Hlăm wưng leh êgao, hdră êlan mrô 8 dôk hlăm hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng mâo bi mklă sa jing “knhuang đĭ kyar jăk”, leh mâo prăk lehanăn hdră mă bruă djŏ kơ klei mtăp mđơr êkei mniê. Siămdah, ti tui Nai prĭn Phạm Thái Hưng – pô thruăn kơ bruă hdră êlan, klei gĭr anei ăt adôk ka djăp. Ñu hlak mblang, mta bruă mrô 8 hlăk mâo leh 1,4% ênoh ngăn prăk mơ̆ng bruă knuă, mbĭt hŏng dŭm bruă điêt mkăn. Ênoh bi mbha bruă snăn jing điêt, čiăng pioh klam sa mta bruă prŏng. Nai prĭn Hưng mñă: "Boh sĭt, ka jăk mđing, lehanăn adôk êdu awăt kơ klei bi mguôp dua nah êkei lehanăn mniê”.

Anei jing sa klei lông dlăng prŏng, bi tơdah knŏng jưh knang kơ sa mta bruă hliê hluôt, hŏng ênoh prăk duh bi liê điêt, snăn bruă čiăng bi mâo klei mtăp mđơr êkei mniê hlăm krĭng mnuih djuê ƀiă, lehanăn krĭng čư̆ čhiăng jing dleh dlan êdi, lehanăn dleh dưi mâo boh tŭ dưn msĕ si klei čiăng. Ti anăp klei msĕ snăn, Nai prĭn Phạm Thái Hưng lač brei mâo klei bi mlih sĭt hlăm wưng mă bruă anei, ciăng dưi bi sĭt klei tui tiŏ mtăp mđơr êkei mniê. Ñu čang hmăng: “Bi mguôp bruă mtăp mđơr êkei mniê hŏng dŭm mta bruă kơ klei mđĭ kyar klei hdĭp hlăm jih bruă kluôm kơ klei mđĭ kyar”. Tui si ñu, amâo mâo djŏ knŏng bruă klam hjăn mơ̆ng Êpul hgŭm bruă mniê gưl dlông Việt Nam amâo dah hdră êlan mrô 8, ƀiădah jing bruă čuăn hlăm jih jang, brei mtrŭn agha êlam hĭn, hlăm djăp mta bruă ngă.

Čiăng dưi bi mguôp bruă mtăp mđơr êkei mniê amâo mâo djŏ knŏng mil kơ hdră êlan, amâodah klei pia mă hlăm boh blŭ, nai prĭn Phạm Thái Hưng mâo klei čiăng bi êdah kơ hdră êlan ktrâo atăt truh hŏng dŭm phŭn dhar bruă hlue ngă dŭm hdră êlan hlăm klei bi mguôp mbĭt mơ̆ng adŭ bruă kiă kriê bruă knuă. Ñu mñă, brei mâo klei mlih mrâo hdră êlan mă bruă hŏng klei kjăp, lehanăn klă mngač hŏng klei hdĭp.

“Dlăng wĭt kơ alŭ wăl lehanăn mnuih dưn dưn. Hlăm jih jang bruă mđĭ klei thâo, lehanăn klei hâo hưn, bi mlih hdră thâo dưn yua hlăm alŭ wăl dôk tuôm hŏng lu klei dleh dlan, kñăm čiăng dưi mâo klei đru sĭt êmĭt. Mđĭ hĭn bruă hâo hưn, mtrŭt mđĭ bruă mrô, ƀiădah klei yuôm bhăn hĭn jing rơ̆ng bi mâo hnơ̆ng kjăp bruă hâo hưn hlăm yang ƀuôn”.

Boh sĭt ară anei, ti lu anôk, drei mkŏ mjing dŭm êpul hâo hưn, mprăp loa bi kčăi asăp… ƀiădah bruă hâo hưn ară anei ăt adôk êdu. Kyua kƀah ngăn prăk mă bruă.  Nai prĭn Phạm Thái Hưng ăt bi êdah klă Phŭn bruă ngăn prăk ka bi êdah ôh ênoh bi liê kơ bruă anei, hlăm hră mtrŭn mrô 55, ngă leh kơ lu alŭ wăl amâo lŏ dưi mă bruă boh nik hlăm dŭm krĭng taih kbưi. Amâo mâo djŏ knŏng mdei mil tinăn ôh, ñu lŏ bi êdah dŭm klei ka djŏ hlăm bruă mjuăt bi hriăm:

“Bruă mjuăt bi hriăm kơ klei mtăp mđơr êkei mniê ară anei hlăk dôk lĕ hlăm klei anôk êbeh mâo mơh, anôk kƀah mâo mơh, tăp năng mñă wĭt mñă nao sa klei bi hriăm, lehanăn dôk kƀah lu klei hlăk čiăng hlăm klei hdĭp, kƀah klei thâo dưn yua hlăm klei hdĭp, lehanăn mă bruă ka mâo klei thâo sĭt ôh, čiăng snăk mâo klei bi mlih hlăm hdră êlan mjuăt bi hriăm, hŏng êpul knuă druh mâo klei thâo bi mguôp dŭm mta bruă mbĭt hlăm klei hdĭp aguah tlam mlam hrue”.

Kơ mta phŭn dŭm mta bruă năng ngă hĕ tal êlâo hlăm wưng tinăp, lŏ dơ̆ng hlăm bruă dlăng kriê klei suaih pral ƀă kkiêng anak. Nai prĭn Phạm Thái Hưng čang hmăng dưi pŏk mlar wăt kơ bruă êa doh, lehanăn klei bi mdoh hlăm wăl hdĭp mda, boh nik hŏng klei hdĭp phung mniê lehanăn hđeh êlăk. Tui si ñu, anei jing bruă năng ngă djŏ tuôm hŏng klei suaih pral anak mnuih, lehanăn hnơ̆ng hdĭp hŏng phung dôk hlăm klei awăt kƀah, ƀiădah boh sĭt ară anei ăt dôk jing sa klei lông dlăng prŏng hlăm lu alŭ wăl čư̆ čhiăng, krĭng taih kbưi.

Čiăng kơ djăp mta klei hmăng hmưi nao hlăm klei hdĭp sĭt, nai prĭn Phạm Thái Hưng iêo mthưr kơ gưl dlông Êpul hgŭm bruă mniê Việt Nam mđing bi hgŭm kjăp hŏng adŭ bruă kiă kriê hdră mđĭ kyar krĭng mnuih djuê ƀiă lehanăn krĭng čư̆ čhiăng, lehanăn dŭm phŭn dhar bruă djŏ tuôm, kñăm kơ bruă mtăp mđơr êkei mniê dưi bi mguôp hŏng bruă mkăn hlăm klei kjăp hĭn lehanăn mâo klei tŭ dưn. Tơdah amâo mâo dưi bi mguôp ôh hŏng bruă mkăn, snăn bi krơ̆ng nanao sa êpul truăn kơ bruă anei, boh nik mdưm hlăm hdră êlan mđĭ kyar mnuih mă bruă, msĕ si sa hdră djŏ guôp hĭn lehanăn dưi hlue ngă./.