Anăn jing klei riu yang mơ̆ng Khua mduôn - pô mbruă êdah êdi Ksor Lol (khăng iêô Ơi Sơ) ti gŏ sang Amí H’Guan ti ƀuôn Rbai, să Phú Thiện, čar Gia Lai. Asăp riu yang lač klă mta phŭn mơ̆ng knăm ngă yang, anăn jing amai H’Guan hlăk êbat ti êlan, amâo myun lĕ buh, mngăt êwa dôk wơr dliê ka wĭt ti sang, kyua anăn gŏ sang myơr mnŭ, čeh kpiê, akâo kơ Yang dlăng brei, atăt êlan kơ mngăt ñu wĭt kơ sang.

Knăm ngă yang dưi mkŏ mjing ti krah sang krum dlông, hŏng mnơ̆ng ngă yâng 2 čeh kpiê, sa drei mnŭ ăm, 2 klŏ hbei tao dưi dưm  khuăt hlăm ê ei dưm hla mtei mtah; djiêo anăn jing ao hđăp H’Guan tuôm hơô hlăk mâo klei truh. Pô riu yang jing khua mduôn Ksor Lol hlĭng êa hlăm čeh kpiê êjai răk klei riu yang êjai. Tơdah čeh kpiê bŏ, khua mduôn mđup brei đĭng kpiê kơ H’Guan mnăm. Leh mnăm jih sa mngan kpiê čeh, H’Guan msĕ si mâo lŏ thiăm ai ktang, leh anăn mâo klei đăo knang mngăt êwa srăng lŏ wĭt hŏng pô. “Hruê anei, gŏ sang mkŏ mjing knăm ngă yang čiăng iêô mngăt êwa wĭt hŏng asei mlei, wĭt hŏng gŏ sang, mbĭt anăn čang hmăng kơ asei mlei dưi tlaih kơ klei  amâo myun, tuôm lu klei jăk leh anăn êđăp ênang.”

 Knăm nga yang iêô mngăt kơ H’Guan mâo amĭ ama leh anăn phung găp djuê hlăm gŏ sang. Lŏ čuê klei khua mduôn riu yang, Amĭ H’Guan ăt răk klei riu yang bi êdah klei tŭ jum mngăt êwa anak mniê lŏ wĭt. Amĭ H’Guan brei thâo, leh anak mniê mâo klei bi drăm hlăm êlan klông, mâo klei bi knăl ñŭt huĭ, ƀiă blŭ, ai tiê amâo hơĭt. Hlue si klei mĭn mnuih Jarai, anăn jing kyua mngăt êwa wơr dliê, kyua anăn gŏ sang mkŏ mjing knăm ngă yang hlue si klei bhiăn čiăng anak mniê hơĭt ai tiê. “Gŏ sang mkŏ mjing klei ngă yang iêô mngăt ñu wĭt. Mrâo êgao ñu lĕ êbuh êdeh, hlue si klei  bhiăn brei ngă yang čiăng lăm lui klei amâo myun leh anăn iêô mngăt wĭt, huĭ mngăt ăt dôk ti êngao ka hmao wĭt hŏng asei mlei. Hmei iêô pô riu yang hriê ngă yang, čang hmăng kơ mngăt êwa lŏ wĭt hŏng ñu, čiăng kơ ñu mâo klei suaih pral, êđăp ênang.”

 Nay Wih (Ama H’Guan) brei thâo Knăm ngă yang iêô mngăt jing klei bhiăn mnuih Jarai mâo mơ̆ng đưm leh. Knăm dưi mkŏ mjing prŏng amâodah điêt hlue si hnơ̆ng amâo myun pô arăng ngă yang tuôm. Tơdah knŏng lĕ buh amâodah klôk, gŏ sang srăng ngă hŏng sa drei mnŭ leh anăn sa čeh kpiê. Ƀiădah tơdah găp djuê mâo klei truh kjham hĭn, knăm ngă yang srăng dưi ngă prŏng hĭn, mâo sa drei bê leh anăn sa drei ŭn. Bê ba ti hang krông čiăng ngă yang,, suôt jih klei amâo myun; bi ŭn hŏng čeh kpiê ngă yang ti sang kñăm akâo klei suaih pral, êđăp ênang hnưm lŏ wĭt hŏng mnuih mâo klei truh. “Knăm ngă yang iêô mngăt dưi mkŏ mjing kñăm ba mngăt wĭt hŏng asei mlei, wĭt hŏng gŏ sang. Klei bhiăn anei mâo leh mơ̆ng ênuk aduôn aê, lŏ čuê truh ară anei. Hlue si klei bhiăn, tơdah hlei pô amâo myun mâo klei truh, gŏ sang srăng ngă yang iêô mngăt huĭdah mngăt dôk ti êngao, hnưm lŏ wĭt hŏng găp djuê. Anei jing sa klei dhar kreh yuôm bhăn dưi kriê pioh mơ̆ng đưm leh”

 Knăm ngă yang iêô mngăt mnuih Jarai jing klei bhiăn hlăm klei đăo kñăm “iêô mngăt wĭt hŏng asei mlei, bi juh ai tiê phung mâo klei truh. Grăp klei kwưh, mnơ̆ng myơr mâo klei đăo knang hlăm klei bi mguôp plah wah mngăt leh anăn asei mlei, gŏ sang leh anăn yang, plah wah anak mnuih leh anăn dliê kmrơ̆ng.

Hruê anei, êngao kơ bruă ba mnuih mâo klei truh dŏng mdrao ti anôk bruă mdrao mgŭn, leh anăn mnuih Jarai ti Phú Thiện, čar Gia Lai, ăt ngă klei bhiăn anei msĕ si anôk đăo knang ai tiê čiăng kơ grăp čô mnuih thiăm klei đăo knang kjăp ti anăp klei truh hlăm klei hdĭp./.