Knhal jih mmông tlam, leh mnuih ƀuôn sang wĭt mơ̆ng pưk hma, mnuih hgŭm hlăm êpul čŏng kriê dlăng Ƀuôn Êa Bông, ƀuôn hgŭm Ƀuôn Ama Thuôtj kah mbha jing êpul điêt nao truh grăp sang mtô mblang kơ hruê ruah khua 15/3 kơ anăp. Mta phŭn amâo djĭ hưn mthâo kơ hruê mmông, anôk mplĕ hră ƀiădah lŏ mblang klă klơ̆ng kơ klei dưi, bruă klam, hnơ̆ng čuăn lehanăn dŭm mta phŭn hlăm Hdră bhiăn ruah khua. H’Chuyên Êñuôl, Khua ƀuôn Êa Bông brei thâo, hdră anei jăk găl hŏng knhuah hdĭp mnuih ƀuôn sang hlăm ƀuôn.

 “Kyua mnuih ƀuôn sang tinei lu jing mă bruă pưk hma, pô nao mtô mblang adiê tlam, sa êpul nao mơ̆ng 5 – 10 boh sang”. 

Mđrĭng hŏng hdră mtô mblang klă anăp, bruă hâo hưn lŏ dưi hluê ngă hlăm dŭm mmông bi mjĕ mjuk êpul êya lehanăn hluê hŏng dŭm êpul hâo hưn hlăm ƀuôn. Čiăng rơ̆ng grăp čô dưi thâo klă mta phŭn, hdră mtô mblang mâo klei bi mlih nanao djŏ guôp. Y-Sil Êñuôl, mnuih mâo kơhưm ƀuôn Êa Bông brei thâo, bruă mtô mblang dưi hluê ngă hŏng klei Yuăn lehanăn klei Êđê djŏ guôp hŏng grăp čô.

 “Mtô mblang kơ mnuih ƀuôn sang hŏng klei Yuăn lehanăn klei blŭ amĭ kkiêng. Kyuadah blŭ hŏng klei Yuăn mâo lu mnuih amâo thâo săng jih ôh, bi blŭ hŏng klei blŭ amĭ kkiêng snăn mnuih ƀuôn sang ênưih thâo săng hĭn lehanăn ăt thâo klă klei mĭn čiăng ruah mnuih năng.

Jing sa čô hluê đăo ti ƀuôn hgŭm Êa Kao, H’Pliêr Niê Kdăm brei thâo, hdră hâo hưn kơ klei ruah khua ăt dưi mtô mblang hlăm dŭm mmông bi kƀĭn lehanăn bi tuôm hŏng mnuih ƀuôn sang ti alŭ wăl.

 “Ăt mâo dŭm mmông hưn mthâo, bi tuôm hŏng mnuih ƀuôn sang ti dŭm alŭ, ƀuôn. Hlăm sang bi kƀĭn, phung per ăt mtă mtăn kơ mnuih đăo truh hruê anăn bi nao ruah khua djăp ênŭm”.

Per Nguyễn Minh Hảo, kriê dlăng krĭng đăo Mẫu Tâm, ti Ƀuôn Ama Thuôt lač, grăp čô đăo jing sa čô mnuih ƀuôn sang lehanăn bruă nao hgŭm hlăm klei ruah khua jing bruă đua klam hŏng ala čar.

 “Dŭm klei đăo jing mâo mnuih ƀuôn sang sơaĭ kyua anăn mnuih ƀuôn sang mơak mơh tơdah mâo sa hdră ruah khua mrâo. Kâo mơak mơh tơ dưi bi leh bruă klam mơ̆ng sa čô mnuih ƀuôn sang mơ̆ng pô. Kâo pô srăng bi leh ênŭm bruă klam anei, dlăng anei jing sa klei bhiăn mơ̆ng Sang bi kƀĭn”.

Ti dŭm să knông lăn, kyua alŭ wăl prŏng, mnuih hdĭp rah rưng, hdră mtô mblang mâo pŏk ngă lu hĭn. Hluê si amai Lang Thị Son, Khua bruă mặt trận să Ia Lôp, knuă druh bruă mặt trận bi hgŭm nanao hŏng khua alŭ, mnuih mâo kơhưm truh kơ grăp krĭng mnuih ƀuôn sang dôk, mbha hră dlăng, ktrâo lač kơ mnuih ƀuôn sang dlăng anăn phung mgơ̆ng ruah mâo mƀlir bi mklă.

 “Să Ia Lôp jing alŭ wăl prŏng, mnuih hdĭp raih rưng kyua anăn amâo djŏ knŏng mtô mblang ti dŭm anôk bi kƀĭn amâo dah ti kdrăp bi kčaĭ asăp să, ƀiădah nao nao mbha hră ti grăp sang. Truh ară anei, mnuih ƀuôn sang thâo klă leh kơ hdră ruah khua anăp truh.

Hruê 15/3 ti anăp, mnuih ƀuôn sang kluôm ala srăng ruah pô bi ala bruă kƀĭn ala gưl XVI lehanăn bi ala Êpul gơ̆ng bruă ƀuôn sang dŭm gưl, wưng thŭn 2026-2031. Bruă ba klei hâo hưn kơ hdră ruah khua truh ti grăp ƀuôn snag, krĭng đăo ti Dak Lak đru krơ̆ng kjăp kơ grăp čô mnuih dưi thâo săng ênŭm kơ dŭm klei kčah mtrŭn mơ̆ng hdră bhiăn ruah khua. Mơ̆ng anăn, hluê ngă ênŭm klei dưi lehanăn bruă klam mơ̆ng sa čô mnuih ƀuôn sang hlăm hdră bruă yuôm bhăn mơ̆ng ala čar./.