Hlăm mmông bi tuôm hŏng mnuih ƀuôn sang ƀuôn hgŭm mrô 4, ƀuôn prŏng Đà Lạt, Êpul bi ala Bruă Kƀĭn Ala čar Lâm Đồng mđing hmư̆ leh dŭm klei hưn mơ̆ng mnuih ƀuôn sang kơ dŭm boh klei yuôm bhăn, Boh nik jing dŭm klei dleh dlan kơ klei hdĭp, anôk dôk, êdeh êdâo êrô êbat mơ̆ng knuă druh, phung mă bruă knŭk kna leh bi mŭt mbĭt 3 čar Lâm Đồng, Đắk Nông, Bình Thuận. Êngao kơ dŭm klei dleh dlan hlăm klei êrô êbat, bruă dăp anôk huă ƀơ̆ng, anôk dôk ăt jing boh klei dleh, čiăng kơ čar Lâm Đồng hnưm mâo hdră êlan mgaih msir. Pô bi ala Hồ Trung Hiếu lač:

“ Kâo uêñ mĭn êjai mâo giăm 2000 čô knuă druh mơ̆ng dua čar Dak Nông leh anăn Bình Thuận srăng wĭt tinei, sơnăn bruă mkŏ drăp, mgaih msir klei čiăng kơ phunug ayŏng adei anei si srăng ngă. Kyuadah êjai diñu wĭt tinei klei êrô êbat srăng dleh dlan, čiăng mâo anôk dôk ti Đà Lạt, bi kơ wưng sui srăng đĭ hĭn klei čiăng kơ anôk dôk. Kâo hmăng hmưi čar Lâm Đồng mâo hdră tă leh anăn hdră êlan mgaih msir. Ară anei, hluê si kâo thâo Lâm Đồng – Đà Lạt hlăm bruă mgaih msir, rŭ mdơ̆ng sang dôk yang ƀuôn jing êmưt êjai klei čiăng mơ̆ng knuă druh, mnuih mă bruă jing lu êdi.”

Hlăk mblang klei phung bi ala êmuh, Nguyễn Ngọc Phúc, k’iăng khua bruă sang čư̆ êa čar Lâm Đồng brei thâo, alŭ wăl mâo leh hdră êlan mprăp kơ boh klei anei.

 “Ară anei, hmei dôk ksiêm dlăng hlăm brô 10 anôk čiăng kơ knuă druh dŭm čar hriê mă bruă. Anôk dôk ăt dưi ksiêm dlăng, bi klă čiăng rơ̆ng kơ diñu mâo anôk dôk, anôk huă ƀơ̆ng hơĭt. Êdeh êdâo êrô êbat, hmei đăo tĭng tơdah êdeh 50 mdhô̆ čar Dak Nông čiăng mâo hlăm brô 10 boh êdeh sa blư̆, kčưm nao hlăm hruê kjuh amâodah aguah hruê sa čiăng ayŏng adei nao mă bruă, Bình Thuận ăt čiăng 10 -20 boh êdeh. Hmei ăt hưn mdah hŏng knŭk kna mâo hdră êlan đru kơ phung knuă druh anei êjai êrô êbat. Čar srăng gĭt gai dŭm dhar bruă mă bruă čiăng mâo tour êdeh nao djŏ mmông čiăng đru kơ phung knuă druh nao mă bruă ti čar Lâm Đồng”.

Ăt uêñ mĭn kơ klei mkŏ dăp anôk bruă knŭk kna gưl čar, mnuih ƀuôn sang ti ƀuôn prŏng Vị Thanh, čar Hậu Giang hưn boh klei anei hŏng Khua bruă kƀĭn ala Trần Thanh Mẫn hlăm mmông bi tuôm. Trân Văn Trung ti să Long Mỹ brei thâo:

 “Mnuih ƀuôn sang hơ̆k mơak, đăo knang kơ Phŭn bruă kđi čar, Êpul khua bruă Đảng gưl dlông, Bruă Kƀĭn Ala, knŭk kna srăng gĭt gai tŭ jing bruă bi khuăt mnuih mă bruă mơ̆ng bruă kđi čar. Mkŏ mjing boh kdrŭt čiăng mđĭ kyar bruă duh mkra, bi kjăp bruă lĭng kahan, klei êđăp ênang, mđĭ klei hdĭp mnuih ƀuôn sang”.

