Krĭng mnuih djuê ƀiă ti kdriêk čư̆ čhiăng Khánh Vĩnh (hđăp) jing krĭng dleh dlan, mnuih ƀuôn sang hdĭp knang kơ bruă lŏ hma, hliê điêt, čŏng mkăp mă pô. Bruă mkŏ mjing klei mkra mjing hluê krĭng pla mjing amâodah boh tŭ ka dưi mkŏ mjing. Lu gŏ sang ngă bruă hŏng klei mưng, hlei ktang hlei mă.

Hlăm wưng anăn, klei bi hmô mkŏ plah wah knơ̆ng bruă duh mkra mnia mblei boh kroh leh anăn boh mnga Ngân Nguyễn hŏng 23 gŏ sang mnuih djuê ƀiă ti ƀuôn hgŭm Khánh Vĩnh pla êbeh 20ha boh kruĕ dŭng dưi ba wĭt lu boh tŭ dưn jăk. Knơ̆ng bruă mkăp brei mjeh, hbâo pruê, êa drao krih, mtô brei hdră mnêč pla mjing, mbĭt anăn ba čhĭ jih jang mnơ̆ng dhơ̆ng leh hrui êmiêt. Dŭm gŏ sang dưi mâo klei hriăm klei kriê dlăng, yua hbâo pruê djŏ, čih pioh klei mkra mjing. Anei jing klei mơ̆ng êlâo dih mnuih ƀuôn sang ƀiă uêñ mĭn. Knơ̆ng bruă nao hgŭm mơ̆ng êlâo đru kơ mnuih ƀuôn sang mâo hdră êlan klă nik, ñĕ kơ klei amâo mâo boh mnga amâodah êbeh đei. Aduôn Nguyễn Thị Ngân, khua knơ̆ng bruă duh mkra mnia mblei boh kroh leh anăn boh mnga Ngân Nguyễn brei thâo:

Ngă hdră mtô kơ hdră mnêč pla mjing, jih jang dŭm klei pruê hbâo leh anăn krih êa drao mâo phung kỹ sư leh anăn phung ayŏng adei hlăm đang pla mjing hưn kơ mnuih ƀuôn sang kơ phŭn agha. Mbĭt anăn hlăk mblang kơ mnuih ƀuôn sang thâo drei yua hbâo brŭ si srăng jăk leh anăn si ngă hnơ̆ng jăk boh mnga. Mkăp brei mnơ̆ng dhơ̆ng doh čiăng kơ mnuih ƀuôn sang đĭ kyar, mnuih ƀuôn sang thâo leh anăn mưng hŏng bruă mkra mjing mnơ̆ng dhơ̆ng doh.

Leh giăm 2 thŭn ngă klei mkŏ, hŏng klei đru mơ̆ng hdră ala čar kñăm, klei bi hmô anei dưi ba wĭt boh tŭ dưn. Lu gŏ sang mnuih Raglai, Êđê êlâo dih knŏng pla hbei ƀlang, ktơr, ară anei pla mjing dŭm mta ana mâo ênoh, hnư hrui wĭt đĭ dua blư̆, 3 blư̆ mkă hŏng êlâo dih. Amâo djŏ knŏng mkŏ hŏng knơ̆ng bruă, ti ƀuôn hgŭm Trung Khánh Vĩnh, klei bi hmô Êpul hgŭm bruă lŏ hma mtah Khánh Trung ăt dôk ngă bruă tŭ dưn. Êpul hgŭm bruă anei mâo êbeh 20 čô hgŭm hrăm mbĭt ngă bruă lŏ hma leh anăn mkăp brei dŭm mta bruă msĕ si klei tŭk knă, dŭ mdiăng, mnơ̆ng yua bruă lŏ hma, anôk mdei msăn kơ phung tuê hiu čhưn ênguê.

Bruă mkŏ phung ƀĭng hgŭm amâo djŏ knŏng đru bi hrŏ ênoh bi liê ƀiădah lŏ đru ba čhĭ boh mnga hluê si êpul, ênoh ênil đĭ mnơ̆ng dhơ̆ng. Klei năng mđing jing êpul hgŭm bruă anei bi mguôp mbĭt mkra mjing bruă lŏ hma hŏng mđĭ kyar bruă mkăn. Đang pla mjing Hoa Quả Sơn mơ̆ng Lê Thị Kim Thanh jing sa klei bi hmô. Mơ̆ng knŏng pla mjing ana ƀơ̆ng boh, ñu jhŏng mlih jing bruă lŏ hma doh bi mguôp hŏng bruă hiu čhưn ênguê. Phung tuê nao dlăng đang pla mjing dưi pĕ boh, tŭk knă, mdei msăn mbĭt hŏng dŭm gŏ sang mnuih tinăn. Lê Thị Kim Thanh lač, grăp mta bruă mâo phung hgŭm hlăm êpul hgŭm bruă klam ngă.

