Hơô ao mđao, đua mu, guôm jih bô̆ mta, asei mlei čiăng răng mgang klei suaih pral hlăk yan adiê trŭn dôk 10 độ, Nguyễn Thị Yến, mnuih hgŭm Hlăm Êpul bruă Lŏ hma alŭ Ngăm Mạc, să Lãng Ngâm, kdriêk Gia Bình (Bắc Ninh) djă sô toi lehanăn êya jê leh ƀhĭ hluê djŏ hdră hluê si klei ktrâo lač mơ̆ng knuă druh mtrŭt mjhar bruă lŏ hma ba krih êa đang boh trŏnh msăm, djam bei dơ̆ng hrui êmiêt kñăm gang mkhư̆ klei mnơ̆ng ngă. Amai Yến brei thâo, leh mâo knuă druh mtrŭt mjhar bruă ngă lŏ hma lehanăn phung thơ̆ng kơ bruă mnuih Japon wĭt ktrâo lač kơ hdră mnêč, hdră pla hluê hnơ̆ng čuăn doh mơ̆ng Japon, amai ƀuh hnơ̆ng mâo boh mnga, ênoh čhĭ ăt đĭ hĭn.

Pla mjing hluê hnơ̆ng čuăn mơ̆ng Japon amâo dleh. Hmei ngă djŏ hdră mnêč, čih hlăm hdruôm hră, amâo krih êa drao hóa học ƀiădah brei jê êya, toic ciăng gang mkhư̆ mnơ̆ng ngă. Ƀuh tŭ dưn êdi.

Êpul hgŭm bruă lŏ hma alŭ Ngăm Mạc, să Lãng Ngâm, kdriêk Gia Bình (Bắc Ninh) jing sa hlăm dŭm Êpul hgŭm mâo leh Anôk mtrŭt mjhar bruă ngă lŏ hma ala čar lehanăn Anôk bruă bi hgŭm quốc tế Japon Jica đru čiăng mjuăt bi hriăm ƀĭng ngă lŏ hma pla mjing mnơ̆ng hluê si hdră doh mơ̆ng Japon lehanăn ƀrư̆ bi mlih wăl anôk na čhĭ hluê hdră “Pla čiăng čhĭ” amâo djŏ “Čhĭ mnơ̆ng pô pla”.

Phan Duy Phượng, Khua Êpul hgŭm bruă alŭ Ngăm Mạc, să Lãng Ngâm, kdriêk Gia Bình (Bắc Ninh) brei thâo, čiăng mprăp kơ wăl anôk mnia mblei hruê Têt djuê ana Giáp Thìn 2024, Êpul hgŭm bruă mprăp leh mnơ̆ng truh 200 ton boh kruê̆ cam Canh, giăm 300 ton djam mtam boh kroh djăp mta, ƀuăn rơ̆ng klei doh êƀăt hluê hnơ̆ng čuăn VietGAP, mâo tem bi mklă anôk pla mjing:

Êlâo adih pla djam djăp mta, mơ̆ng leh Jica hriê tinei ngă bruă jăk hĭn, kluôm hŭn, mâo boh tŭ dưn hĭn, hmei mđĭ kyar leh bi knar lehanăn amâo mâo klei mnơ̆ng ngă, djam mtam boh kroh doh s’aĭ, dŭm klei kuôl kă blei mnơ̆ng amâo mâo djăp mnơ̆ng čiăng ba čhĭ. Têt anei hmei pla mâo hnơ̆ng mơh amâo mâo lu ôh, rơ̆ng mkăp djăp kơ nuih blei yua djam mta tii Êpul hgŭm bruă hmei tinei, jing djam mtam doh.

