Jing sa hlăm dŭm êpul hgŭm bruă ba anăp hlăm klei mlih mrâo čiăng bi djŏ hŏng klei bi mnia mblei, Êpul hgŭm bruă lŏ hma Công bằng Ea Tu, ƀuôn prŏng Ƀuôn Ama Thuôt, čar Daklak mâo leh dŭm klei tŭ dưn. Êbeh 320 hec-ta kphê mâo klei bi hgŭm hŏng mnuih ƀuôn sang, Êpul hgŭm bruă mkŏ mjing klei duh mkra pla mjing, hlăm bruă dlăng kriê wiê ênăk hlŏng truh kơ hrui pĕ, mkra mjing boh kphê leh hrui pĕ, truh kơ bruă kwă kpŭng kphê, mkra kpŭng kphê lik… Djăp ênoh čuăn FLO hlăm klei bi mnia mblei hŏng ala tač êngao. Trần Đình Trọng, Khua êpul hgŭm bruă brei thâo, mbĭt hŏng klei ngă jih jang bruă bi hgŭm, truh kơ klei bi mnia mblei, Êpul hgŭm bruă mâo dưn yua leh jih klei găl mơ̆ng hla pŏk pioh hâo hưn lehanăn mkŏ mjing anăn knăl bruă knuă:

Hmei hrŏng ruah phung mda asei nao mŭt mă bruă diñu jing phung mưng leh mă bruă mơ̆ng ƀuôn prŏng Hồ Chí Minh wĭt mkŏ mkra hdră êlan bi mnia mblei hŏng elektronik, lehanăn ba yua klei Angle. Mơ̆ng anăn dưi hưn mdah hlam hla pŏk yang ƀuôn lehanăn hlăm websize. Hmei mâo leh dŭm êpul bruă hlăm ala čar, lehanăn mơ̆ng ala tač êngao thâo kơ kphê Ea Tu. Mơ̆ng anăn diñu srăng bi tuôm hŏng pô, lehanăn mâo klei bi mnia mblei, mơ̆ng anăn mơh pô dưi lŏ mđĭ hĭn ênoh mâo ba wĭt”.

Hŏng klei găl jing lu mnuih mă bruă dôk mda thŭn sơăi, jhŏng mĭn jhŏng ngă, Êpul bruă hgŭm lŏ hma lehanăn anôk bruă hiu čhưn ênguê Phú Nông - Buôn Đôn, kdriêk Buôn Đôn, čar Daklak mpral mâo mkŏ mjing leh “Hla kak rup lăn mrô” dưi bi mguôp ngă klei hưn mdah dŭm mta mnơ̆ng mơ̆ng êpul hgŭm bruă mâo, hlăm anôk mă bruă hŏng mrô. Hlăm dŭm hla pŏk web, youtube, zalo …, mơ̆ng anăn êpul hgŭm bruă mâo lu mnuih thâo. Trần Văn Toàn, Khua êpul gơ̆ng kiă kriê êpul hgŭm bruă lač, anei jing sa hdră duh mkra mnia mblei ênuk mrâo mrang, truăn kơ bruă lehanăn jăk:

 “Hmei mkŏ mkra leh hla pŏk web, fanpage, êpul zalo, facebook… čiăng kơ mơ̆ng anăn dưi bi lar truh dŭm klei kreh knhâo kñăm mđĭ hĭn klei thâo săng hlăm bruă duh mkra. Mơ̆ng anăn mnuih mă bruă thâo bi đru lŏ bi lar bruă knuă mơ̆ng êpul hgŭm, čiăng kơ mnuih blei yuathâo lehanăn đăo knang ba yua mnơ̆ng pô čhĭ hŏng klei êđăp ênang hĭn lehanăn jăk hĭn”.

Tui si Nguyễn Thiên Văn, K’iăng khua knơ̆ng bruă sang čư̆ êa čar Daklak, êjai hlăm klei dôk bi ktưn mơ̆ng klei bi mnia mblei ară anei, dŭm êpul hgŭm bruă mâo leh klei thâo săng klă kơ bruă ba yua kdrăp mrâo mrang hlăm klei duh mkra. Lu êpul hgŭm bruă lŏ hma thâo ba yua leh hlăm hdră krih êa mkiêt mkriêm, bi mthu boh mnga leh hrui wĭt, mkra mjing kphê hŏng hnơ̆ng jăk… Dŭm êpul hgŭm bruă lŏ hma, phung duh mkra mnia mblei mâo leh hdră êlan bi mlih kdrăp mă bruă mrâo mrang, nao hlăm klei duh mkra mnia mblei kluôm. Mbĭt hŏng anăn, mđĭ kyar kdrăp mă bruă mrâo mrang, dŭm êpul hgŭm bi kjăp bruă ba yua hdră mă bruă mrô kơ klei hưn mdah, bi mnia mblei hŏng elektronik.

Wưng leh êgao, dŭm êpul bruă hlăm čar Daklak hgŭm hŏng anôk duh mkra mnia mblei, hlăm phŭn bruă mnia mblei mkŏ mjing leh lu bruă mjuăt bi hriăm klei thâo hlăm bruă mrô, mkra mjing anăn knăl, mđĭ klei hing ang kơ anôk bruă, êpul hgŭm ngă bruă hlăm čar. Nguyễn Thiên Văn brei thâo, čar srăng đru kơ dŭm êpul hgŭm bruă nao hlăm bruă mrô wưng tinăp:

 “Ară anei hlăk dôk mkra hdră čiăng mâo klei bi đru lu hĭn mkŏ mjing dŭm êpul hgŭm bruă mâo klei bi hmô jăk. Boh nik jing ba êlan êlâo hlăm bruă bi mlih mrô, ba yua kdrăp mrâo mrang hlăm bruă knuă , kơ klei mkŏ mjing anăn knăl mnơ̆ng mnuă pô mkra mjing , mkŏ mkrĭng mrô knăl krĭng pla mjing , ba yua kdrăp mrâo kơ jih jang anăn knăl, ƀrư̆ ƀrư̆ đuĕ nao knar hŏng arăng, ba wĭt boh tŭ dưn prŏng kơ mnuih pla mjing lehanăn phung duh mkra”.

Jih jang klei dôk gĭr bi mlih mrô mơ̆ng dŭm êpul hgŭm bruă ti čar Daklak hlăk mjing leh djăp klei găl hlăm bruă kiă kriê, đru bi hrŏ klei tŭ dưn kơ dŭm êpul hgŭm bruă. Boh nik ba yua kdrăp mrâo hlăm klei hưn mdah kơ boh tŭ dưn bruă knuă mă, mjing lu klei găl hĭn, mâo anôk mnia mblei mrâo, klei tŭ dưn mrâo, lehanăn mkŏ mjing anăn knăl kơ jih jang mnơ̆ng pô mkra mjing ti Daklak./.