Jing gŏ sang ƀun ti ƀuôn Čư̆ Kêñ, să Êa Sin, kdriêk krông Ƀŭk, čar Daklak, akŏ thŭn 2023, H’Yam Mlô, mâo klei đru kơ ñu sa drei êmô ana mđai pioh rông. Leh giăm dua thŭn, mâo klei đru mơ̆ng dŭm êpul êya, klei ktrâo atăt mơ̆ng phung knuă druh hlăm bruă mjut rông êmô anăn, snăn ară anei sang H’Yam êmô mđai leh. H’Yam hŏng klei mơak yăl dliê.

Kyua mâo klei bruă sang čư̆ êa đru, gŏ sang hmei mâo leh êmô rông, gĭr bi răng kriê rông ba, čiăng kơ êmô mđai đĭ lar, pioh čhĭ blei mprăp braih huă, blei mprăp kơ anak aneh nao sang hră mơar”.

Ƀuh klă klei găl hlăm ƀuôn sang, lehanăn tui si hdră êlan mâo leh hlăm hdră mtrŭn mơ̆ng anôk bruă Đảng nao đru bi hrŏ ƀun hŏng klei kjăp, snăn anôk bruă Đảng să Ea Sin, kdriêk Krông Ƀŭk, čar Daklak mkŏ mjing leh hdră êlan đru mđĭ kyar klei hdĭp mda wưng thŭn 2020-2025. Hlăm anăn mâo dŭm ênoh čuăn, hdră mă bruă hŏng klei klă mngač djŏ hŏng klei găl ghuôp hlăm buôn sang. Bi mlih hdră êlan duh ƀơ̆ng bi kjăp hĭn, ba wĭt klei tŭ dưn hĭn. Mbĭt hŏng anăn mâo klei hâo hưn mtô mblang ba yua klei kreh knhâo hlăm pla mjing, rông mnơ̆ng, ba mjeh mrâo bi mâo boh mnga lu hĭn. Vũ Văn Tuấn, Khua bruă  Đảng să brei thâo:

 “Să Ea Sin tă leh hdră mă bruă jăk hlăm grăp thŭn. Mơ̆ng hdră mă mnuih ƀuôn sang yơh jing phŭn, dưn yua jih bruă klam mơ̆ng anôk bruă kđi čar. Găn leh hlăm dŭm thŭn mă bruă boh tŭ dưn bi hrŏ ƀun mâo leh klei jăk jĭn. Boh nik leh mnuih ƀuôn sang thâo săng, snăn bruă bi hrŏ ƀun mâo ngă hŏng klei tŭ dưn êdi, mnuih ƀuôn sang dưn yua jih jang jih jang hdră bi hmô, klei duah ƀơ̆ng, bi tui hriăm hdơ̆ng găp čiăng tlaih mơ̆ng ƀun. Mâo leh lu gŏ sang đĭ hriê kơ thâo mâo”.

Mbĭt hŏng anăn, dŭm ênoh prăk mâo đru hlăm hdră bi hrŏ ƀun, klei kơ êa doh, bi mdoh wăl hdĭp mda, klei brei čan prăk pioh duh ƀơ̆ng mơ̆ng dŭm knơ̆ng prăk mjing leh klei găl kơ mnuih ƀuôn sang duh kơ bruă knuă. Truh kơ ară anei, hnơ̆ng ênoh gŏ êsei ƀun hlăm să Ea Sin hrŏ leh êbeh 57% (thŭn 2021) trŭn adôk 39,8% (thŭn 2023), hrui wĭt kah knar mơ̆ng grăp čô mnuih đĭ nanao hlăm grăp thŭn.

Mơ̆ng dŭm klei bi hmô “Bi hrŏ ƀun hŏng klei kjăp” ti să Ea Sin, Êpul kiă kriê bruă Đảng kdriêk Krông Ƀŭk, čar Daklak ngă leh lehanăn hlăk dôk bi lar hlăm kdriêk. Čiăng jĕ giăm hĭn hŏng alŭ wăl, êpul khua kiă kriê bruă Đảng kdriêk lŏ mbha bruă kơ dŭm phung khua kiă kriê hlăm dŭm êpul bruă Đảng, grăp mlan nao bi kƀĭn mbĭt hŏng êpul bruă Đảng ƀuôn čiăng păn kjăp ai tiê klei mĭn knuă druh, đảng viên lehanăn mnuih ƀuôn sang, hmao ruh mgaih jih klei gun kpăk hlam bruă mđĭ kyar klei duh mkra hlăm ƀuôn. Nguyễn Hải Đông, Khua bruă Đảng kdriêk Krông Ƀŭk, čar Daklak brei thâo:

 “Kdriêk kiă kriê leh jih jang knuă druh đảng viên klam ngă klei kăp ksiêm alŭ wăl, msĕ hŏng knuă druh 7 să mâo nanao bi mguôp hŏng êpul bruă Đảng alŭ wăl. Kăp ksiêm jêñ jêñ lehanăn dlăng wĭt jih jang boh tŭ dưn klei hlue ngă dŭm ênoh čuăn dŭm mta bruă bi hrŏ ƀun, čiăng mâo ngă hŏng klei jăk hĭn”.

Kdriêk Ƀŭk, čar Daklak mâo leh êbeh 30 êpul bruă Đảng nah gŭ hŏng êbeh 180 êpul bruă Đảng nah gŭ. Kyua ngă jăk bruă klam kiă kriê, gĭt gai, tă brei êlan hlăm bruă mđĭ kyar duh mkra ala ƀuôn ti alŭ wăl, snăn 16 mgta čuăn kơ klei mđĭ kyar hlăm kdriêk thŭn 2023 dưi djăp lehanăn êbeh hĭn kơ hdră kčah. Hlăm anăn, hnơ̆ng ênoh gŏ sang ƀun hrŏ 1% (djăp 100% hdră kčah); hnơ̆ng ênoh gŏ sang ƀun ti să dleh dlan hĭn hrŏ 6,97% (djăp 116% hdră kčah). Kdriêk ăt mkŏ mjing mâo 74 klei bi hmô ba yua klei kreh knhâo, kdrăp mă bruă mrâo mrang, mjeh jăk pla mjing lehanăn mjeh mnơ̆ng rông mâo klei tŭ dưn hĭn. Klei hdĭp mda mnuih ƀuôn sang mâo klei bi mlih klă sĭt. Mơ̆ng anăn, đru mguôp hlăm klei tŭ dưn hlue ngă hdră mtrŭn mơ̆ng klei bi kƀĭn prŏng Đảng kdriêk Krông Ƀŭk, wưng thŭn 2020-2025 mâo kčah leh, mkŏ mjing alŭ wăl đĭ kyar hĭn./.