Khua êpul kiă kriê pô bi ala, K’iăng khua êpul bruă mkŏ mjing gưl dlông   Nguyễn Thị Thanh brei thâo, 20 thŭn êgao, Êpul bruă kiă kriê pô bi ala mâo hgŭm leh kjăp hŏng dŭm anôk bruă djŏ tuôm đru kčĕ leh jăk kơ Dhar bruă gĭt gai bruă kƀĭn ala kñăm bi kjăp jih jang hdră êlan mơ̆ng Đảng, kơ klei mlih mrâo thiăm mbŏ Hdră bhiăn phŭn thŭn 2013, boh nik klei bhiăn kơ bruă ruah khua, Êpul Gơ̆ng ruah khua ala čar.

Mơ̆ng thŭn 2005, Êpul kiă kriê pô bi ala mâo mkŏ mjing leh 142 klei bi kƀĭn, mâo leh truh giăm 15.000 gưl čô phung bi ala bruă kƀĭn ala, Êpul khua kiă kriê Êpul gơ̆ng bruă ƀuôn sang, phung khua kiă kriê, lehanăn phung thơ̆ng kơ bruă hlăm adŭ bruă kƀĭn ala, lehanăn Êpul gơ̆ng bruă ƀuôn sang dŭm boh čar, ƀuôn prŏng.

Kơ bruă êpul gơ̆ng bruă ƀuôn sang, Êpul bruă anei čŏng mâo leh hdră êlan kčĕ kơ dhar bruă gĭt gai bruă kƀĭn ala mtrŭn giăm 400 hră ktrâo atăt kơ Êpul gơ̆ng bruă ƀuôn sang dŭm alŭ wăl ngă bruă, mơ̆ng anăn srăng mâo dŭm bruă ruh mgaih jih klei dleh dlan, klei gun kpăk êjai klei ngă bruă, mjing djăp klei găl kơ Êpul Gơ̆ng bruă ƀuôn sang mâo anôk knang čŏng ngă bi jăk jih jang bruă jao kơ pô, jing anôk bruă mâo klei dưi hĭn mơ̆ng knŭk kna, bi ala brei kơ ai tiê klei mĭn mnuih ƀuôn sang ti alŭ wăl.

Bi ala kơ phung khua kiă kriê bruă kƀĭn ala, blŭ hrăm ti anôk bi hdơr, k’iăng khua bruă kƀĭn ala Trần Thanh Mẫn lač, Đảng čuăn leh: “Knuă druh jing pô phŭn čoh čuăn jih klei tŭ jing amâodah klei kruh mơ̆ng bruă cách mạng, djŏ tuôm hŏng klei hdĭp Đảng, knŭk kna lehanăn hdră êlan kiă kriê, jing leh knơ̆ng kơ bruă mkŏ mjing Đảng”. Kơ ênoh čuăn pô bi ala bruă kƀĭn ala, khua gĭt gai Hồ Chí Minh lač hong klei klă: “Bruă kƀĭn ala mâo phung bi ala hŏng klei năng, jing phung knŏng sa ai tiê mă bruă kơ lăn čar, kơ mnuih ƀuôn sang kơ hdră êlan yang ƀuôn ngă phŭn”.

Kyuanăn, tinăn klei čiăng kơ klei mlih mrâo hlăm bruă kƀĭn ala, k’iăng khua bruă kƀĭn ala Trần Thanh Mẫn mtă kơ Anôk bruă kiă kriê pô bi ala kơ 5 mta bruă phŭn. Hlăm anăn, mđing ksiêm duah kơ djăp mta bruă mrâo, čŏng kăp kčĕ kơ ya mta klei mrâo, lehanăn bi êdah hdră êlan srăng ngă hŏng anôk bruă Đảng bruă kƀĭn ala, dhar bruă gĭt gai bruă kƀĭn ala kơ jih jang hdră mkŏ mjing, êpul kiă kriê, mnuih ngă bruă hlăm anôk bruă kƀĭn ala, lŏ dơ̆ng bi êdah bruă klam phŭn mơ̆ng phung bi ala bruă kƀĭn ala hlăm klei bruă kƀĭn ala mă bruă.

Tui si klei kčĕ kơ klei čiăng bi mlih mrâo, êpul ngă bruă, mđĭ hĭn klei tŭ dưn mơ̆ng Êpul Gơ̆ng bruă djuê ana, dŭm êpul bruă hlăm anôk bruă kƀĭn ala ngă bruă. Anei jing klei čiăng pioh kăp kčĕ kơ bruă kđi čar, kơ Êpul khua kiă kriê bruă Đảng gưl dlông bi mâo sa hdră êlan ngă bruă djŏ hĭn kơ anôk bruă kƀĭn ala srăng mă bruă, mprăp kơ jih jang bruă ti anôk mkŏ mjing bruă kƀĭn ala gưl 16, phung bi ala Êpul gơ̆ng bruă ƀuôn sang wưng thŭn 2026 - 2031. K’iăng khua bruă kƀĭn ala Trần Thanh Mẫn lač:

“Mđing kơ klei čuăl mkă ênoh phung bi ala bruă kƀĭn ala klă sĭt čiăng bi mâo mnuih mâo djăp ênoh čuăn kơ klei thâo, kơ knhuah dôk dơ̆ng ƀơ̆ng huă, lehanăn djăp hŏng ênoh čuăn mơ̆ng Đảng lehanăn hdră bhiăn, mŭt jing pô bi ala bruă kƀĭn ala. Kăp kčĕ bi jăk jih jang bruă djŏ tuôm kñăm bi leh klei bhiăn kăp ksiêm mơ̆ng mnuih ƀuôn sang, kñăm bi leh jih jang klei bhiăn mprăp kơ klei ruah khua bi ala bruă kƀĭn ala gưl 16, phung bi ala Êpul gơ̆ng bruă ƀuôn sang dŭm gưl wưng thŭn 2026 - 2031 mprăp mơ̆ng hnưm mơ̆ng kbưi mtam”.

K’iăng khua bruă kƀĭn ala Trần Thanh Mẫn mtă, Êpul kiă kriê pô bi ala năng brei mđing hĭn kơ jih jang klei khua bi ala Vương Đình Huệ, mtă: jing mđing hmư̆ ksiêm duah nanao jih jang djăp mta mtrŭn mơ̆ng Đảng, Knŭk kna kơ bruă knuă  druh kñăm kăp kčĕ bi kjăp, bi djŏ, hmao, pral. Mbĭt hŏng anăn hlăm klei ngă bruă bi trông nanao kơ klei mkŏ mjing Đảng, dŭm phŭn dhar bruă mâo klei bi mguôp kjăp hŏng dŭm anôk bruă bi ala, êpul êya djŏ tuôm, boh nik hŏng Êpul gơ̆ng bruă djuê ana, dŭm anôk bruă hlăm bruă kƀĭn ala, dôk hlăm dhar bruă gĭt gai bruă kƀĭn ala, Êpul Gơ̆ng bruă ƀuôn sang dŭm čar, ƀuôn prŏng hlăm gưl dlông./.