Hdră bruă knuă druh dưi hluê ngă kjăp hluê si klei kčah mtrŭn mơ̆ng Đảng, hdră bhiăn Knŭk kna, mâo klei sa ai, tŭ ư prŏng mơ̆ng phung bi ala Anôk bruă kƀĭn ala. Anôk bruă kƀĭn ala bi mklă leh Hdră mtrŭn kơ bruă bi mklă ruah Kơiăng khua knŭk kna hŏng 432/432 phung bi ala sa ai. 3 čô dưi ruah ngă Kơiăng khua knŭk kna mâo: Khua hlăm Phŭn bruă kđi čar Nguyễn Hòa Bình, Khua hlăm Anôk bruă Gưl dlông, Khua phŭn bruă Ngăn prăk Hồ Đức Phớc lehanăn Khua hlăm Anôk bruă Gưl dlông, Khua phŭn bruă hŏng tač êngao Bùi Thành Sơn. Ruah Khua phŭn bruă kriê dlăng hdră bhiăn hŏng Nguyễn Hải Ninh lehanăn Khua phŭn bruă Ngăn dŏ lehanăn Wăl hdĭp mda Đỗ Đức Duy. 

Blŭ hrăm mjưh ruê̆ Klei bi kƀĭn, bi ala Anôk bruă kƀĭn ala, Dhar bruă gĭt gai Anôk bruă kƀĭn ala, Khua Anôk bruă kƀĭn ala Trần Thanh Mẫn lač jăk kơ klei gĭt gai mơ̆ng Anôk kriê dlăng bruă Đảng gưl dlông, Phŭn bruă kđi čar, Anôk kriê dlăng bruă Đảng, phŭn jing Khua gĭt gai Đảng, Khua lăn čar Tô Lâm hlăm hdră mprăp lehanăn hluê ngă Klei bi kƀĭn. Phung bi ala mđĭ lar leh ai tiê đua klam, bi trông hŏng klei ngă phŭn mil pô, bi mklă hdră bruă knuă druh mâo leh klei sa ai, tư ư prŏng. Khua Anôk bruă kƀĭn ala Trần Thanh Mẫn mñă klă:

Drei đăo knang hŏng klei gĭt gai mơ̆ng Đảng, klei ngă bruă mơ̆ng jih anôk bruă kđi čar, dŭm gưl, dhar bruă, klei gĭr mơ̆ng kluôm Đảng, jih jang mnuih ƀuôn sang, lĭng kahan, êpul êya anôk bruă duh mkra, mnuih ƀuôn sang drei ti ala tač êngao, klă sĭt ala čar drei srăng hgao klei dleh dlan, lông dlăng, bi leh jih mta kñăm mđĭ kyar bruă duh mkra – ala ƀuôn, rơ̆ng klei êđăp ênang ala ƀuôn, hdră hŏng tač êngao lehanăn bi kdơ̆ng hŏng klei ƀơ̆ng ngăn, klei ngă amâo djŏ hlăm thŭn 2024, đru hlue ngă tŭ dưn Hdră mtrŭn Klei kƀĭn phung bi ala kluôm ala tal 13 mơ̆ng Đảng; mprăp kơ Klei bi kƀĭn bruă Đảng dŭm gưl, mđing truh kơ Klei kƀĭn phung bi al kluôm ala tal 14 mơ̆ng Đảng”.

Leh mjưh ruê̆ Klei bi kƀĭn, Adŭ bruă kƀĭn ala mkŏ mjing leh Klei bi kƀĭn phung čih klei mrâo, hưn mthâo boh tŭ Klei bi kƀĭn. Khua čih hră Anôk bruă kƀĭn ala klam Khua Adŭ bruă kƀĭn ala Bùi Văn Cường brei thâo: Klei bi kƀĭn mjêč tal 8, Anôk bruă kƀĭn ala gưl 15 tŭ jing jăk sim, phung knuă druh dưi ruah lehanăn bi mklă mâo leh klei sa ai lu.

“Khua lăn čar hlăm Hdră mtrŭn mơ̆ng gưl dlông mlan 10 anei srăng ruah. Khua phŭn bruă Ngăn prăk srăng ngă bruă truh kơ hbĭl dưi bi mklă ruah Khua phŭn brua mrâo. Bi Khua phŭn bruă hŏng tač êngao snăn Kơiăng khua knŭk kna ăt lŏ ngă bruă. Ênoh knuă druh hlăm Knŭk kna, akŏ wưng păn bruă snăn Hdră mtrŭn mơ̆ng Anôk bruă kƀĭn ala bi mklă mâo 4 čô Kơiăng khua knŭk kna, lehkơnăn Anôk bruă kƀĭn ala ăt tŭ ư mơ̆ng 4 čô Kơiăng khua knŭk kan đĭ jing 5 čô Kơiăng khua knŭk kna. Anăn mâo ruah leh, 2 čô Kơiăng khua knŭk kna mâo leh, mâo 3 čô mâo bi mklă ruah leh jing 5”.

Khua Anôk bruă knuă druh phung bi ala Nguyễn Thanh Hải ăt brei thâo: Hluê si hdră tĭng mơ̆ng gưl dlông, mơ̆ng ară anei truh kơ jih thŭn 2024 srăng ruah bi mklă jih phung knuă druh gưl dlông lehanăn dŭm gưl bruă Đảng, bruă sang čư̆ êa dŭm gưl, kñăm mđĭ bruă klam kiă kriê mơ̆ng Đảng hŏng bruă klam mđĭ kyar hdră duh mkra – ala ƀuôn, dhar kreh, lĭng kahan, răng mgang klei êđăp ênang, bruă hŏng tač êngao lehanăn mprăp kơ Klei bi kƀĭn bruă Đảng dŭm gưl mđing truh kơ Klei bi kƀĭn bruă Đảng kluôm ala tal 14. Bruă bi mklă mnuih mă bruă kñăm rơ̆ng klei kluôm ênŭm kơ hdră kđi čar, bi hgŭm mguôp hĭn, ngă bruă tŭ dưn hĭn lehanăn mjing djăp klei jăk găl hĭn kơ hdră mđĭ kyar bruă duh mkra ala ƀuôn, mkra mđĭ klei hdĭp mnuih ƀuôn sang, siă suôr hŏng mnuih ƀuôn sang, bi kjăp klei đăo knang mơ̆ng mnuih ƀuôn sang hŏng Đảng lehanăn Knŭk kna.

“Knuă druh ară anei mâo hdră êlan hlei thâo đĭ, hlei amâo thâo trŭn, mâo mŭt, mâo kbiă hluê si klei čiăng djŏ hŏng bruă klam, klei čiăng kơ bruă lehanăn klei thâo kơ bruă mơ̆ng grăp čô. Bruă bi mklă 3 čô Kơiăng khua knŭk kna, 2 čô Khua phŭn bruă hruê anei, bi mklă hdră mtrŭn mâo lu êdi êbeh 90% bi êdah leh “Klei sa ai hlăm Đảng, hlăm mnuih ƀuôn sang”, “Đảng ruah, mnuih ƀuôn sang ruah”, mâo klei sa ai, klei đăo knang prŏng hlăm phung bi ala mơ̆ng Anôk bruă bi ala jing pô bi ala kơ mnuih ƀuôn sang”./.