Tơdah hlăm ƀuôn sang mâo mnuih djiê, snăn khua mduôn pral truh mtam kơ sang mâo klei djiê brŭ, hlŭt hgơr hưn mthâo kơ jih jang ƀuôn sang thâo, lehanăn bi trông čhai kơ bruă mkŏ mjing klei dơr djiê. Leh jih jang mnuih thâo, ƀuôn sang pô mâo mnuih djiê, snăn jih jang mnuih lui jih bruă pô mdê mdê, bi tui nao kơ sang djiê sơăi, đru bruă knuă tinăn, đa mkra anôk jum tue, đa tŭk knă mnơ̆ng ƀơ̆ng huă, phung mduôn khua mprăp čing čhar, mâo mnuih dưi tiŏ nao hưn kơ ƀuôn anei ƀuôn adih, mâo găp djuê kbưi hriê bi čang ênuh duh mgei. 50 thŭn ti ƀuôn K’tu, ƀuôn hgŭm Kông Chêng, čar Gia Lai, lač: “Mâo klei luh hlao kyâo mtâo hlăm ƀuôn sang, kâo ƀuh jih jang mnuih hlăm ƀuôn hriê bi čang ênuh duh mgei sơăi.  Mnuih ƀuôn sang bi tông čing, mprrăp bruă knuă dơ̆ng mơ̆ng hrue mnuih djiê tuič ai hlŏng truh kơ hrue dơr, jih jang bi mđrăm mbĭt đru bruă mâo klei bi juh găp djuê mnuih djiê. Jih jang mnuih đa bi mguôp prăk kăk, braih mkuê̆, găp djuê bi mguôp čuh ŭn pioh kơ klei čang ênuh, dơr djiê”.

Ăt msĕ hŏng lu djuê ana mkăn, mnuih Bahnar, găn hĕ klei djiê brŭ anăn jing bruă prŏng, bruă kơ jih ƀuôn, amâo djŏ jing knŏng hjăn gŏ sang anăn ôh bi klam, mơ̆ng anăn mơh jih jang mnuih amâo mâo guôn lŏ mâo klei mtrŭt mjan, ƀiădah jih jang bi lui bruă pưk hma pô nao bi đru hlăm bruă sang djiê sơăi. Đinh Pơr, 58 thŭn, ti ƀuôn Pông, ƀuôn hgŭm Chư A Thai, čar Gia Lai, brei thâo:“Hlăm ƀuôn drei, tơdah mâo mnuih djiê, jih jang mnuih hlăm ƀuôn hriê bi đru bruă sơăi, mnuih mâo čing ba čing, mâo kpiê ba kpiê tông čing mđĭ ai bi juh găp djuê mâo mnuih djiê. Amâo mâo sa čô mnuih lŏ nao ngă bruă pô ôh. Tơl truh hrue dơr, leh ruĕ riêng bruă knuă, snăn kơh jih jang mnuih lŏ wĭt kơ bruă knuă pô mdê mdê.”

Hlăm hruê dôk găn klei djiê brŭ snăn, ti sang djiê jing anôk lu mnuih nao bi čang ênuh duh mgei, digơ̆ hriê bi juh găp djuê mnuih mâo klei truh. Truh mlam, êpul tông čing bi mbha mmông tông čing jih mlam mơh. Mnuih riêng gah lehanăn găp djuê jĕ giăm, djă ba añuê abăn pô mdê mdê nao krŏng mlam lehanăn đih pĭt tơdah pô leh êmăn ti sang djiê anăn sơăi. Bi phung mduôn khua dôk jŭm kăm pui bi yăl dliê; thâo dah lŏ bi hdơr kơ klei hdĭp mơ̆ng pô leh djiê, bi êdah klei hnĭng ênguôt kơ gơ̆.

Klei čuh êmô, amâodah kbao ti sang djiê, amâo mâo djŏ pioh kơ klei mnăm huă hơ̆k mơak ôh, ƀiădah anăn jing bruă bi êdah klei thâo jum tue, jum ƀuôn sang hriê hlăm klei djiê brŭ hriê đru bruă knuă hlăm sang djiê, lehanăn lač jăk kơ jih jang mnuih hriê čang ênuh duh mgei anăn. Đinh Brơi, 67 thŭn, jing khua mduôn ƀuôn Plei Chưp, ƀuôn hgŭm Lơ Pang, čar Gia Lai mñă, klei năng mpŭ lehanăn amâo mâo dưi lui ôh hlăm klei djiê brŭ mnuih djuê ana Bahnar anăn jing klei thâo bi mguôp hlăm ƀuôn sang. Tơdah gŏ sang mnuih djiê dôk hlăm klei dleh dlan, snăn jih jang mnuih ƀuôn sang srăng mâo klei bi mguôp prăk ŭn mnŭ, kpiê êsei. Phung amai adei êjai nao čang ênuh snăn djă ba braih đru mguôp hŏng sang djiê. “Klei djiê truh hŏng grăp čô drei, snăn găn klei ênguôt hnĭng sơăi, boh nik jing mnuih hlăm găp djuê dôk mbĭt mă bruă mbĭt, lehanăn hdĭp hŏng ƀuôn sang. Kyuanăn leh mâo mnuih djiê snăn mnuih ƀuôn sang bi čuh ŭn čuh êmô čiăng bi êdah ai tiê klei ênguôt hnĭng hŏng pô djiê anăn, lehanăn duh êsei djam kơ găp djuê, tue êgar hriê bi čang ênuh”.

Ară anei, mâo đa đa klei bhiăn hlăm klei djiê brŭ mnuih Bahnar bi hrŏ leh lu klei bhiăn hđăp amâo lŏ djŏ, bi hrŏ klei bi liê prŏng, knŏng dôk djă pioh ya mta klei bhiăn jing jăk, ƀiădah ăt dôk mâo klei thâo bi mguôp, sa ai tiê jih jang bi đru mbĭt, snăn dôk djă pioh./.