Khădah mưng leh dŭm pluh thŭn pla mjing mnga sŭng gơr, ƀiădah Lê Niê Minh Quân, ti să Čư̆ Êbur, ƀuôn prŏng Ƀuôn Ama Thuôt, čar Daklak dôk rŭng răng mơh kơ yan mnga thŭn anei, kyuadah adiê êăt lehanăn lu angĭn. Čiăng bi hrŏ klei luič liê kyua adiê êăt hŏng mnga sŭng gơr, Quân kah leh lu mmông kăp ktuê dlăng, bi mlih hdră dlăng kriê, kñăm mjing klei găl kơ mmông čuh blang mnga bi siam, Quân lač:

 “Ară anei hlăk dôk ktuê dlăng, lehanăn dlăng kriê knuh mnga, čiăng kơ gưl čuh mblang mnga bi siam hĭn, snăn kơh mâo lu mnuih khăp lehanăn blei”.

 Mbĭt hŏng mnga sŭng gơr, mnga đào, mnga cúc đại đoá ăt mâo lu mnuih ti daklak ruah pioh bi msiam hlăm hrue tết. Dŭm abŭ mnga cúc đại đoá mâo boh prŏng 1m2 truh 1m5 djŏ leh ti hnơ̆ng man čĭng leh êbeh 5 mlan pla mjing. Wưng anei dưi yap jing yuôm bhăn hĭn pioh bi mklă hnơ̆ng jăk mơ̆ng mnga, lehanăn čhĭ srăng mâo ênoh. Kyuanăn, dŭm phung pla mjing mnga cúc đại đoá pioh čhĭ Tết msĕ hŏng Nguyễn Thanh Hùng, să Čư̆ Êbur, ƀuôn prŏng Ƀuôn Ama Thuôt, čar Daklak bi dlăng kriê ƀhĭ klĭ hĭn. Dơ̆ng mơ̆ng grăp pŏk la kñĭ khua, truh kơ knuh mnga amâo mâo jăk srăng khăt lui hĕ, mjing anôk mbŏ hnơ̆ng tŭ jăk kơ dhan mnga mkăn čuh blang mnga prŏng siam hĭn. Nguyễn Thanh Hùng lač:

 “Wưng anei jing wưng knhal tuič, snăn phung pla mjing ktuh êyuh mjut mjing bi jăk. Kâo dlăng kriê mnga si srăng ngă kơ hla mnga siam mơh, mnga čuh blang amâo mâo hluăt ƀơ̆ng mnơ̆ng ngă ôh, ciăng kơ mnga čuh blang siam hĭn truh kơ kngan mnuih blei. Mnuih blei srăng ruah abŭ mnga siam hĭn pioh blei”.

Ti krĭng pla mnga Khánh Xuân, ƀuôn hgŭm Khánh Xuân, ƀuôn prŏng ƀuôn Ama thuôt, čar Daklak, mơ̆ng akŏ mlan 9 – 10 hlue mlan ƀlĕ, phung pla mnga rah mjing leh dŭm mta mnga pioh čhĭ msĕ si: Cúc mâm xôi, cúc vạn thọ, phong lữ thảo, …. Pioh čhĭ kơ wưng Tết Nguyên đán. Phạm Thị Kiều Diễm, Anôk mjut mjjing mnga Hà Mi, ƀuôn hgŭm Khánh Xuân brei thâo, ñu mâo rah mjing truh  2.000 abŭ mnga cúc mâm xôi. Khădah yan adiê mâo ƀiă klei amâo mâo jăk ôh, ƀiădah hŏng klei juăt mưng leh hlăm bruă pla mnga, truh kơ ară anei, dŭm abŭ mnga ăt mâo klei čăt đĭ siam, năng ai mprăp djăp mnga čhĭ hlăm yan tết. Ñu čang hmăng hlăm wưng Tết Nguyên đán klei bi čhĭ mnia mnga srăng mjhĭt m’uăt hĭn , lehanăn srăng ba wĭt klei tŭ dưn kơ mnuih pla mnga:

 “Plka mjing ăt msĕ hŏng yăng đar thŭn mơh, amâo mâo lŏ thiăm kăn lŏ mtrŭn rei. Čhĭ mnia ăt hŏng ênoh msĕ si yăng đar thŭn mơh. Ƀuh phung hriê blei cuă dlăng leh lu mơh. Hriê ksiêm dlăng lehanăn ruah ti abŭ srăng blei. Phung pla mjing mnga hmăng hmưi mâo lu mnuih hriê ruah blei mnga hĭn”.

Khădah tuôm hŏng lu klei dleh dlan kyua adiê amâo mâo jăk, ƀiădah phung pla mjing mnga ti čar Daklak ăt hur har hŏng bruă mjut mjing mnga pô, hŏng klei čang hmăng mâo čhĭ jăk lu mnuih blei. Hŏng kiê kngan mbruă dôk mjut mjing khăt mkra mnga srăng mjing dŭm abŭ mnga siam kơ grăp gŏ sang pioh duh mnga hlăm wưng Tết truh yan mnga hriê./.