Dah yan hjan êngăp êa, dah yan bhang thu krô, krĭng lăn Êa Êñuôl, Ƀuôn Đon, čar Daklak, dlưh dưi pla mjing dŭm mta ana tŭ yuôm mkăn. Dôk tui duah hdră êlan pla mjing hlăm lăn ala anei pioh ba wĭt klei tŭ dưn kơ pô, êpul phung mda asei să Êa Êñuôl jhŏng lông ba pla leh ana boh đrač boh mtah, mjing mơ̆ng dŭm klei amâo mâo jăk găl mơ̆ng yan adiê tinei, mjing klei găl kơ ƀruă pla mjing ana anei. Võ Hoài Ân, knuă druh klam bruă kiă kriê đang boh đrač lač;

 “Thŭn 2021 hlăk mphŭn kčưm lông pla dŭm phŭn, snăn ƀuh ana mnơ̆ng anei đĭ jing jăk. Leh kơ anăn lŏ pla thiăm mjeh mrâo, jih jang bruă lông ngă jing găl guôp êdi. Năng ai yan adiê tinei jing bi kpleh hrue hŏng mlam hnơ̆ng h’uh, lehanăn yan hjan hŏng bhang jing ti Ƀuôn Đon hlăm brô êbeh 10 độ mơ̆ng anăn mơh ngă kơ boh đrač mmih hĭn, ƀâo mngưi hĭn”.

Dơ̆ng mơ̆ng bruă lông pla tal êlâo, truh kơ ară anei hlăm ênha mâo truh 1,8 héc-ta 10.000 phŭn ana boh đrač mboh leh. Nguyễn Quốc Lập, sa hlăm phung đru mguôp ngăn prăk duh bi liê kơ bruă pla mjing đang boh đrač, brei thâo, găn hlăm lu klei dleh dlan mơ̆ng bruă mkra mđĭ lăn ala, duh bi liê bruă mkra sang ñuăl, ba yua klei kreh knhâo, snăn 3 thŭn êdei kơ anăn, đang boh đrač dơ̆ng mâo pĕ, kah knarr mâo truh 10 tôn hlăm grăp thŭn. Hŏng ênoh čhĭ truh 400.000 prăk/kg, kyua mâo lu mnuih duah hriê blei, tăp năng hlăm đang amâo lŏ mâo boh pioh čhĭ ôh. Thui si Nguyễn Quốc Lập, hdră êlan pla mjing ana boh đrač mtah anei hlăk hlê dôk pŏk mlar:

 “Tơdah jih jang djăp mta klei jing jăk găl sơăi, lehanăn mnuih ƀuôn sang kơ anei mâo klei bi sa ai bi đru, mđrăm mbĭt hŏng pô, snăn pô čang hmăng mơh anei srăng krĭng krĭng truăn kơ bruă pla mjing boh drač mtah hlăm čar”.

Êpul phung mda asei dưn yua jih klei găl mơ̆ng hla pŏk yang ƀuôn, hưn mdah kơ hdră êlan pla mjing boh đrač mtah hŏng lu mnuih thâo. Lehanăn truh kơ yan boh ksă, dlăng dŭm pruĕ ana boh drač kpă ƀlăk mtah mda, bi kyut kmrŭ boh ksă mtah siam mâo iêo jak leh lu phung tue hriê blei. Thị Thu Hằng, lač:

 “Kâo đuĕ hiu leh hlăm lu anôk, mơ̆ng đang boh teinan hruĕ Đà Lạt, truh kơ đang boh đrač Ninh Thuận, tơl leh ƀuôn sang pô mâo hĕ đang boh đrač msĕ si ară anei, kâo ƀuh bŏ hŏng klei mơak êdi. Čang hmăng kơ alŭ wăl pô lŏ mâo thiăm đang boh đrač msĕ snei, pioh mđĭ kyar klei hdĭp mda, mbĭt anăn ngă bruă hiu čhưn ênguê jăk mơh kơ tue”.

 Đinh Thuý Lăng, K’iăng khua knơ̆ng bruă sang čư̆ êa să Êa Êñuôl, kdriêk Ƀuôn Đon, čar Daklak brei thâo, mơ̆ng boh tŭ dưn tal êlâo mơ̆ng bruă lông pla ana boh đrač anei jing leh hdră êlan mă bruă mrâo hlăm alŭ wăl:

 “Bruă lông pla mjing anei, mâo ba wĭt leh klei tŭ dưn jăk. Êlâo hĭn dưi bi mlih mta mnơ̆ng pla jing djŏ guôp hŏng lăn ala, ya adiê ti să Êa Êñuôl. Mbĭt anăn mâo hdră mđĭ kyar klei hiu čhưn dhing bruă lŏ hma. Jing sa hdră êlan dôk mđĭ kyar ară anei hlăm kdriêk. Snăn mkă tĭng ti hnơ̆ng hlăm alŭ wăl pô, hmei srăng lŏ ksiêm duah, lehanăn srăng hưn mthâo hdră duh ƀơ̆ng anei truh hŏng jih jang mnuih ƀuôn sang hlăm să mâo tui ngă hdră duh ƀơ̆ng snei. Anăp kơ alŭ wăl srăng mđĭ kyar bruă pla mjing pô, mkŏ wĭt mjeh mnơ̆ng pla kñăm ba wĭt klei tŭ jing hĭn”./.