Ti Êpul hgŭm bruă pla mjing lehanăn mnia mblei mnơ̆ng lŏ hma doh Bạch Đằng, alŭ Đại Uyên, să Bạch Đằng, wăl krah Kinh Môn (Hải Dương), dŭm đang boh guga kđeh hrah prŏng msĕ si krĭng kwar Dhŭng. Boh guga jing boh mâo lu mnuih khăp blei čiăng mprăp kơ hlao mnơ̆ng dhơ̆ng hruê Têt. Nguyễn Văn Thuấn, Khua Êpul hgŭm bruă pla mjing lehanăn mnia mblei mnơ̆ng lŏ hma doh Bạch Đằng brei thâo, boh guga ti alŭ wăl mâo klei găl hĭn, mâo hnơ̆ng tŭ jăk hĭn mkă hŏng boh guga dưi pla ti krĭng kwar Dhŭng.

Pla mklăk hŏng yan tŭ dưn êdi, čhĭ mâo ênoh yuôm hĭn. Dưi lač, klei bi ktưn snăn mâo lu klei jăk găl hĭn mkă hŏng boh guga ti kwar Dhŭng. Mơ̆ng kwar Dhŭng ba čhĭ tinei hriê dŭm hruê mơh, hlăk boh guga ti kwar Dưr lui ksă ti ana, kyua anăn hnơ̆ng tŭ jăk hĭn, čhĭ mâo ênoh hĭn snăn klei bi ktưn mnia mblei jăk hĭn mơh.

Mơ̆ng hdră ksiêm dlăng gru hmô ti Bắc Ninh, Hải Dương, Hưng Yên, Naoki Kayano, pô thơ̆ng kơ bruă mơ̆ng JICA bi mni klei nao hgŭm mơ̆ng ƀĭng ngă lŏ hma, dŭm êpul hgŭm bruă lehanăn boh nik klei sa ai mơ̆ng anôk mtrŭt mjhar bruă ngă lŏ hma. Ñu lač snei, wưng Têt anei klei čiăng mnơ̆ng mơ̆ng wăl anôk mnia mblei đĭ lu lehanăn jing klei găl ba čhĭ mnơ̆ng lŏ hma mơ̆ng mnuih ƀuôn sang. Mnuih pla mjing brei thâo klă klei čiăng mơ̆ng wăl anôk mnia mblei hluê hdră mtô mblang. JICA srăng mă bruă hŏng Anôk mtrŭt mjhar bruă ngă lŏ hma ala čar čiăng mkŏ mjing djăp bruă djŏ tuôm msĕ si bi mkŏ hgŭm, klei bi kƀĭn trông kñăm mtrŭt mđĭ kyar hĭn bruă lŏ hma ti Việt Nam.

Hluê si Khua knơ̆ng bruă mtrŭt mjhar bruă ngă lŏ hma ala čar Lê Quốc Thanh, mơ̆ng dŭm boh tŭ dưn wưng tal êlâo, hlăm wưng ti anăp, Anôk mtrŭt mjhar bruă ngă lŏ hma ala čar lehanăn Êpul Jica lŏ dơ̆ng pŏk mlar hdră ngă anei kơ dŭm Êpul hgŭm lehanăn ƀĭng ngă lŏ hma:

 “Ti anăp hmei srăng ruah thiăm 50 êpul hgŭm bruă lehanăn mjing krĭng pla mjing mơ̆ng drei, srăng pŏk mlar jing krĭng pla mjing doh. Lehanăn dŭm mta mnơ̆ng amâo djŏ knŏng hluê gưl, wưng drei srăng mâo mnơ̆ng lŏ hma pla mjing doh hlăm dăl jih thŭn”.

          Têt jing wưng blei yua dŭm mta mnơ̆ng lŏ hma, mnơ̆ng dhŏng đĭ, boh nik dŭm mta djam mtam, boh kroh hluê si doh mơ̆ng Japon srăng mâo wăl anôk mnia mblei mđing blei yua lu. Dŭm êpul hgŭm bruă lŏ hma brei thâo srăng krơ̆ng kjăp bruă pla mjing mnơ̆ng lŏ hma doh dăl hlăm jih thŭn čiăng mkăp kơ mnuih blei yua amâo djŏ knŏng hlăm wưng Têt anei./.