Yap truh ti wưng anei, klei ŭn ruă tian ô̆ eh mâo leh hlăm dŭm boh ƀuôn hgŭm, čar Daklak, ba bi rai leh truh êbeh 1.000 drei ŭn mơ̆ng hlăm brô 100 gŏ sang. Đặng Thị Thủy, K’iăng khua knơ̆ng bruă lŏ hma lehanăn wăl hdĭp mda čar Daklak brei thâo, bruă gang mkhư̆ klei ruă tưp mâo mđĭ hĭn amâo mâo djŏ knŏng răng mgang kơ bruă rông mnơ̆ng, rơ̆ng kơ mnơ̆ng ƀơ̆ng jing doh, ƀiădah lŏ kơrŭ wĭt bruă bi čhĭ mnia kđeh čĭm:

 “Anei jing klei đru mnuih ƀuôn sang hơĭt ai tiê hlăm bruă rông mnơ̆ng, msĕ mơh tơdah kđeh čĭm mâo ba čhĭ, mơ̆ng dŭm anôk čuh tă. Ară anei, hmei hlăk hyuă kjăp bruă ksiêm dlăng hnơ̆ng doh mnơ̆ng ƀơ̆ng, kñăm jih jang kđeh čĭm dưi truh hŏng mnuih blei ƀơ̆ng hŏng klei êđăp ênang, djŏ klei tŭ dưn. Anei jing klei jăk, đru kơ mnuih yua hơĭt ai tiê hĭn.”

Mbĭt hĭng klei ksiêm dlăng tal êlâo mơ̆ng êpul bruă mdrao mgŭn mnơ̆ng rông, êđăp ênang hlăm bruă gang mkhư̆ klei ruă tưp ti dŭm anôk čuh tă, mâo hlue ngă kjăp, mâo klei kăp ksiêm sĭt êmĭt. Phạm Quốc Thương – khua anôk čuh ta mnơ̆ng rông ti alŭ Tân Hiệp, ƀuôn hgŭm Tân An, čar Daklak brei thâo, čiăng kơ bruă gang mkhư̆ klei ruă tưp ŭn rua tian ô̆ eh, anôk bruă anei mđing hĭn leh kơ phŭn agha anôk rông ŭn:

        “Jih jang ênoh ŭn ba čuh tă mâo klei ksiêm dlăng kjăp. Ŭn ba mơ̆ng dŭm anôk rông prŏng bi thâo klă phŭn agha, amâo mâo djŏ ŭn duah blei mă plă plia ôh, mơ̆ng anăn mơh hơĭt ai tiê hlăm klei čhĭ kđeh čĭm ŭn, mđing kơ boh tŭ dưn, mâo wăt phung kiă kriê anôk bruă mdrao mgŭn mnơ̆ng rông mkă dlăng, snăn anôk hmei čuh tă dưi djăp ênoh čuăn.”

Ŭn mâo klei ruă tian ô̆ eh, bluh đĭ hlăm lu anôk ti čar Gia Lai. Êngao kơ klei ba klei luič liê kơ mnuih rông ŭn, klei ruă tưp anei lŏ hmăi amâo mâo jăk kơ phung duh mkra, phung čhĭ mnia lehanăn lu mnuih blei ƀơ̆ng čĭm dôk hyưt kơ hnơ̆ng jăk lehanăn klei amâo mâo doh mơ̆ng kđeh čĭm ŭn.

Huỳnh Ngọc Diệp, Khua anôk bruă rông mnơ̆ng lehanăn mdrao mgŭn mnơ̆ng rông čar Gia Lai, brei thâo, êpul bruă hlăk mâo klei bi mguôp kjăp hŏng dŭm alŭ wăl mâo hdră gang mkhư̆ klei ruă tưp hŏng jih hnơ̆ng. lehanăn dŭm êpul bruă djŏ tuôm srăng mđĭ hĭn klei ksiêm dlăng, ti dŭm anôk čuh tă lehanăn čhĭ mnia kđeh čĭm ŭn.

 “Leh mâo păn kjăp ênoh ŭn mâo čuh tă hlăm dŭm anôk čuh tă ti alŭ wăl, snăn ƀuh jing hrŏ hĭn mkă hŏng dŭm mlan êlâo. Dhar bruă mâo nanao klei mtă mtăn mnuih ƀuôn sang thâo kơ klei ruă tưp ŭn ô̆ eh amâo mâo tưp kơ mnuih ôh, snăn mnuih ƀuôn sang hơĭt ai tiê rông lehanăn ƀơ̆ng čĭm ŭn, bi hrŏng ruah kđeh čĭm ŭn doh, dŭm anôk čhĭ mnia mâo klei hing ang jăk, anôk mâo leh klei ksiêm dlăng kjăp kơ klei ruă tưp, kñăm dưi mâo kđeh čĭm ŭn doh.”

Tui si klei hâo mdah mơ̆ng Phŭn bruă lŏ hma lehanăn wăl hdĭp mda, ară anei kluôm ala mâo leh giăm 1 êbâo anôk mâo klei ruă tưp kơ ŭn hlăm 34 boh čar, ƀuôn prŏng. Êbeh 330.000 drei ŭn ba bi rai. Ti anăp klei ruă tưp ŭn ô̆ eh bluh đĭ pral hlăm kluôm ala, k’iăng khua knŭk kna Trần Hồng Hà mrâo mă leh bruă hŏng phŭn bruă lŏ hma lehanăn wăl hdĭp mda, dŭm phŭn dhar bruă djŏ tuôm kơ boh klei ŭn ruă tưp ô̆ eh, čiăng bi mâo hdră êlan djŏ guôp gang mkhư̆, mghaih msir klei ruă tưp, hlăm anăn mđing mă mkă dlăng mta klei ruă, mâo ênoh čuăn mkă hnơ̆ng klei ruă tưp, klei dưi bi êdah hưn kơ klei ruă tưp truh hlăm dŭm boh ƀuôn hgŭm, čar lehanăn gưl dlông, ba mdah hong knŭk kna mtrŭn hră mơar mâo hdră êlan bi mlih, thiăm mbŏ klei bhiăn, hdră êlan mă bruă bi djŏ hlăm bruă sang čư̆ êa dua gưl./.