jih ai tiê hriăm êmuh, tui duah klei kreh knhâo ba yua hlăm bruă knuă. Leh êbeh 3 thŭn mkŏ mjing, truh kơ ară anei êpul hgŭm mâo iêo jak leh truh 25 čô ƀĭng hgŭm klă klơ̆ng, lehanăn mâo êbeh 500 nao hlăm klei bi hgŭm mbĭt. Hŏng lu hdră êlan mă bruă, hlăm dŭm klei bi hmô jăk mâo ba wĭt leh klei tŭ dưn prŏng. Y-Hưng Niê brei thâo, mâo dŭm mta bruă msĕ si rông bê krư̆ hlăm war, buh mdiê hma hang, pla kphê, tiu, boh durian hŏng klei kjăp, grăp thŭn, grăp gŏ êsei mŭt hlăm êpul hgŭm mâo ba wĭt leh prăk mnga mơ̆ng 50 êklăk prăk truh 1êklai prăk:

“Klei mđĭ kyar bruă duh mkra ti alŭ wăl jing yuôm bhăn snăk, boh nik jing klei duh mkra hgŭm, mđĭ kơ bruă pla mjing, rông mnơ̆ng, ngă bruă hiu čhưn ênguê lăn mnga êa mơak. Klei pô čang hmăng jing mâo đru kơ jih jang ƀĭng hgŭm thâo duh ƀơ̆ng mơ̆ng dŭm bruă bi hmô leh mơ̆ng klei bi hgŭm mbĭt, ba wĭt klei tŭ dưn kơ asei mlei pô lehanăn kơ alŭ wăl msĕ mơh. Êgao hĭn kơ anăn jing jing êpul hgŭm mâo mkŏ mjing leh sa êpul bruă Đảng dôk hlăm êpul bruă Đảng să Êa H’Đĭng kiă kriê pioh đru bui tă êlan kơ mnuih ƀuôn sang mđĭ kyar mơh”.

Hŏng klei jhŏng mĭn, jhŏng ngă, anăn yơh jing klei lu mnuih bi lač kơ ayŏng Dương Văn Ngọc, sa čô đảng viên mda asei, ba êlan êlâo thâo bi ktưn hlăm klei duh mkra pla mjing. Ñu brei thâo. Ƀuh mnuih blei yua mnơ̆ng čiăng knư̆ hrue knư̆ ruah jing dŏ jăk, snăn thŭn 2019, ñu bi mlih leh 4 ha kphê leh khua ana, mlih pla boh durian hlue hŏng hdră êlan doh, mguôp hŏng bruă krih êa hlăm klei mkiêt mkriêm. Truh kơ ară anei, bruă pla mjing boh durian hlue hdă êlan doh dơ̆ng ƀuh leh dŭm klei bi knal jăk, êjai ênoh bi liê amâo mâo prŏng ôh knŏng mil mă 20%, ƀiădah mâo ba wĭt boh mnga jăk, hnơ̆ng tŭ đĭ truh êbeh 2 blư̆. Hdră bi hmô anei mâo leh lu mnuih riêng gah, tui nao hriăm, lehanăn lŏ pŏk mlar. Tui si Dương Văn Ngọc, jing đảng viên snăn pô gĭr jih ai tiê yơh ba akŏ hlăm djăp mta bruă, ngă klei bi hmô êlâo, čiăng kơ mnuih ƀuôn sang jưh knang lehanăn tui hlue.

 “Êjai pô nao bi mguôp hlăm êpul bruă êdam êra, lehanăn hlăm bruă tĭng kơ Đảng tinăn mâo tui hriăm dŭm klei bi hmô jăk, hdră mă bruă djŏ, pioh ba yua kơ klei hgĭp hlăm gŏ sang pô, ngă bruă tŭ jing hĭn. Hlăm wưng tinăp, kâo srăng gĭr dăp bi djŏ jih jang bruă bruă pưk sang hŏng bruă yang ƀuôn, nao hgŭm hlăm bruă đru dŏng lu hĭn”.

Amâo mâo djŏ knŏng mđĭ kyar klei hdĭp mda gŏ sang pô đuič ôh, phung đảng viên lŏ mâo klei găl hĭn bi mkrum ngă prăk, pioh mjing keh kăp lŏ đru kơ dŭm gŏ sang dôk hlăm klei dleh dlan, brei čan lĭng amâo mâo mă prăk mnga ôh. Mơ̆ng prăk mâo čan anăn lu mnuih dôk hlăm klei dleh dlan, dưi kpưn đĭ tlaih mơ̆ng klei kƀah wư, mâo klei găl kpưn đĭ hlăm klei hdĭp. Ti ƀuôn hgŭm Đoàn Kết, wăl krah Ƀuôn Hồ, čar Daklak, Hà Ngọc Cẩn, jing đảng viên dôk hlăm êpul bruă Đảng êpul anôk dôk mrô 2 jing sa hlăm dŭm čô đảng viên bi hgŭm hlăm hdră anei. Ñu brei thâo, khădah ênoh prăk pô bi mkrum mbĭt amâo mâo lu ôh, ƀiădah hŏng ai tiê bi đru lehanăn bi khăp, phung đảng viên ăt mâo nanao klei hmăng hmưi dưi đru sa kdrêč điêt kơ phung dôk găn hlăm klei dleh dlan, čiăng kơ digơ̆ kpưn đĭ mơh:

 “Tinei, jih jang mnuih ƀuôn sang jing phung ngă lŏ hma sơăi, mâo dŭm gŏ êsei mâo prăk hlŏng tla tinăp, mâo đa đa gŏ sang dôk hlăm klei kƀah, snăn čan, dôk guôn truh yan hrui êmiêt srăng tla. Kyua ƀuh mnuih ƀuôn sang dôk hlăm klei dleh dlan snăn đru mnuih ƀuôn sang dưi čan lĭng pioh duh kơ bruă knuă, ƀiădah amâo mâo tĭng prăk mnga ôh”.

Mơ̆ng dŭm klei thâo bi hmô msĕ si drei yăl dliê leh anei, lu phung đảng viên ti Daklak mâo nanao klei thâo bi hmô jăk, ba êlan êlâo hlăm djăp mta bruă, diñu jing leh phung knuă druh thâo mbruă, jing mnuih thâo dôk dơ̆ng ƀơ̆ng huă jăk, gĭt ktir hlam klei duh ƀơ̆ng, msir klei ư̆ êpa bi hrŏ klei ƀun knap, mđrăm mbĭt bi rŭ mdơ̆ng ƀuôn sang pô knư̆ hrue knư̆ mdrŏng sah jăk siam./.