Knhuah bhiăn kơ dhar kreh Việt Nam jing aruăt mrai hrah mâo nanao hlăm dŭm hră mơar mơ̆ng Đảng kơ Dhar kreh, klei kdŏ mmuñ, đru tă êlan kơ bruă mkŏ mjing leh anăn mđĭ kyar dhar kreh Việt Nam.

Sang bi hdơr kơ Khua gĭt gai Đảng êlâo dih Trường Chinh ti kdriêk Xuân Trường, čar Nam Định, djă pioh lu mta hră mơar yuôm bhăn lač kơ klei hdĭp lehanăn bruă cách mạng mơ̆ng khua gĭt gai Đảng. Boh nik, tinei lŏ djă pioh kơ “Knhuah bhiăn kơ dhar kreh Việt Nam” mâo khua gĭt gai Đảng Trường Chinh pô čih mkra lehanăn mâo bi klă leh ti anôk bi kƀĭn Êpul khua kiă kriê bruă Đảng gưl dlông mlan 2/1943.  Thŭn 1943, dôk ti gŭ klei phung pla ala Prăng, lehanăn Japon kiă kriê, 90% čô mnuih ƀuôn sang lĕ hlăm klei amâo mâo thâo hră mơar ôh, klei hdĭp mda ala ƀuôn dôk hlăm klei ap gư̆, lu mnuih thâo hră Việt Nam mâo mnuih kƀla huĭ, amâo mâo thâo êlan hdĭp. Kyuanăn, dưng mơ̆ng ka mâo sua mă ôh klei êngiê, Đảng tă čua leh mtam: Bruă ngă mtam tal êlâo anăn jing bi klin jih mnuih thâo hră, tă êlan kơ digơ̆ lŏ tui tiŏ klei hriăm mjuăt, rŭ mjing êpul kreh dhar dŏng mgang lăn čar, kñăm bi rai jih hdră êlan bi mluk mnuih ƀuôn sang...

Knhuah bhiăn kơ dhar kreh Việt Nam mâo mkŏ mjing yap msĕ si hră klei bhiăn ng nai prŏng, nai prĭn Nguyễn Toàn Thắng, Jing khua kiă kriê anôk bruă ksiêm duah kơ dhar kreh lehanăn mđĭ kyar, mơ̆ng Sang hră bruă kđi čar lăn čar Hồ Chí Minh lač:

 “Đảng pral dưi thâo ƀuh kơ klei yuôm bhăn mơ̆ng dhar kreh, anak mnuih Việt Nam. Kyua anăn thŭn 1943 Đảng mâo leh klei êpa mhao kơ sa dhar kreh mrâo, leh mâo mă klei êngiê bruă sang čư̆ êa srăng mkŏ mjing mtam sa dhar kreh mrâo. Anăn jing dhar kreh cách mạng lehanăn drei bi mkŏ mjing dhar kreh anăn hlue hlăm 3 hdră êlan. Anăn jing “Păn kjăp êlan djuê ana”, “tiu tiŏ êlan kreh knhâo”, lehanăn hrăm mbĭt jih jang mnuih ƀuôn sang”. Hlăm knhuah bhiăn anei, Đảng bi klă leh klei bi mguôp plah wah cách mạng bruă kđi čar, lehanăn cách mạng dhar kreh, jing brei bi leh bruă “cách mạng dhar kreh” êlâo snăn kơh “bi leh jih jang klei bi mlih yang ƀuôn”.

Tui si Nai prŏng Phong Lê, Khua kiă kriê anôk ksiêm hriăm kơ dhar kreh, Knơ̆ng bruă ksiêm duah kơ klei kreh knhâo yang ƀuôn Việt Nam: Knhuah bhiăn kơ dhar kreh Việt Nam thŭn 1943 msĕ si asăp mtrŭn mơ̆ng hƀuê ênuk mprăp kơ sa mlan êlâo kơ Cách mạng, bi klă bruă klam amâo mâo dưi bi mlih ôh mơ̆ng Đảng hŏng cách mạng dhar kreh, čiăng kơ dhar kreh mtrang êlan kơ adei tlang tui hlue:

"Knhuah bhiăn kơ dhar kreh 1943. Anăn jing klei bhiăn mtrŭn tal êlâo. Mâo knhuah bhiăn anei snăn kơh mâo klei mkŏ mjing dŭm êpul dhar kreh. Asei khua Hồ Chí Minh jing pô ba anăp, mjing sa knhuah dhar kreh prŏng. Hlăm boh sĭt mơ̆ng cách mạng mâo mkŏ mjing snăn klei ktrâo êlan hŏng dhar kreh, mtrang êlan kơ klei hlak mblang čiăng tui duah sa êlan djŏ. Bi mâo sa knhuah bhiăn prŏng kơh srăng dưi mâo hdră êlan prŏng, lehanăn pô phŭn jing Hồ Chí Minh".

