Y-Sanh Niê, djuê ana Ê Đê ti ƀuôn Pan, să Ea Yông, kdriêk Krông Pač (Daklak) pla leh kphê, tiu mơ̆ng sui. Ana tiu mnơ̆ng kreh ngă nanao snăn amâo mâo jăk đei mboh ôh, ênoh čhĭ kan hơĭt lei; bi kphê msĕ mơh kphê hđăp ana khua leh, dah lŏ čiăng pla mrâo anăn čiăng bi mâo hĕ sa ênoh prăk duh kơ bruă, snăn jing dleh dlan mơh. Thŭn   2011, Y-Sanh Niê jhŏng lŏ duh pla mbĭt ana boh durian pluă hlăm war kphê. Boh durian ênưih mơh pla, ƀiădah dah amâo mâo thâo dlăng kriê wiê ênăk, ăt ênưih mơh tuôm hŏng klei mnơ̆ng ngă, srăng djiê ana, amâodah mboh amâo mâo lu ôh, lehanănboh kăn jăk rei. Hŏng lan pla kphê mâo 1,7 ha, mâo leh 1.400 phŭn kphê lehanăn êbeh 400 phŭn tiu, ñu pla plua mâo 130 phŭn ana boh durian djuê Dona. Truh ti gưl ana boh durian leh bŏ adhan hlŏng bi êyui wăt kơ ana kphê mơh. Lehanăn dŭm thŭn kơ anei ñu mâo duiñ êbeh 10 tôn boh durian, 2 tôn kphê, 1,5 tôn tiu. Ñu brei thâo, leh kah hĕ kơ jih ênoh bi liê hlăm bruă blei hbâo pruê, êa drao hluăt, grăp thŭn ñu lŏ mâo ba wĭt mnga giăm 1 êklai prăk.   

 “Phŭn tal êlâo pô amâo mâo duh bi liê bi ŭk ăk ôh, kan rŭ lui rei ana kphê, knŏng pla boh durian pluă hlăm đang kphê. Grăp thŭn kphê mâo truh 1 tôn mkrah, thŭn anei năng ai mâo 2 tôn. Tĭng jih jang mâo mơ̆ng 500 – 600 êklăk prăk”.

Bi Y-Mi Êban ti ƀuôn Ea K’mat, să Hoà Đông, kdriêk Krông Pač ăt pla tiu pla hlăm war kphê. Êjai bruă pla mjing boh durian hlăk hlê đĭ lu, snăn ñu knŏng nao blei mă hlăm brô 40 phŭn ana boh durian mjeh Dona ba wĭt pla pluă hlăm đang kphê. Ăt tui tiŏ knŏng hdră pla pluă hlăm đang kphê lehanăn tiu. Ară anei, ñu mâo pla truh 120 phŭn ana boh durian, krơ̆ng ênŭm 900 phŭn kphê lehanăn 200 phŭn tiu hlăm hma ñu 1,4 ha. Ñu brei thâo, hma ñu anei mâo ba wĭt jih jang giăm 1,5 tỷ prăk hlăm grăp thŭn.

 “Hŏng bruă klam jing sa čô đảng viên snăn pô bi ba êlan êlâo yơh hlăm klei duh ƀơ̆ng čiăng kơ mnuih ƀuôn sang tui hlue. Êjai pla pluă boh durian, tiu, kphê, jih jang ăt hơ̆it, boh durian thŭn anei mâo hlăm brô 10 tôn, mkă hŏng ênoh čhĭ ară anei mâo mkơh mơ̆ng 1 êklai truh 2 êklai prăk”.

Mbĭt hŏng klei duah klei sah mdrŏng kơ gŏ sang pô, Y-Sanh Niê lehanăn Y-Mi Êban mprăp nanao ai tiê kăp đru mnuih ƀuôn sang hlăm hdră dlăng kriê wiê ênăk mnơ̆ng pla, đru prăk kăk lehanăn êđai mjeh... Pioh mđĭ kyar klei hdĭp mda, msir klei ư̆ êpa bi hrŏ klei ƀun knap. Y-Niêm Niê – Khua adŭ bruă lŏ hma kdriêk Krông Pač lač, Y-Sanh Niê lehanăn Y-Mi Êban jing đảng viên thâo ba akŏ nanao hlăm bruă mđĭ kyar klei hdĭp mda bi hrŏ klei dleh dlan.

 “Ti kdriêk Krông Pač mâo lu đảng viên thâo duh ƀơ̆ng, hlăm anăn mâo Y-Sanh ti să Ea Yông lehanăn Y-Mi ti să Hoà Đông. Ti anôk bi trông kơ hdră dlăng kriê wiê ênăk bruă pla mjing hŏng mnuih ƀuôn sang djuê ƀiă, hmei brei phung thâo bi hmô anăn yơh jing anôk mnuih ƀuôn sang tui dlăng lehanăn hlue ngă, pioh mđiư̆ kyar klei hdĭp pô”.

Klei jhŏưng pla pluă boh durian hlăm hma kphê, tiu msĕ hŏng gŏ sang Y-Sanh Niê lehanăn Y-Mi Êban ởti kdriêk Krông Pač mâo ba wĭt leh klei tŭ dưn jăk kơ klei hdĭp mda, ba wĭt ênoh hrui wĭt hơĭt. Digơ̆ tlaih leh mơ̆ng klei dleh dlan, lehanăn hdĭp nana hlăm klei thâo bi hmô jăk, čiăng kơ jih jang mnuih hlăm ƀuôn dlăng lehanăn tui hriăm./.