 “Hlăm êpul hgŭm bruă mâo klei bi mguôp kjăp, đru kơ phung tuê hriê ti Trung Khánh Vĩnh  dưi mâo bruă jăk hĭn mơ̆ng klei blei ba yua. Kyua klei bi hmô êpul hgŭm bruă anei mkŏ mjing jang phung hlăm klei čiăng leh anăn klei găl đru kơ phung tuê hiu čhưn ênguê, amâo dưi ngă jih grăp čô ngă sa bruă leh anăn bi mguôp mbĭt.

Dŭm klei bi hmô điêt ƀiădah boh tŭ dưn prŏng brei ƀuh, mkŏ yơh jing kliăng đru kơ krĭng mnuih djuê ƀiă bi mlih hdră mă bruă. Êjai mnuih ƀuôn sang hrăm mbĭt mkŏ mjing klei mă bruă, bi ba čhĭ mnơ̆ng dhơ̆ng, ênoh boh mnga srăng dưi mđĭ, ai tiê bi mguôp dưi ksul mbŭ. Hrô kơ čŏng bluh mâo, mnuih ƀuôn sang mưng hŏng hdră mkra mjing, rơ̆ng kơ hnơ̆ng tŭ jăk leh anăn klei čiăng anôk mnia mblei.

Nao hgŭm hlăm klei mkŏ čiăng kơ mnuih ƀuôn sang ngă djŏ hdră êlan, mâo bruă klam hŏng mnơ̆ng pô mkra mjing. Hluê anăn mkŏ mjing klei mkra mjing – ba čhĭ krip, mđĭ kơhưm boh mnga krĭng čư̆ čhiăng ti anôk mnia mblei. Yuôm bhăn hĭn, dŭm klei bi hmô anei dôk đru bi klă hdră ala čar kñăm mđĭ kyar krĭng mnuih djuê ƀiă. Hlăm anăn, mđĭ hdră duh ƀơ̆ng, mkŏ mjing bruă mă leh anăn mđĭ hnư hrui wĭt jing mta kñăm.

Nguyễn Ngọc Sơn, k’iăng khua knơ̆ng bruă djuê ana leh anăn klei đăo čar Khánh Hoà bi klă, truh kơ ară anei, mnuih ƀuôn sang amâo lŏ mâo ôh klei đru sa tĭng ƀiădah dưi mtrŭt mjhar klei mkăp brei, mâo bruă đua klam, mơ̆ng anăn mkŏ mjing klei mưng mkra mjing thơ̆ng kơ bruă, hơĭt kjăp.

 “Knŭk kna amâo mâo đru kluôm ôh ƀiădah mnuih ƀuôn sang ăt bi mkrum mguôp, mkăp brei sa kdrêč čiăng ngă klei bi hmô. Kâo lač anăn jing hdră jăk hĭn čiăng bi mlih klei mĭn, êjai mnuih ƀuôn sang mâo prăk pô hlăm anăn, diñu srăng mâo bruă klam hĭn hŏng ngăn drăp dưi đru. Anei ăt jing hdră pral hĭn čiăng kơ mnuih ƀuôn sang thâo săng leh anăn bi mguôp hŏng gru hmô mkra mjing.”

Krĭng čư̆ čiăng čar Khánh Hoà dôk mâo dŭm klei mlih jăk. Êjai knơ̆ng bruă, êpul hgŭm bruă leh anăn mnuih ƀuôn sang hrăm mbĭt bi mguôp, bruă mđĭ kyar bruă lŏ hma amâo lŏ jing klei hjăn păn. Hrăm mbĭt mă bruă knuă jing êlan nao mbĭt, đru kơ mnuih ƀuôn sang jing mnuih djuê ƀiă ngă pô hdră duh ƀơ̆ng, ƀrư̆ ƀrư̆ đĭ kyar hơĭt kjăp.