Tui si klei ktrâo atăt mơ̆ng bruă sang čư̆ êa, lehanăn dhar bruă lŏ hma kdriêk Kon Plông hlăm dŭm hrue adiê êăt ktang, adiê lu dhul, hjan ƀhŭk, 145 gŏ êsei mnuih ƀuôn sang Xơ Đăng ti ƀuôn Kon Vơng Kia, wăl krah Măng Đen mâo leh lu hdră răng mgang mnơ̆ng pô rông.

Mbĭt hŏng klei amâo lŏ phưi tha ôh êmô kbao hlăm kdrăn, dŭm gŏ êsei bi mkra mjing truh 35 boh war êning kjăp kiă kriê êmô kbao. A Ka Riắc sa čô mnuih hlăm ƀuôn, brei thâo, dŭm gŏ êsei mâo mbha leh dŭm mta bruă mdê mdê, mđrăm mbĭt đru bi mgang klei êăt kơ êmô kbao:

 “Grăp hrue dŭm gŏ êsei nao bi khăt rơ̆k hlăm hma ba wĭt mčiêm êmô kbao hlăm war. Lehanăn mbha bruă bi kuĕ eh êmô kbao, snăn war êning doh siam nanao. Gang păng hĕ bi krĭp war êning, čuh adrăng, kam mdiê kñăm čiăng bi mđao kơ êmô kbao pĭt mlam”.

Jing alŭ wăl kreh tuôm hŏng adiê êăt prŏng hĭn hlăm yan puih, hlăm dŭm thŭn giăm anei, kdriêk Kon Plông, čar Kon Tum kreh mđĭ hĭn klei hâo hưn, mtrŭt mjhar mnuih ƀuôn sang djăp djuê ana mâo klei uêñ mđing đru mgang klei êăt kơ êmô kbao pô. Amâo lŏ phưi tha êmô kbao hlăm dliê ôh, kyuanăn hlăm kdriêk ară anei amâo lŏ mâo ôh klei djiê êmô kbao hlăm yan puih êăt, êmô kbao hlăm kdriêk ară anei đĭ lar pral mơh mâo leh giăm 24.000 drei. Võ Đình Tân, K’iăng khua adŭ bruă lŏ hma kdriêk Phó Kon Plông, brei thâo, êlâo kơ truh yan puih thŭn anei, êpul bruă mbha leh truh 1.000 pŏk hră mtă mtăn, ktrâo atăt mnuih ƀuôn sang gang mkhư̆ klei êăt kơ êmô kbao:

 “Truh yan puih angĭn êăt, snăn mnuih ƀuôn sang ăt čŏng thâo mkra klei gang mkhư̆ êăt kơ êmô kbao bi kjăp war êning. Bi kơ mnơ̆ng ƀơ̆ng, mkăm pioh adrăng krô leh wiă mdiê. Lehanăn lŏ thâo pla rơ̆k, pla ana mtei pioh čiêm êmô kbao. Truh yan êăt krư̆ êmô kbao hlăm war sơăi. Lu mnuih ƀuôn sang ară anei, dah hiu răng êmô kbao hlăm kdrăn, truh tlam ba wĭt krư̆ êmô kbao hlăm war, lehanăn hwai bi mdoh jêñ jêñ war êning, bi mdjiê kman jêñ jêñ”./.