Dŭm hruê anei, gŏ sang ayŏng Đinh Công Nhiên mbĭt hŏng mnuih ƀuôn sang hlăm ƀuôn dôk hơ̆k mơak bi wiă mdiê ti kdrăn lŏ ƀuôn Klah, să Ia Mơ, kdriêk Čư̆ Prông, čar Gia Lai. Ayŏng Đinh Công Nhiên brei thâo, mâo hŏng anei dua thŭn, phung knuă druh bruă lŏ hma mơ̆ng kdriêk, să hriê mtrŭt mjhar mnuih ƀuôn sang pla mjing mdiê lŏ dua wưng. Mtô kơ mnuih ƀuôn sang mơ̆ng klei kai hli lăn, rah mjeh, kriê dlăng truh kơ hrui wiă. Wưng pla mdiê thŭn anei, Đinh Công Nhiên đăo knăl srăng mâo 5 tôn mdiê, hnư hrui wĭt êbeh 50 êklăk prăk.

 “Êlâo dih ka mâo mnuôr êa mdiê mâo mă amâo mâo knar hŏng pla dua wưng, pla dua wưng mâo lu hĭn. Thŭn anei lŏ thiăm wưng anei jing wưng tal tlâo, 3 mlan êdei srăng wiă yơh. Dŭm thŭn êlâo plă mă sa blư̆ mâo mmông kƀah êsei huă, thŭn anei jăk leh”.

Nao ti să Ia Mơ hlăm wưng anei, ai êwa mă bruă knuă, klei hdĭp mnuih ƀuôn sang mâo klei mlih. Hơ̆k mơak êjai mdiê ktrŏ boh dơ̆ng truh hruê wiă, ayŏng Siu Toàn, ti ƀuôn Klah, să Ia Mơ brei thâo, wưng pla thŭn anei, gŏ sang ñu pŏk phai mơ̆ng 3 sào jing 8 sào mdiê, mbĭt anăn lŏ pla mjeh mdiê hnơ̆ng tŭ jăk leh anăn hmăng hmưi wưng pla mjing anei srăng đru kơ gŏ sang mâo mdiê lu. Ayŏng Siu Toàn brei thâo:

“Êlâo dih ka mâo mnuôr êa kyuanăn gŏ sang kâo amâo mâo ngă lŏ, ară anei mâo êa leh, kyua knŭk kna duh bi liê mkra êlan mnuôr êa, mnuih ƀuôn sang mâo klei hơĭt mă bruă knuă, kâo pô ăt gĭr ngă bruă čiăng mâo êsei huă djam ƀơ̆ng, rông anak čô nao sang hră mơar leh anăn bi hơĭt klei hdĭp gŏ sang”.

Ti kdrăn lŏ mơ̆ng ƀuôn Klah, Nguyễn Tuấn Anh, k’iăng khua bruă sang čư êa să Ia Mơ dôk mtô kơ mnuih ƀuôn sang kriê dlăng mdiê lŏ. Nguyễn Tuấn Anh, brei thâo, să ară anei mâo êbeh 155 ha mdiê lŏ, knŏng hlăm dua thŭn êgao, ti ƀuôn Klah mâo êbeh 100ha mdiê dua wưng, gŏ sang mâo klei găl pla tlâo wưng.

Kyua ngă mdiê lŏ, să Ia Mơ dưi mgaih msir klei kƀah mnơ̆ng ƀơ̆ng, mnuih ƀuôn sang amâo mâo huĭ kơ klei ư̆ êpa. Hŏng 5 alŭ ƀuôn, mnuih djuê ƀiă mâo 70%, mdiê lŏ dưi đru kơ diñu mlih klei mĭn hlăm klei mă bruă, ênoh gŏ êsei ƀun hrŏ hlăm dŭm thŭn. Nguyễn Tuấn Anh lač:

“Êlâo dih krăn lŏ ti ƀuôn Klah knŏng dưi pla sa wưng leh anăn knang kơ êa mlĕ, mnuih ƀuôn sang dleh dlan dưi mđĭ kyar bruă duh mkra boh nik jing mdiê lŏ. Leh mâo mnuôr êa, klei mĭn mă bruă mơ̆ng mnuih ƀuôn sang mâo klei mlih, mđĭ kyar bruă duh mkra, bi hrŏ klei ƀun ƀin. Bruă anei djŏ hŏng asăp mtrŭn mrô 08 mơ̆ng bruă Đảng čar, mơ̆ng anăn hnơ̆ng boh mnga mâo 9 tôn mdiê hlăm sa ha. Mnuih ƀuôn sang ƀuh boh tŭ dưn leh anăn bi mlar truh kơ jih alŭ ƀuôn, bi mlih hdră ngă bruă leh anăn dưn yua kdrăp mrâo mrang hlăm klei mkra mjing leh anăn hnơ̆ng boh mnga dưi mđĭ hĭn klă sĭt”.

Čiăng mtrŭt mđĭ bruă pla mjing mdiê lŏ ti krĭng knông lăn, kdriêk Čư̆ Prông mâo lu hdră đru. Đinh Văn Dũng, khua dlăng bruă Đảng kdriêk Čư̆ Prông brei thâo, kdriêk đru brei mjeh, hbâo pruê čiăng mtrŭt mjhar mnuih ƀuôn sang mpal mjing mjeh jăk, mtô kơ diñu dưn yua hdră mrâo mrang, mkiêt mkriêm čiăng mđĭ hnơ̆ng boh mnga leh anăn hnơ̆ng tŭ jăk. Dŭm klei gĭr anei dưi ba wĭt boh tŭ dưn.

“Hyuă kjăp kơ gưl bruă Đảng nah gŭ, dŭm gưl bruă čiăng hluê ngă pŏk mlar, hluê si boh sĭt bruă pla mjing mơ̆ng mnuih ƀuôn sang čiăng mlih hdră ngă mrâo, djă kngan ktrâo bruă hlăm bruă pla mdiê lŏ”.

Hŏng klei mlih ktang hlăm bruă pla mdiê lŏ, mnuih ƀuôn sang ti ƀuôn Klah, să Ia Mơ dưi găn klei dleh dlan, ƀun ƀin čiăng drông sa klei hdĭp trei mđao, yâo mơak hĭn. Dŭm kdrăn lŏ mtah jing phŭn mnơ̆ng ƀơ̆ng huăn yuôm bhăn leh anăn jing klei ktưn hưn, klei bi klă kơ klei gĭr ktưn mơ̆ng mnuih djuê ƀiă krĭng knông lăn.