Hluê si pô bi ala Nguyễn Thị Kim Trúc ti ƀuôn prŏng  Vị Thanh, Hdră bruă anei amâo djŏ knŏng bi khuăt mnuih mă bruă ƀiădah lŏ mtrŭt mđĭ klei mbha gưl, mbha klei dưi ktang hĭn, mkŏ mjing klei găl kơ bruă sang čư̆ êa alŭ wăl bi lar bruă klam hlăm bruă kriê dlăng, gĭt gai.

 “Mđing truh kơ bruă mkŏ mjing bruă kđi čar khuăt, ngă bruă tŭ dưn, sa anăn hlăm klei gĭt gai, ktrâo lač, bi mâo djăp klei čiăng mđĭ kyar mơ̆ng lăn čar hlăm ênuk mrâo. Klei anei găl guôp hŏng hdră mlih mrâo klei ngă hră mơar knŭk kna mơ̆ng lu ala čar dlông rŏng lăn”.

Čih yap klei blŭ mơ̆ng phung bi ala, Khua bruă kƀĭn ala Trần Thanh Mẫn hưn hŏng phung bi ala kơ dŭm hdră êlan mơ̆ng Đảng kơ hdră bi khuăt phung mă bruă kđi čar. Khua Bruă Kƀĭn Ala mñă ktang, anei jing sa hdră prŏng ka tuôm mâo čiăng bi khuăt mnuih mă bruă, rơ̆ng kơ klei ngă bruă ktang, tŭ dưn. Kyua klei bi khuăt anei dưi mâo ai dưi duh bi liê bruă duh mkra ala ƀuôn, rơ̆ng kơ bruă lĭng kahan, klei êđăp ênang, mâo ai dưi mkŏ mjing bruă kđi čar ênuah ênô kjăp ktang.

 “Bi khuăt phung mă bruă knŭk kna kơh drei mâo ai dưi mđĭ kyar. Anăp anei srăng hưn mdah Bruă Kƀĭn Ala thŭn hriăm 2025 – 2026 amâo mâo mă prăk hriăm 30 êbâo êklai prăk. Ară anei dôk bi trông kơ anôk bruă knŭk kna, srăng hnưm pŏk mlar kơ anôk bruă êngao knŭk kna čiăng kơ bruă hriăm hră anăp anei amâo mâo klei rŭng. Hlăm klei bi tuôm, Khua gĭt gai Đảng Tô Lâm mñă kơ Hà Nội mlan 9 anei srăng mkăp prăk huă yang hruê kơ hđeh sang hră. Anăn jing mta kñăm mơ̆ng Đảng, knŭk kna srăng mâo bruă klam kriê dlăng mnuih ƀuôn sang kơ klei hdĭp, ai tiê.”

Klei bi tuôm hŏng mnuih ƀuôn sang ti Lâm Đồng leh anăn Hậu Giang dưi bi êdah klei uêñ mĭn mơ̆ng mnuih ƀuôn sang ti anăp dŭm klei mlih prŏng kơ bruă knŭk kna, mbĭt anăn mâo klei đăo knang kơ hdră êlan mơ̆ng Đảng, knŭk kna. Ai tiê mlih mrâo, bi khuăt mnuih mă bruă jing hdră êlan mđĭ hĭn boh tŭ dưn bruă kriê dlăng knŭk kna. Dŭm klei blŭ mguôp mơ̆ng phung bi ala srăng jing boh kdrŭt yuôm bhăn čiăng bruă mlih mrâo hră mơar knŭk kna dưi ngă tŭ dưn, klă klơ̆ng, kyua lăn čar mlih mrâo leh anăn đĭ kyar kluôm dhuôm hlăm ênuk mrâo.