Phung bi ala čar Long An mñă kơ Phŭn bruă lŏ hma leh anăn mđĭ kyar krĭng ƀuôn sang, Phŭn bruă ngăn dŏ leh anăn wăl hdĭp mda ăt msĕ hŏn dŭm Phŭn, dhar bruă djŏ tuôm lŏ dơ̆ng uêñ mĭn kơ dŭm boh klei ti dŭm čar nah Dhŭng. Hluê anăn srăng mâo dŭm klei đru klă klơ̆ng.

Hlăm bruă duh mkra êpul, phung bi ala čar Long An brei thâo, alŭ wăl anei dôk mkŏ mjing dŭm êpul hgŭm bruă lŏ hma kñăm mjing klei bi mguôp mơ̆ng bruă mkra mjing doh truh kơ klei hrui pĕ, ba čhĭ, mkra mjing leh hrui pĕ…

Ƀiădah ai dưi mơ̆ng êpul hgŭm bruă amâo mâo djăp klei ktang kyua lu phung khua kiă kriê êpul hgŭm bruă jing ƀĭng ngă lŏ hma, kyuanăn amâo mâo dưi đĭ kyar msĕ hŏng klei hmăng hmưi. Sơnăn, dŭm Phŭn, dhar bruă gưl dlông, boh nik jing Phŭn bruă lŏ hma leh anăn mđĭ kyar krĭng ƀuôn sang čiăng mâo thiăm hdră êlan klă klơ̆ng đru kơ bruă duh mkra Êpul klă klơ̆ng jing akŏ kăp gai mơ̆ng bruă duh mkra bruă lŏ hma, msĕ si ai tiê hdră mtrŭn mrô 150 mơ̆ng knŭk kna jing bi mlih klei mĭn mkă mjing bruă lŏ hma jing klei mĭn bruă duh mkra bruă lŏ hma.

Hlăm klei đĭ kyar bruă lŏ hma, Lê Văn Nam, pô bi ala kdriêk Bến Lực, čar Long An lač, čiăng êdi ăt jing hmao hâo hưn kơ anôk mnia mblei hlăm lăn čar leh anăn ala tač êngao. Bi klă hlăm alŭ wăl, Lê Văn Nam brei thâo, kdriêk Bến Lực mâo 100.000ha boh kruê msăm amâo mâo asăr. Bruă ba čhĭ boh kruê̆ dưi mkŏ mjing klei bi hmô, ba čhĭ ti dŭm ala čar Ơrôp leh anăn krĭng Msăt Lăn. Biădah dŭm êpul hgŭm bruă hrui brei ăt jing klei duah ngă mă…kyuanăn dleh dưi bi klă ênoh ênil:

 “Anei ăt jing klei kpăk prŏng, Kyuanăn phung bi ala Long An ăt hmăng hmưi dưi mkăp brei thiăm klei hưn čiăng thâo klă dŭm anôk mnia mblei ala tač êngao lač leh kơ êlâo anăn. Mơ̆ng anăn mnuih ƀuôn sang dưi čŏng pô nao ti ala čar tač čiăng bi tuôm klă anăp leh anăn thâo čŏng pô bi klă ênoh boh mnga”.

      Hlăm klei mđĭ kyar bruă lŏ hma wăl krah hŏng dŭm klei bi hmô bruă lŏ hma kdrăp mrâpo mrang čiăng ênoh prăk lu êdi. Knơ̆ng bruă hlăm bruă lŏ hma čiăng mâo klei đru lĭng čan hluê si dŭm hdră yuôm bhăn mơ̆ng ƀuôn prŏng. Dŭm êpul hgŭm bruă lŏ hma, pô đang war dưi đru lĭng čan prăk mnga hdjul čiăng mkŏ wĭt ana pla mjing, mnơ̆ng rông hnơ̆ng điêt leh ană man dưn.

Ƀuôn prŏng Hồ Chí Minh mdưm mta kñăm mkŏ mjing klei bi mguôp ƀĭng ngă lŏ hma, êpul hgŭm bruă leh anăn knơ̆ng bruă mkăp brei boh mnga bruă lŏ ham hluê si êlan mđĭ kyar logistics bruă lŏ hma. Klei mkăp anei kñăm mđĭ kyar bruă mnia mblei, čhĭ mnia dŭm mta mnơ̆ng dhơ̆ng kơ bruă lŏ hma msĕ si: kdrăp yua, hbâo pruê, êa drao krih kơ ana pla mjing, mnơ̆ng yua sinh học plah wah ƀuôn prŏng Hồ Chí Minh hŏng dŭm alŭ wăl…Êlan nao anei srăng đru mkŏ wĭt bruă lŏ hma mơ̆ng ƀuôn prŏng Hồ Chí Minh leh anăn dŭm alŭ wăl nah Dhŭng. Ƀiădah čiăng mđĭ kyar bruă bruă lŏ hma ƀuôn prŏng čiăng mkŏ rŭ mdơ̆ng bruă mkŏ mkra ti lăn lŏ hma, boh klei anei dôk kpăk hŏng lu klei čuăn mơ̆ng ƀuôn prŏng Hồ Chí Minh amâo mâo dưi mgaih msir. Võ Hoàng Vũ, pô bi ala să Hưng Long, kdriêk Bình Chánh, ƀuôn prŏng Hồ Chí Minh hưn mthâo:

 “Mnuih ƀuôn sang hưn mdah dưi rŭ mdơ̆ng bruă mkŏ mkra êjai ti lăn lŏ hma, đru kơ bruă mkra mjing, dưn yua kdrăp mrâo mrang, msĕ si sang hjiê dưm mnơ̆ng, sang ñuăl, sang ală kĭng…hdră anei adôk mâo lu klei kpăk djŏ tuôm hŏng hră mơar rŭ mjing, klei huĭ hyưt mâo dŭm bruă mkŏ mkra soh hŏng hdră bhiăn. Kyuanăn, bruă mtrŭt mđĭ bruă lŏ hma ƀuôn prŏng adôk tuôm hŏng klei dleh dlan. Čiăng êdi Phŭn bruă lŏ hma leh anăn mđĭ kyar krĭng ƀuôn sang leh anăn dŭm phŭn dhar bruă djŏ tuôm mâo dŭm hdră êlan ruh mgaih čiăng kơ ƀĭng ngă lŏ hma mâo klei jhŏng, mâo klei hơĭt duh bi liê đĭ kyar hlăm wưng kơ anăp.”

Hlăm gưl ksiêm êmuh tlam hruê 6/11, Khua phŭn bruă Lŏ hma leh anăn mđĭ kyar krĭng ƀuôn sang Lê Minh Hoan lač, mâo đa đa mnuih ƀuôn sang pla dliê ti krĭng 2, krĭng 3 (dŭm să dleh dlan leh anăn dleh dlan hĭn ti krĭng mnuih djuê ƀiă leh anăn čư̆ čhiăng), klă klơ̆ng jing ti čar Bắc Cạn leh anăn đa đa čar mâo dliê, djŏ mâo ênoh prăk mưn phăn ngă bruă răng mgang dliê mơ̆ng thŭn 2021, ƀiădah truh kơ ară anei ak dưi mâo mă mơh. Mbĭt hŏng anăn, Phŭn bruă ăt hưn mdah kơ bruă mkra mlih 31 hnơ̆ng čuăn krĭng ƀuôn sang mrâo djŏ guôp hŏng dŭm boh sĭt mơ̆ng dŭm krĭng dleh dlan.