Knhuah bhiăn kơ dhar kreh Việt Nam mâo bi klă leh cách mạng dhar kreh  čiăng bi tŭ jing snăn bi mâo Đảng kiă kriê, klei anei dưi ƀuh leh hlăm jih êlan kiă kriê, Đảng mđing nanao kơ klei mđĭ kyar dhar kreh lehanăn mâo nanao klei đua klam ti anăn jih jang djăp mta klei kơ dhar kreh. Klei anei, bi êdah klei bhiăn sĭt nik, ngă jih ai tiê hlăm bruă mkŏ mjing dhar kreh kluôm ala tal 13, Đảng tă leh, duh lu hĭn kơ dhar kreh, jing ka năng mơh hŏng bruă kđi čar, lehanăn klei duh mkra. Klei anei bi êdah klei bhiăn kjăp hlăm bruă mkŏ mjing dhar kreh lehanăn klei kiă kriê jih jang yang ƀuôn. Mơ̆ng leh mkŏ mjing klei bi kƀĭn prŏng dhar kreh kluôm ala thŭn 2021, bruă iêo jak jih ai ktang pioh mđĭ kyar jih jang djăp mta bruă hlăm dhar kreh mâo nanao klei mđing dưi bi trông čiăng kơ dhar kreh klă sĭt jing atur, jing boh kdrŭt kơ bruă mđĭ kyar klei duh mkra ala ƀuôn, čiăng kơ dhar kreh “Dưi mtrang êlan kơ jih jang yang ƀuôn tui hlue”. K’iăng nai prŏng, nai prĭn Bùi Hoài Sơn, Khua hlăm êpul kiă kriê bruă dhar kreh, mjuăt bi hriăm mơ̆ng bruă kƀĭn ala, mñă: Ai ktang kơ dhar kreh amâo mâo djŏ knŏng kơ ngăn prăk, ƀiădah lŏ jing klei bhiăn kơ hdră êlan lehanăn mnuih ngă bruă:

 “Tơdah drei lač kơ klei čiăng duh bi liê kơ ngăn prăk jing sa boh tŭ dưn yuôm bhăn mơ̆ng klei duh bi liê kơ dhar kreh mâo tă leh êlan djŏ kơ drei tui hlue.  Klei anei amâo mâo djŏ knŏng tŭ dưn kơ dhar kreh, ƀiădah lŏ jing klei lar bra kơ dŭm bruă mkăn hlăm klei hdĭp mda ala ƀuôn msĕ si: Klei duh mkra, klei mjuăt bi hriăm, amâodah klei kreh knhâo... Hlăm ya mta bruă mkăn dưn hlăm yang ƀuôn, wăt hlăm bruă kđi čar. Kyua klei anăn yơh klei duh bi liê ngăn prăk hlăm dhar kreh anăn jing hdră pioh duh bi liê kơ klei mđĭ kyar kluôm kơ lăn čar”.

80 thŭn leh êgao, mơ̆ng knhuah bhiăn dhar kreh, hlăm grăp wưng ênuk cách  mạng, Đảng lehanăn knŭk kna dlăng yuôm bruă klam čiăng mjing ai ktang bi klin jih jang djuê ana kñăm êpa mhao hlŏng jing klei sĭt. Klei yuôm bhăn hĭn jing lŏ bi kơrŭ, lehanăn mđĭ kyar dhar kreh lăn čar. Anei srăng jing boh kdrŭt yuôm bhăn, jing knơ̆ng kơ bruă kđĭ čar, kơ klei bhiăn pioh duh bi liê kơ dhar kreh, ruh mgaih klei dleh dlan kơ mnuih ngă bruă kơ dhar kreh. Anei ăt jing klei grăp čô mnuih dôk tui duah, čiăng lŏ dơ̆ng rŭ mdơ̆ng lăn čar Việt Nam đĭ kyar, drei dưi bi mguôp ƀiădah amâo mâo luič ôh, dưi lŏ păn kjăp knhuah gru dhar kreh Việt Nam.

Leh 80 thŭn, jih jang hdră êlan kơ knhuah bhiăn dhar kreh ăt dôk nanao klei tŭ dưn, mơ̆ng jih wang êlan klei mđĭ kyar dhar kreh, klei mĭn djŏ tui si Đảng tă êlan kơ dhar kreh, čiăng kơ knhal tuič dưi bi mklă asăp mtrŭn kơ dhar kreh jing pô mtrang êlan kơ jih jang yang ƀuôn tui hlue”./.